بسم الله

السلام عليكم

قابلتنى القصة فى منتدى من المنتديات ..

الموضوع كله عبارة عن مشاهد ومواقف لأشخاص مختلفة ..

الشخصية دى أثر فيا الموقف بتاعها جدا

وحسيت إنه قريب منى ومن أشخاص كتير فينا

الحلقة الأولى :

أحمد بقى شاب موجود منه كتير ممكن يكون أنت نفسك أحمد وأكيد عرفت واحد زيه في مرحلة من مراحل حياتك أو يمكن كنت زيه في فترة من الفترات وربنا خد بايدك . أحمد ده يا سيدي شاب من أسرة ملتزمة بجد , أب ملتحي وحافظ للقرآن وبيعامل الناس بخلق الإسلام وأم منتقبة صوامة قوامة وبتدي دروس في المسجد ومفيش اتنين يختلفوا على حسن خلقها وإلتزامها .

نرجع لأحمد , أحمد يا اخوانا اتربى من صغره على قال الله وقال الرسول وعارف الحلال من الحرام وحافظ أحاديث أكتر مني ومنك وكان متربي في وسط معقم ومدرسة إسلامية والناس كلها مبسوطة بالتزامه وحسن خلقه ..

وفجأة أحمد دخل الجامعة ولقى نفسه في وسط غريب غير اللي كان متعود عليه وابتدى أحمد يحس بعدم ثقة رهيب في نفسه وإنه أخلاقياته وتصرفاته مش مقبولة من الآخرين والحاجات اللي بيشفها صح موضع سخرية والحاجات اللي بيشوفها غلط موضع فخر ومباهاة .


أحمد حاول يثبت بس التيار كان قوي أوي وبدل ما يقاوم ويتمسك بالصح اللي طول عمره مؤمن بيه ابتدى أحمد يبعد عن أصحابه الملتزمين وينفر من نصايح أبوه وأمه وتدريجيا تحول أحمد إلى شخص غريب لا هو ملتزم وبيفرح مع الملتزمين ويرتاح لصحبتهم ولا هو شاب روش وكول ومقبول من الناس اللي بعيدة عن ربنا وعايشة حياتها تحت رحمة شهواتها ومش شايفين قدامهم غير الدنيا بمفاتنها ..

وهنا ابتدت الوحدة تقتل أحمد وتضيق بيه الدنيا وزاد جواه الشعور بأنه منبوذ مفيش حد قابله ومش قادر يكون متميز في أي حتة أو أي حاجة وبدأ أحمد يهرب من الواقع , يدخل سينما كتير لوحده ويسمع أغاني ويعمل شات على النت وشوية شوية من كتر الفراغ والملل والوحدة بدأت المعاصي تجره ليها جر ففكر يزني بس الأساس الديني القوي اللي عنده وقفه راح فكر يشرب خمر أو سجاير ملفوفة زي الشباب المنحرف اللي معاه في الجامعة برضه قلبه مطاوعهوش لحد ما وقع في صديق سؤ كان برضه ملتزم في يوم من الأيام ومشي ورا شيطانه ونفسه الأمارة بالسؤ وفي سهرة على النت صاحبنا شاف أول فيلم ثقافي ولأول مرة أحمد يعصي ربنا بالشكل القوي ده وكان عنده إحساس رهيب بالذنب وهو بيتفرج وبعد ما شاف الفيلم خد عهد على نفسه إنه ميتفرجش على أفلام تاني !!

وفضل ماسك نفسه 3 أيام بس الفراغ والوحدة والملل خلوه مش لاقي حاجة تاني يعملها فراح مكلم صاحبه وشاف الفيلم التاني والتالت و.....أصبح أحمد مدمن أفلام ثقافية وحياته عبارة عن سماع أغاني وتلفزيون وسينما لحد ما مرة قابل أحمد في الشارع صدفة صديقه اللى هيغير مسار حياته تماااااما ..


تتبع ,,,

الحلقة الثانية :

عمر : إزيك يا أحمد ياااه ايه الغيبة الطويلة دي فينك يا راجل
أحمد : إزيك يا عمر ايه أخبارك وأخبار الدنيا معاك
عمر : تمام يا أحمد ليه محدش بيشوفك في المسجد
أحمد : والله يا عمر مشاغل الحياة
عمر : مشاغل ايه يا سيدي اللي تبعدك عننا وعن النعمة اللي اسمها الصلاة دي طب أركب أوصلك ونتكلم شوية
ركب أحمد السيارة وشعر بضيق شديد من القرآن الذي يدوي من كاسيت السيارة وإن كتم ضيقه
عمر : مالك يا أحمد فيه حاجة مضيقاك؟؟
أحمد : ممكن توطي الكاسيت شوية
عمر : وماله يا سيدي أفضل برضه عشان أعرف أتكلم معاك بس ايه رأيك في صوت الشيخ ده؟؟؟
أحمد بحدة : أرجوك وطي الصوت
عمر بدهشة : طيب طيب يا سيدي حطفيه خالص كمان بس فهمني في ايه؟؟؟ نظر إليه أحمد وهم أن يقول شيئا ثم أشاح بوجهه ونظر إلى الأرض في انكسار ولاذ بالصمت
إلتفت إليه عمر وقال بصوت حنون : أحمد لو في حاجة مضيقاك قولي إحنا متربيين مع بعض ومحدش قلبه عليك قدي , أخبرني بالله عليك مالك عشان أقدر أساعدك ؟؟
تردد أحمد لحظات ثم قال بصوت متلعثم : بصراحة كده مش قادر أسمع قرآن , نظر إليه عمر بود وقال بصوت لين : والصلاة أخبارها ايه معاك؟؟ تشجع أحمد وأطلق العنان لما يكتمه بصدره : أنا يا عمر مش بصلي ولا بقدر أسمع قرآن وحياتي كلها معاصي ومش عارف أعمل ايه ثم إنفجر باكيا .

ربت عمر على كتفه وذكره بالآية الكريمة " قل ياعبادي الذين أسرفوا على أنفسهم لاتقنطوا من رحمة الله إنالله يغفر الذنوب جميعاً إنه هو الغفور الرحيم"
قاطعه أحمد : أنا مش قادر أعمل أي حاجة ترجعني يا عمر لا قادر أصلي ولا أستغفر ولا طايق أسمع أي حاجة تمت للدين بصلة والحاجة الوحيدة اللي بسمعها الأغاني و... أقولك ايه بس يا عمر أنا ضعت خلاص .

إعتدل عمر في مقعده وقال وهو ينظر لأحمد في عينيه : عندي ليك حل
لمعت عينا أحمد وقال في لهفة : إلحقني بيه بالله عليك
عمر: ايه أسهل طاعة ممكن تعملها
غمم أحمد بصوت يائس : مفيش أي طاعة قادر أعملها
عمر : بل يوجد بس الشيطان مقفلها عليك , اقعد فكر بهدوء كده وحتوصل لواحدة وهي حتكون مفتاحك للخروج مما أنت فيه وتذكر أخي وحبيبي في الله " ومن يتقي الله يجعل له مخرجا "
رد أحمد بيأس : طيب ححاول واشكرك على التوصيلة
نظر إليه عمر برجاء : أرجوك يا أحمد حاول ترجع تاني معانا ده الرسول عليه السلاة والسلام بيقول " عليكم بالجماعة فإنما يأكل الذئب من الغنم القاصية "
أحمد : مقدرش أوعدك يا عمر بس أوعدك إني أفكر في طاعة أعملها

عمر : وأنا حدعيلك يا سيدي بالهداية وبابي مفتوح ليك في أي وقت .

تتبع ,,

الآخيرة ..




دخل أحمد إلى غرفته وفتح الكمبيوتر وتأمل الأغاني والأفلام الموجودة عليه وتمم بينه وبين نفسه يالمعاصي اللعينة كيف وصلت إلى هذا الحد وإتجهت اصابعه لا إراديا إلى أحد الأفلام وهم بفتحها وفجأة نادته أمه فأغلق الملف بسرعة وأعاد تخبئته بين ملفات الألعاب وقال بصوت مبحوح : نعم يا أمي , ثواني وحكون معاكي وخرج إليها وعلامات الإضطراب بادية على وجهه : أيوة يا ماما في حاجة؟؟

الأم : ممكن تساعدني يابني في توضيب الأطباق المغرب حيأذن خلاص ولسه مخلصتش الأكل

قال أحمد بحدة : أطباق ايه اللي اساعدك فيها هو أنا فاضي يا ماما مش شايفاني عندي مذاكرة

قالت الأم بتوسل : يابني أنا بشتغل من الصبح ولسه مخلصتش ومفيش حد يساعدني ولو ساعدتني ربنا حيباركلك في وقتك و..

قاطعها أحمد بحنق : خلي أختي تساعدك يعني لازم أنا اللي آخد ثواب !!!

أردفت الأم : أختك مريضة النهاردة ومن الصبح وهي في السرير

فقال أحمد بثورة : هي أختي دي علطول عيانة ما تحلي عن دماغي بقى مش ناقصك

فترد الأم بصوت مكسور : طيب يابني , ربنا يهديك لا حول ولا قوة إلا بالله العليّ العظيم .

ويدخل أحمد إلى غرفته وغضب جامح يسيطر عليه , حاول أن يفتح الفيلم مرة أخرى إلا أن الشعور بالتوتر غلبه وبينما هو كذلك إذ تذكر كلمات صديقه عمر " دور على أي طاعة سهلة تخرجك من اللي انت فيه "

وترددت الجملة في اعماقه أكثر من مرة فخرج مندفعا ناحية أمه : أيوة يا أمي أؤمري "

أغروقت عينا أمه بالدموع وقالت بصوت مبحوح من البكاء ربنا يباركلك يابني يا حبيبي رص بس الأطباق دي على السفرة

فقال أحمد بينه وبينه نفسي " ويحي شوية أطباق أحطهم على السفرة وكل الدعاء الجميل ده إزاي أنا مكنتش منتبه لحاجة زي كده ! من النهاردة أي حاجة تطلبها أمي حعملها وحبرها على قدر طاقتي "

ومرت الأيام وأحمد لا يتأخر عن أي طلب تطلبه الأم والأم في حالة رضى تامة عن أحمد وكثيرة الدعاء له بالخير حتى دخلت الإمتحانات وكعادة أحمد بدأ يفتح المنهج لأول مرة ويجيب الكتب اللي مكنتش عنده وبقى واقع في عرض ثانية وأمه تطلب منه طلبات كثيرة فيفعلها بسرعة دون أدنى إعتراض أو حتى تلميح بضيق وقته ومرت الإمتحانات ونجح أحمد لأول مرة منذ دخل الجامعة في جميع المواد وفي طريق عودته للمنزل والسعادة تغمره قابل والده

أحمد : أنا عندي ليك خبر حلو جدا يا بابا

الوالد : وأنا كمان عندي ليك خبر حلو

أحمد : طب قول

الوالد : لا قول انت الأول

أحمد :انا نجحت في جميع المواد

الوالد : بارك الله فيك يابني أخيرا فرحت قلبي يا رب لك الحمد كما ينبغي لجلال وجهك وعظيم سلطانك

أحمد مقاطعا : ها .. قول ايه الخبر الحلو

الوالد : حنطلع عمرة كلنا إن شاء الله

يقفز أحمد من السعادة ويحضن والده . تمر الأيام ويذهب أحمد إلى العمرة مع أهله وعند دخوله إلى الحرم ورؤية الكعبة يسقط أحمد على ركبتيه من الرهبة ويشعر بالخجل الشديد من نفسه حين وقف بين يدي الله بمعاصيه وتذكر اللحظات التي كان الأذان يؤذن فيها وهو يسمع أغنية أو يشاهد فيلما ثقافيا وانهار أحمد ودخل في حالة بكاء عنيف واستغفار وعند العودة شعر أحمد بألم شديد أنه سيغادر الحرم الشريف وسيرجع مرة أخرى إلى الدنيا وفتنتها ودعا ربه بصدق وإخلاص شديد أن يعصمه من الكبائر والمعاصي ويجعله من عباده الصالحين وعاد أحمد إلى الفندق وكان خلال طريق العودة إلي مصر لا يشغل باله سوى خوفه من فتن الدنيا وضياع الحالة الإيمانية التي جعلته يشعر بسعادة حقيقية لأول مرة منذ فترة طويلة جدا وحين عاد إلى مطار مصر وجد في انتظاره صديق طفولته " عمر " فشعر بسعادة حقيقية وقام عمر بتوصيله إلى بيته على وعد باللقاء في المسجد لصلاة الفجر ومن يومها لم ينقطع أحمد عن أداء الفروض في المسجد وقراءة القرآن وقيام وذكر الله وكل يوم يمر عليه يتردد في عقله بصوت رنان جملة صديقه عمر " دور على أي طاعة سهلة تخرجك من اللي انت فيه "


إنتهت !!

تعليق بسيط علق به صاحب الموضوع ..


الطاعة تفتح أبواب الطاعات وإن المعصية تفتح أبواب المعاصي ولقد رأينا في هذه القصة كيف أن بر الأم فقط استطاع أن ينتشل أحمد من قسوة القلب وعدم القدرة على الطاعة وكان طريقا إلى هدايته بفضل الله عز وجل وأتمنى منكم جميعا أن تشاركونا بأنواع الطاعات التي كان لها أثر كبير في تغيير حياتكم من الضلال إلى الهداية أو حتى من طاعة إلى طاعة أكبر وجزاكم الله خيرا


_______________(( منقول ))________________

وجزاكم الله خير للمتابعة ..

أحمد أمين

الله عليك يا نادر قصه جميله جدا
ربنا يبارك فيك
ويرحمنا جميعا وهدي المسلمين

جزاك الله خيرا

بجد قصه رائعه وبتتكرر كتير وبنشوفها كتير اوى

خاصه الايام دى مع الفتن والمعاصى اللى بقت سهله اوى

ربنا يهدينا جميعا ويوقفلنا الصحبه الصالحه يارب

وييسرلنا الطاعه يارب

سلمت يمينك يا احمد

ماشاء الله عليك يا نادر

بجد قصه جميله جداااااااااا

وللا سف بتكررر كتير اووى

الايامدى

ما اجملها من جملة!!!

" دور على أي طاعة سهلة تخرجك من اللي انت فيه "

جزاك الله خير

ماشاء الله قصة فعلا جميلة

ربنا يبارك فيك جزاك الله خيرا

بجد الواحد بيتعلم منها وبياخد عظة

سلمت يداك

بسم الله ..


ميريهان



ويبارك فيكى يارب

اللهم آمين ..

وجزاكى الله خير للمرور والرد



كلاسيك ..



ايوه يا كلاسيك فعلا

بقت سهلة قوى للأسف

وإحنا اتعودنا عليها !!

وأنا شايف بقى إن أهم حاجة الصحبة الصالحة , وإلا ماكنش حصلة اللى حصل ده ..

(( كنافخ الكير , وكحامل المسك ))

صدقت يا سيدى يا رسول الله ..


وشكرا لردك يا كلاسيك ..



أسيرة ..




أيوه يا أسيرة مظبوط ..

بتتكرر .. كتير جدا وأسبابها أكتر وأكتر ..


والجملة دى رائعة فعلا ..

وعلى فكرة فيه جمل كتيرة قوى تبقى فواصل فى حياة بشر

وربنا يرزقنا الهداية دايما ويثبتنا على الحق ..

جزانا وإياكم ..

وشكرا للمرور ..

سنو ..


ربنا يبارك فيكى إنتى يارب

وأهم حاجة فعلا العظة من القَصص ..

ربنا بيقول : (( لقد كان فى قصصهم عبرة لألى الألباب , ما كان حديثا يفترى !! ))

مش كلام بس على الفاضى ..

وشكرا لردك يا سنو ..



يا ريت نشوف نعرف نطلع فوائد من القصة تانى ولا لا ؟؟

ايه رأيكم ؟

أنا هابدأ بواحدة ..

* التربية السليمة فى الصغر منعت الشاب من إرتكاب أخطاء قد تهلكه تماما وقد تجره إلى أخطاء أكبر منها ومنها ..

وكأن التربية السليمة فى الصغر زى تقوية ساق النبات الصغير , لما يكبر يكبر قوى الرياح لو حتى ميلته مش هتعرف تكسره ..



أحمد

جزاك الله خيرا
على القصة الرائعة
ونقل موفق
جعله الله فى موازين حسناتك

فعلا

خير الكلام ما قل ودل


جزاك الله خيرا على القصه الجميله

اشكرك اخى الكريم

صه رائعه يا نادر

وموقف يتكرر يوميا

انا شايف انه اول خطوة ايجابيه عملها احمد عشان يرجع تانى هىاعتزال اصدقاء السوء

وجزاك الله خيرا

happy-girl .



جزانا وإياكم ..
وربنا يتقبل منى ومنك ..

سندباد ..


العفو يا باشا

والحمد لله إنها عجبتك ..

أبو جودة ..


فعلا يا أحمد ..
اعتزال أصدقاء السوء وطاعة الوالدين والتربية السليمة برضه

وجزاك الله خير للإضافة ..

قراتها مره تانيه

فعلا قصه رائعه بجد

اشكرك جدا

على فكره القصه دى مؤثره فيا جدا بالرغم من انا معملتش الى اخينا ده كان بيعمله

بس عارف

انا هحاول اصلى الفرد بفرده بعد كده

جزاك الله خيرا

وده دليل ان القصه دى بجد جميله جدا انى رجعت اقرئها مره تانيه

فعلا الواحد لازم انه يدور على اقل طاعه وبعد كده كل حاجه هتتصلح ان شاء الله

عموما الحمد لله ان انا موصلتش للى الشب ده وصله

لكن انا هحاول اواظب على الصلاه ان شاء الله

اشكرك يا نادر

السلام عليكم،

أخي الكريم: قصة أكثر من رائعة، جزاك الله خيراً.

اللهم يا مقلب القلوب ثنت قلوبنا على حبك والإيمان بك.

سندباد ..


جزانا وإياكم

وفعلا الموضوع مؤثر وجميل ..

وأثر فيا فعلا كتير ..

والحمد لله انه اثر تأثير ايجابى برضه معاك

اللهم اجعلنا ممن يستمعون القول فيتبعون أحسنه

وربنا يغفر لنا ويوفنا جميعا ..


د/ أحمد

جزانا وإياكم

اللهم يا مقلب القلوب والأبصار ثبت قلوبنا على الايمان

اللهم آمين

وجزاكم الله خير للمشاركة والإضافة

بجد قصة جميلة اوووووووووووووووى

مشكور اوووووووووووووى على الحاجات الجميلة دى

وجزاك الله كل خير

واسكنك فسيح جناتة

بجد قصة جميله جدا
و ندعو الله أن يحمينا من الفتن ما ظهر منها و ما بطن