QUOTE(akrm-nagy @ Nov 12 2005, 11:53 AM)
مبدئيا حاجة على السريع كدة يا ابو حميد ...
اية اللى نمى موهبة الكتابة عندك ؟؟
موهبة الكتابة .. هي كأي موهبة أخرى خلقها الله تعالى في الانسان .. تحس إنها جزء منك و تحس بالسعادة وانت بتعملها , و ممكن تتعب علشانها من غير ما تتضايق أو تزهق .
و أعتقد إن ده كان باين فيّا بالرغم من إن أهلي محدش أخد باله منهم من النق\ة ديه ولا حتى شجعوها ..
كتبت في أجندة صغيرة كانت عندي .. مجلة صغيرة محتوياتها نفس محتويات المجلات والقصص اللي كانت على أيامنا ..
كانت فيها حكم وأمثال . و بعض قصاصات من القصص الأخرى .. هل تعلم ..
كتبت مثلاً مسلسل من خمس حلقات بعنوان " محمود الفنجري " بتحكي عن شاب فاشل في كل حاجه و كل مايروح شغل يتطرد منه .. كان مسلسل كوميدي يعني ( ملحوظة .. مسلسل بمعنى قصه مسلسلة )
كتبت قصة أطفال بعنوان ” كركور في الفضاء "
و الجديد إني عملت لعبة اسمها المغاره .. زي السلم والتعبان , و كانت طويلة أوي .. علشان أنا كنت باحس إن السلم و التعبان بتخلص بسرعه
فعملت المغاره من 3 أجزاء .. كل ما توصل لنهاية جزء تنتقل للصفحة اللي بعدها , وألّفت بقا حبة حاجات زي روح من هنا , وارجع من هنا . المغاره قفلت ملحقتش تدخل .. حد سمعك روح استخبى .. وهكذا , و كانت جميلة و مبتكره .. لدرجة إنها انتشرت في العيلة عندنا .
و كمان كان في المجلة حوالي 3 أو 4 قصص قصيرة
" لعبة الأشرار " بوليسية – عن عملية تبديل زوجة أحد العلماء و زرعها لخطفه هو و عائلته
" الانفجار " بوليسية – عباره عن خادمتين يعملون في تهريب الآثار والمخدرات
" البيت الغامض " خيال علمي بوليسي .. عن محاولة لغزو الأرض
و متنسوش إن القصص ديه كانت بأسلوب بسيط و من غير تفاصيل .. كأنها مشاهد من أفلام .. لما بشوفها بفضل أضحك على اللي أسلوب الكتابة بتاعي زمان .. متنسوش إن كان عندي حوالي 10 سنين أو 11..
الأجندة ديه لسه عندي .. و اتكتبت ما بين سنة 1989 تقريباً و 1991.
أيامها كنت بأقرأ .. مجلة سمير .. و مغامرات تان تان ( لو حد يعرفها ) , و غريندايزر , و لاكي لوك .
قبل ما اتجه لأول بداية أدبية الصحيحة ( من وجهة نظري ) .. لما قرأت لنبيل فاروق .. قصة ( زائر من المستقبل ) العدد 6 من سلسلة ملف المستقبل
و بدأت أقرأ أكثر .. رجل المستحيل .. ملف المستقبل .. كوكتيل 2000 .. الشايطين ال13 .. المغامرون الخمسة ..
و من خلال الكتب ديه بدأت أدرك إن فيه حاجه اسمها كتب عالمية و أدب عالمي , وبدأت في قراءة أعمال هتشكوك و كمان معشوقتي أجاثا كريستي ..
ثم بدأت في قراءة أعمال أنيس منصور و محمود السعدني .. وهكذا بدأت في القراءة في كل الاتجاهات
لحد لما قابلت أول قصة حب في حياتي .. وديه كانت أول مره أكتب فيها خاطره .. و كانت من غير عنوان و كتبتها في ييناير 1998.
و خلال سنتين كتبت حوالي 15 خاطرة و أغنية .. بس كانت بدون إطلاع على قواعد اللغة العربية السليمة و التشبيهات البلاغية .. يعني كانت بسيطة .. يمكن أقواهم كانت " عَلّمني حبيبي الحب " و " مريض أنا " , " و عندما ألقاكِ " " أغار عليكِ " " عذاب اسمه شوق " , و أغنية " أنا لو نسيتك "
إلا أن كل الخواطر ديه كانت في كُتيّب صغير ( نوت بوك ) خاص بيا , و محدش قرأهم غيري و الفتاه التي كنت أحبها فقط .. حتى إن الخواطر ديه مكانتش معاها .. كانت معايا أنا .. مسمحتش لحد بحق الاحتفاظ بشئ ملكي .. مش عارف ليه .. بس جايز إن كده كان أحسن و الحمد لله .
و انقطعت عن الكتابة تماماً منذ عام 2000 .. وحتى أن سافرت في أواخر عام 2001.. و بعد شهر واحد من السفر .. تعرضت لصدمات متتالية أعقبها لصدمة عنيفة جداً أفقدتني اتزاني بصورة رهيبة , و دخلت دوامة من الحزن و الألم عانيت فيها الكثير .. حتى جاءت لحظة تفريغ الألم والحزن ده ..
في 15 أغسطس 2002 , كتبت أول أغنية ليا ( أول أغنية بعد الانقطاع الطويل عن الكتابة ) و كانت بعنوان " ماتسألنيش .. منشوره في المنتدى )
و كالعادة كتبتها لنفسي فقط و احتفظت بيها ... بالمصادفة البحته طبعتها علشان أقرأها في المنزل و أعدّل عليها .. و سبت الورقة بره و دخلت نمت ..لما صحيت .. لقيت صاحبي اللي ساكن معايا في البيت بيقرأها و بعدين قالي أنت رائع يا أحمد و تبكتب حلو جداً .. شديت معاه في الكلام و قلتله أنا مش بحب تريأه و خصوصاُ على موضوع الكتابه ده .. المهم لقيته بيتكلم بجد .. لدرجة إنه قالي شوف حد يغنيها .. لأني كنت ملحنها أنا , و بدأ حد يقرالي من صحابي و أكدوا موضوع إني بكتب حلو .. و كتبت أول قصة قصيرة ليا بعنوان " المجزره " , و برضه حازت على إعجاب الجميع , وبدأت في الكتابة واحده واحده .. لحد لما التحقت بأول منتدى , ومنه بدأ اسم أحمودا يظهر على النور , وبدأت أتعلم أكتر و أتعرف أكتر وأكتب أكتر .. وهكذا ..
اللي عايز أقوله .. إن اللي نمى موهبة الكتابة عندي .. بشكل أساسي ورئيسي . هي القراءة .. القراءة .. القراءة
أما إذا كان سبب تاني .. هو الألم و الحزن
