بعد عناء وقلق زى قرص الناموس قررت أتجوز ، كنت فاكر الأمر مجرد شكليات لكن الموضوع
كان أكبر من خيالى الضيق مقاس باتا 12 ، رشحت لى أمى ابنة خالى لكن كان لى تصور مختلف
طلبت من عمتى تحضر لى صور أغنى ثلاث بنات بالبلد بصيت للصور واخترت أحلاهم (بنت عم شاهين)
تاجر العسل المغشوش والعسل مغشوش بطريقة مبتكرة فهو عبارة عن ماء وسكر مضاف إلى كل لتر
عدد ثلاث نحلات مذبوحة ذبح حلال .
دخلت البيت كل حاجه فيه بتلزق ، حتى البت شربات بنته من لحظة ما شافتنى وهى لزقت لى
بصراحة هى حلوة انما كانت بتريل طول القعده ومش هقول انى مقروف منها عشان كده هربت
دول برده ولايا واللى ييجى عليهم ما يكسب .
خرجت من عندهم وأنا بـ أعيد حساباتى من جديد عن عالم المرأة ، يعنى يا حظك الأزرق يا معاطى
لو وقعت فى واحده بقها زى شربات .
لا انت وصلت لخمسة وتلاتين سنة يعنى لازم تختار بمزاج كفايه عمرك اللى ضاع وخيالك اللى اتشل من كثرة الاستهلاك
على طول قررت التوجه لبيت الحاج لباد تاجر المواشى عشان أشوف بنته اللى رشحتها عمتى
خصوصا ان اخوها حسان كان زميل دراسة ، وأكيد هيكون واسطة خير لكن المفاجأة الغير متوقعة
انه هو اللى حدف كرسى فى الكلوب واتهمنى انى سرقت منه ساندوتش (جبنة مش) فى سنة رابعة ابتدائى
وعرفت ساعتها هو ليه منفعش فى المدرسة وبقى تاجر مواشى فمن عاش مع الحمير تعلم النهيق .
فى طريقى قابلت ابوآخر البنات اللى رشحتهم عمتى وهوالحاج صدقى .. راجل ربوى من الدرجة الأولى ،
تحت تأثير وضعه المادى قلت أروح أشوف بنته يمكن يحصل نصيب والبنت تطلع مش مضروبة زى ابوها ،
وبصراحة الراجل مقتدر وهيوفر علىّ كثير خصوصا انه بقى له فى كل بيت فى بلدنا جدار .
إزيك يا عم صدقى
أهلا معاطى حمدلله على السلامة
الله يسلمك انت لساك فاكرنى ؟!
وأنا أقدر أنساك انت ناسى إن أبوك الله يرحمه كان مستلف منى متين جنيه ثمن تذكرة سفرك للأردن
الله يحفظك لأهل البلد والغلابة يا عم صدقى عموما أنا جاى أرجع لك المبلغ امى قالت ان أبويا الله يرحمه
سدد لك ميت جنيه من المبلغ وأنا جبت المية الباقية
أصيل زى أبوك يا معاطى
بس كنت عاوز أفاتحك فى موضوع يا حاج
اتبسط قوى من كلمة حج دى ورفع ايده بالسبحة التى لا تفارقه حتى وهو بيرش النقطة على الغوازى
قول يا ابن الغالى
والله ياحاج أنا ربنا كرمنى وبنيت شقة وعاوز اكمل نص دينى ومش هلاقى أحسن من عايزة بنتك
احنا مش هنلاقى أحسن منك يا معاطى
خلاص يا حج ممكن أشرب كباية شاى معاك إمتى
دلوقتى يا معاطى على الأقل أسلم على أمك من زمان ما شفتهاش
آه يا حاج صدقى يا واطى يعنى انت بتحلق لى طيب أنا هأوريك
قررت أن أصر على شرب الشاى ببيته كى أتمكن من رؤية عايزة واعاينها واللى يكون يكون
لا يا حاج نشربه عندكم علشان أسلم على الحاجة وأشوف كريمتكم
آه : حقك يابنى طبعا
وتوجهنا على الفور إلى بيته
دخلت فى غرفة الانتظار ، انتظرت ، ساعة كاملة يحكى لى عن كفاحه وازاى قدر يشق طريقه
وإنه عانى من الإشاعات المغرضة اللى بتقول ان أبوه يهودى .
يا عم صدقى انت راجل مؤمن سيبك من كلام الناس .. المهم الحاجة فين دى وحشانى
آه الحاجة
خرج ودخل معاه الحاجة
(كتمت غيظى بصعوبة هوانت بتستهبل ولا إيه فين البنت يا يهودى ؟!!)
كنت متغاظ على الآخر لكن صبرت ، شويه ودخلت عايزة بكوب شاى ، البت زى القمر بس مش عارف ليه قلبى ما استريحش لها
قلت أذوب الجليد اللى بينا : ماشاء الله أحلى شاى شربته فى حياتى
ضحكت عايزه وقالت : بالصحة
أنا ارتحت لها بصراحة بعد دعوتها دى
عارف يا حاج صدقى أنا شربت شاى زى ما تقول قول لكن شاى بالحلاوة دى ما شفتش
صحتين يا معاطى
ضاع الارتياح من تانى
طيب يا حاج طلباتك ؟ ..
هز راسه وقال : شوف يا معاطى ياابنى انا مليش طلبات خالص احنا بنشترى راجل وانت ملو هدومك
الله يعز مقدارك يا حاج دا عشمى فيك لكن الأصول أصول
طيب يا معاطى يا ابنى انا هاسيب عايزة هى اللى تقول على اللى عاوزاه انت عارف عايزة وغلاوتها
ابتسمت فى قرارة نفسى وحسيت انى سيطرت و كلفتهم خصوصا البنت من لحظة ما دخلت وهى مش على بعضه
ا
طلعت عايزة ورقة دبلانة من صدرها وفردتها ورمتها ناحيتى ، وقالت : اقرأ
بصيت لقيت الحبر مش باين منه شيء رميته لها تانى وقلت دا الورقة واضح انها قديمة ممكن تقريها انتى ؟
اسمع يا معاطى انا صريحة وواضحة واللى اوله شرط آخره نور يا ابن الناس
كلام جميل يا عايزة
انت الأجمل يا معاطى
انت الأجمل يا معاطى ياه من قد ايه ما سمعتش كلمة حلوة زى دى والله لو تطلبى عينى أقلعهم عشانك يا عايزة
تسلم لى عيونك يا نظرى دا انت اللى تاخد عيونى ،
تكتب لى فدان طين باسمى وفدان مهرى وفدان مؤخر وأمك ما تعيش معانا وممكن تزورها كل أسبوع
بس يا عايزة دى ملهاش غيرى وانا وحيدها الوقتى
يا معاطى امك مش هتعيش لنا العمر وبعدها هيزيدها معزة يا نور عيونى
طيب سيبينى شويه افكر هقول لها ايه
خرجت من عندها ومش عارف أعمل ايه البت مزغللة فى عينى ويوم من الأيام هتورث
وملكى على ملكها أبقى باشا ، يا ترى يا امه هتفهمينى وتقدرى ولا هتتعبينى
اتأخرت ليه يا معاطى
كنت بأزور الحاج صدقى يا امه وعاوز نوصلهم نقرأ الفاتحة على عايزة بنته
خبطت على صدرها وقالت : يا نضرى ما لقيت غير ناس السو دول يا معاطى ، دا مفيش حد فى البلد بيحبهم
يا امه دا كلام غلط كله .. الناس شاريينى ومرحبين وانا كلمتهم خلاص
وبنت خالتك اليتيمة اللى انتظرتك السنين دى كلها
يوووه قصره يا امه انا اخترت خلاص
اتغيرت يا معاطى رجعت بتدخن وانت اللى ما شربتش حتى كوباية شاى فى حياتك ،
طول سفرك ما فكرت تبعت لنا جنيه ولا تسأل علينا أنا وابوك الله يرحمه على كل حال مبقاش ييجى منه ،
انت حر يا ابنى ، لكن عمرى ما أنسى أبوك وهو بيموت وحماك بيطالبه بالفايظ ، روح اعمل اللى بدالك لكن انا خلينى هنا بعيد
قلت فى بالى كويس انها جاءت منها
اليوم التانى كنت كتبت لعايزة فدان مهر وفدان مؤخر وكتبنا الكتاب واتفقنا ان الفرح يكون يوم الخميس
علشان اكون جهزت البيت الجديد اللى اشتريته
قبل الفرح بساعة قلت ارجع الدار يمكن أمى تغير رأيها وتحضر الفرح
لقيت صورتى فى حضنها مليانه دموع وهى ميتة
يا جماعة الجنة تحت أقدام الامهات
.