مشاعر جميلة يا فير

رجعتني لذكريات جميلة ..

لما كنا بنستعد للسفر .. كنت فرحانه جدا لأننا مسافرين لوالدي أولا .. ولبلد مختلفة .. وغنية!! <_<
لحد ما جه يوم السفر واستوعبت الموقف .. بصيت حواليا ..على كل مكان ليا فيه ذكرى ..ولقيت نفسي بودع أشخاص كان بيني وبينهم ذكريات جميلة.. سألت نفسي انا هسيب كل ده؟!! ياترى هرجع في يوم ؟؟ ولو رجعت هلاقي نفس الأشخاص والأشياء زي ما سبتها؟؟ وهل هكون أنا نفس الإنسانة ؟؟

حسيت يومها إني تايهه .. وحياتي بتضيع.. وبكيت بحرقة محستش بيها في اي وقت قبلها..وفي آخر لحظه أخدت نفس كبيييير اوي ..لسه بحسه أحيانا دلوقتي..

بعد ما سافرنا ..الأيام الأولى كانت صعبة جدا..بس مرت..ومرت بعدها أسابيع وشهور..ودلوقتي سنين..يمكن نسينا بعض ذكرياتنا.. وبعض الأشخاص بقو خيال..بس عمرنا في يوم ما نسينا مصر..
دلوقتي لما بتيجي حاجة من مصر ..بنشم فيها أنا واخواتى ..ونقول اللللله دي ريحة مصر.. لدرجة اننا بتعدي علينا أوقات بنوصل لحد الهلوسه!!! :blink:


.............
بس فيه حاجه محيراني جدا..دلوقتي العالم كله بيحب مصر..والناس مبتصدق أي فرصة أو أي أجازة وتنزل على مصر.. ما عدا ولا دها المغتربين!! لما بينزلو بعدو الأيام عشان يمشو تاني..للأسف دي حقيقة وموجودة وشفتها في ناس كتير..
مش عارفه ايه السبب..مصر هي اللي بتطفشهم(على رأي فير) ولا هم اللي خلاص مبقوش معتبرينها وطن ليهم؟؟ولا اييه؟؟ :unsure:

............
على فكرة يافير فيه فرق كبييير اوي ..بين اللي اتولد وعاش في مصر وسابها ..وبين اللي اللي مش عايش فيها وبنزلها كل فترة...وارجع اقول تاني لما انتي ما قعدتيش فيها الا 8 شهور وجواكي كل الحنين ده ليها..امال احنا نعمل اييه؟؟ :(