Bassam
Jul 23 2007, 09:34 AM
في المكان ده هاحاول اجمع شوية قصايد عامية
لشاعر جميل اسمه / علي سلامة
بيتميز بالبساطة والفكاهة وروحه العالية
ونقده اللي بيبان في قصايد ه وفي حب مصر .
(( خايف أقلق بالليل زي ما بقلق ))
3
خايف أقلق بالليل كده زي ما بقلق
خايف
خايف اقلق بالليل كده زي ما بقلق
أو علي وش الصبح
أنا وظروفي بقي بعد العصر
وأفتح الشباك وأبص
ما الاقيش مصر
أعوذ بالله من الشيطان الرجيم
ياخي فال الله ولا فالك
طب وأنت مالك !!
طب يعني أيه ؟
يعني إحنا بيتنا اللي
بيطل عالنيل ده
هيطل علي فرنسا
ويبقي بلدنا اسمها التجمع الخامس
المجاورة 15
مش هينفع 
خايف...خايف أبص من الشباك
م الاقيش مصر
الاقيها لمت هدومها ....وخدت حاجتها
هربت ... زهقت ....تعبت
لمت هدومها ..وخدت هرمها علي نيلها
وطفشت وحلفت 100 يمين
ما هي قاعدة لنا
ما هو بيني وبينك
برضه إحنا زودناها
زودناها ...كأننا استعمرناها
كأننا أستعمرناها ورثناها
بقي هي دي البت الامورة
كانت زي القمر
فجأة كبرت عجزت
وبان عليها الكبر
خايف..خايف أبص من الشباك فجأة
وما الاقيش مصر
Bassam
Jul 23 2007, 09:59 AM
((بمنتهي البراءة))
سألتني بنتي نور
في أربع خمس أمور
مش في كتاب الجراءة
قالتلي بابا يا بابا
مش أنت يا بابا بتكتب أغاني
وبتقول أشعار
طب أنا سمعت الشيخ يا بابا
بيقول إنك هتروح النار
زي الناس الوحشين
الحراميين الكفار
قولي يا بابا
يعني ايه استعمار ؟
ويعني أيه هرم ؟
ويعني أيه نيل ؟
ومين اللي حط النسر فوق العلم ؟
قولي يا بابا
يعني أيه انتخاب ؟
ويعني أيه حر ؟
ويعني أيه نصاب ؟
ويعني أيه كداب ؟
ويعني أيه هجاص؟
ويعني أيه اختلاس ؟
ويعني أيه خصخصة ؟
يعني أيه يا بابا معارضة ؟
طب ليه النهاردة
خدنا أجازة من المدرسة ؟
يابابا قولي يا بابا
يعني أيه قهر؟
وأين يقع خط الفقر ؟
ويعني أيه حظ؟
ويعني أيه زهر ؟
يعني أيه يا بابا إنسان ؟
ويعني أيه حرية ؟
ويعني أيه سرطان ؟
يا بابا يعني أيه خربوها ؟
ومين دول اللي خربوها ؟
طب وأنت كنت فين لما خربوها يابابا ؟
ومين سمارة اللي بيقولو عليها يا بابا ؟
وإزاي ضاعت من قلبك سمارة ؟
يا بابا أنت معايا ؟
فيه ناس بتقول كفاية
وعساكر ماسكين عصاية
وبنات متعورين
وبنات تانيين بيضحكوا يابابا !!
هما دولا إسرائليين يا بابا ؟
قولتلها نور 
صلي علي النبي كده
هيا قناة سبيس تون رقم كام
وخدتها علشان ننام
***********
علي سلامة
cute gurl
Jul 23 2007, 11:41 AM
جميل
متبعاك كمل
Bassam
Jul 23 2007, 11:43 AM
شكرا علي متابعتك
منورة التوبيك
cute gurl
Jul 23 2007, 11:51 AM
ده نورك يا جميل
بس ياريت اجى كل يوم الاقى جديد
مش عاوزين كسل
Bassam
Jul 23 2007, 11:56 AM
مش كسل والله بس ظروف الشغل
والحياة اليومية
بس ان شاء الله فيه جديد
كمان نص ساعة
Nostolgia to Love
Jul 23 2007, 12:08 PM
أشعار جميلة ...
متابعينك
classic
Jul 23 2007, 01:44 PM
تحفة
وفعلا اسلوبة جميل
ولما تسمعها نفسه بيقولها اجمل واجمل
شكراً يا بسام
Bassam
Jul 23 2007, 01:49 PM
نستو
شكرا علي متابعتك
يارا :
منورة التوبيك
اه هو فعلا بيقولها اجمل بس بيبقي فيها كلام مينفعش في الكتابة
بس لذيذ
جارة القمر
Jul 23 2007, 02:03 PM
على سلامه اللى على نجمه صوت وجيه عزيز
خصوصا الحفلات اللى كانت بتتنظم مع بعض
والاغانى اللى كانت مشتركه بينهم وجيه يغنى وعلى يلقى شعر
شكرا
Bassam
Jul 23 2007, 02:37 PM
(( يا خسارة ))
بص هأقولك م الاخر
أنا عندي عربية مركبتهاش
ومعايا فلوس مكسبتهاش
وجوزوني بنت حلوة محبتهاش
اشتريت بدلة جديدة
ملبستهاش
ولما كسرت الحمام وغيرته
محستش بأي انتعاش
روحت واخد بعضي كده علي جنب
واليوم كان منيل ورطوبة
قولتلي أيه يا أخي
أنت طوبة
قاللي هيا حسبة ومحسوبة
أنا أصلي زمااااااااااان
لمست قلبي غنوة حب
جميلة جميلة
لكن يا خسارة
محضنتهاش !!
Bassam
Jul 23 2007, 02:43 PM
جارة القمر
شكرا علي الاضافة
منورة
Bassam
Jul 23 2007, 10:09 PM
(( الضــحــك عـــــــيرة ))
الشعر عيرة والكحل عيرة
والورد فوق الخد
ولحد الضفيرة عيرة
الصبر عيرة والضحك عيرة
والفرح والأحزان كمان وحاجات كتيرة
حتى الحنان جوه البيوت
حتى الكلام...حتي السكوت
حتى الهتاف جوه المسيرة برضه عيرة
حيرني حيرة
بقينا ليه حبة حاجات
قمصان بدل على بالونات
ما بقيتش شايف إيه اللي جاي وإيه اللي فات
ما بقيتش افرق
ده أزرق ده ولا أحمر رمادي
ودي كارثة ولا ده وضع عادي
وده طفل ولا راجل عجوز
وده إيه ده راخر
جايز يجوز
نعسان ده ولا ساكت وساير
بردان ده ولا ده دور وداير
وده إحنا ولا الكل حاير
علي سلامة
cute gurl
Jul 23 2007, 10:15 PM
جميييييييييييييييييييل
تسلم ايدك
Bassam
Jul 23 2007, 10:19 PM
شكرا علي مرورك
classic
Jul 23 2007, 10:41 PM
جميل جداً بجد ...
Bassam
Jul 23 2007, 10:43 PM
شكرا علي مرورك يا يارا
نورتي التوبيك
تابعي هنا
فيه جديد
كل يوم ان شاء الله
cute gurl
Jul 24 2007, 11:14 AM
ايه يامان
فين جديد النهارده هنا
Bassam
Jul 25 2007, 03:39 PM
شكرا علي مرورك
Bassam
Jul 25 2007, 04:42 PM
(( اشتريت كارت))
اشتريت كارت جديد
وشحنت وسمعت الرصيد
واتسطت وهيصت
وأيييه
قولت أتصل أكلمها
طلبتها
لسه هأقولها: أنا ...
قالتلي الاسانسير عطلان
والواد خد الدور سخن
ملهلب نار بردان
لو لقيت في سكتك برتقان
هات
ولو هتعدي علي أجزخانات
إبقي رنلي
قعدت عالرصيف
وقعدت أبص للدنيا
والدنيا تبصلي
ولقتني واقف قدان
باب الاجزخانة
ببحلق في القزاز
صحيت علي صوت الصيدلي
بيقولي : عايز حاجة يا استاذ
قولتله : تشتري التليفون ده
ببلاش ؟
ومن ساعتها مكلمتهاش
فرحة
Jul 25 2007, 05:23 PM
جمال اوى بجد
بس بتاعة الضحك عيرة دى انا عرفاها مش فاكرة مين اللى كان خلانى اقراها تقريبا جارة
مستنيين الجديد
متبعاك يافندم
Bassam
Jul 25 2007, 05:38 PM
اهلا بيكي
هيا الضحك عيرة
نزلت قبل كده في موضوع منفرد ل ((واحد تاني ))
ومنورة يا فرح
وتابعينا
فرحة
Jul 25 2007, 06:03 PM
ميرسى يابسام عالتذكرة بس انا اقصد قريتها فى الكتاب ذات نفسة
Bassam
Jul 25 2007, 06:21 PM
ولا يهمك
نحن هنا
Nostolgia to Love
Jul 25 2007, 07:48 PM
شكرا يا بسام
ومتابعينك
بسمة أمل
Jul 25 2007, 10:23 PM
الله عليك..
انا بحب على سلامة ده ااوووى
كان جاى من قريب فى العاشرة مساءً على دريم
وفعلا طريقة القائه حلوة اوووى
وكلامه كده تحسه فى صوته اكترر مما تقراه
تسلم ايدك ومستنيين الجديد
Bassam
Jul 26 2007, 09:03 AM
شكرا علي مرورك يا بسمه
فعلا هو طريقة القائه جامدة
ودايما تعبيرات الوجه بتزيد من الاحساس وتوصيل المعني كما هو مطلوب
منوره التوبيك
Bassam
Jul 26 2007, 09:18 AM
((رسم القلب ))
بيعدي الوقت تقيل
ويمر بسرعة أوام !!
هيا الساعة كام ؟
ياااااااااااااه......
أشرب السيجارة دي
ويادوب أنام
لكن مفيش
حاجات كتير مبتسمحليش
أبدا بالنوم
أما النهاردة دا كان حتة يوم
شاف الدكتور رسم القلب
وراح واخدني علي جمب
وكشر في وشي
كأني عملت ذنب
وقاللي أيه يا عم
أنت مين ؟
قلتله واحد زي كتير عايشين
قاللي بص أنت تخس شوية
علشان أنت تخين
ومن النهاردة مفيش تدخين
وبطل كلام العيال
وكلام المجانين اللي بتقوله ده
بصيت جوايا
مبقتش عارف أصدقه ولا أكدبه
قولتله هأعيش؟
قاللي لو عايز
قولتله طيب بقولك أيه يا دكتور
ما تيجي نعيد رسم القلب
يمكن الجهاز بايظ
حكم أنا اليومين دول قلبي طاير
ومش علي بعضه
بص للتمرجي وقاله :
نادي يا بني علي اللي بعده
وقاللي : أشوفك بعد شهر
علي سلامة _ساقية االصاوي
Nostolgia to Love
Jul 26 2007, 09:47 AM
Bassam
Jul 28 2007, 08:22 AM
شكرا علي ضحكتك
Bassam
Jul 30 2007, 02:45 PM
((جايز ..يمكن ..احتمال ))
بعد إذن حضرتك
مش دي بطاقتي
وده رقمي القومي
ودي الحقيقة وده الخيال
طب مش دي الخريطة
ودي مدينة وكده المحور
ودا المترو
وكده يمين وكده شمال
طب مش ده ضابط
وده عسكري وده طبيب
وده كمسري
وده منجد وده بقال
طب مش دي مدرسة
وده جامع وده مصنع
وده واد معتوه وده سمسار
وده شيال
مش ده بستان ودي جلابية
وده شورت وده مفيش !!
وده شال ؟
طب مش ده اتوبيس
ودي عجلة ودي عربية
ودول حمير ودولا جمال؟
طب مش ده عمي ودية اختي
ودول صحابي وده كمال
طب مش ده شارعنا
وده بيتنا
ودي مراتي ودولا العيال
طب مش ده الوطن
وده المواطن
وده التاريخ اليل اتقال
طب ليه كل إما اروح مكان
وأسأل سؤال
يقولولي :
جايز .. يمكن .. إحتمال
cute gurl
Jul 30 2007, 02:55 PM
كميله
only_da_ana
Jul 30 2007, 11:54 PM
بســم الله الـرحمــن الرحيــم
السلام عليكــم ورحمـة الله وبركاتــة
بســـام
:
:
متابعة ان شاء الله
اكيد
فرحة
Jul 31 2007, 12:45 AM
متابعينك
Bassam
Aug 11 2007, 09:24 AM
منورين
rony
Aug 17 2007, 10:05 AM
لا بجد بجد كلامه جميل اوووووى
واجمل مافيه بساطته
تسمحلى يابسااام انى اتابع معاكم انا كمان
Bassam
Aug 17 2007, 11:38 AM
خلاص تدفعي اتنين جنيه وربع علي كل مرة اوك
كمنورة التوبيك يا روني
Bassam
Nov 3 2007, 08:27 AM
محدش عنده جديد ل علي سلامة
aries
Nov 18 2007, 01:59 PM
انا اول مره اقراله حاجه بس حلو قوي واسلوبه بسيط وخفيف
نزل تاني يابسام
Bassam
Nov 21 2007, 11:11 AM
شكرا يا شيرين علي مرورك
ربنا يسهل
Bassam
Nov 21 2007, 11:20 AM
شكرا يا شيرين علي مرورك
ربنا يسهل
Bassam
Nov 21 2007, 11:23 AM
مصر والكاميرون
بقول لهم مين اللى بيعيط بحرقة ده؟
قالوا لى مواطن أتصور وهو بينضرب
قلت لهم ومين الأمور اللى بيضحك ده؟
قالوا لى ده واحد عمل شوية كوارس وهرب
قلت لهم والدنيا عتمة هناك ليه؟
قالوا لى دى حتة جديدة بتتخرب
قلت لهم ومين الحاوى اللى بيتكلم ده؟
قالوا لى ده الوضع بيتقلب
وإيه الهيصة اللى فى الساحل الشمالى دى؟
قالوا دى البقرة بتتحلب
قلت لهم وأنتوا قلقلين كده ليه؟
قالوا لى أصل بنلاعب الكاميرون وخايفين نتغلب.
marawan
Nov 21 2007, 02:06 PM
السلام عليكــم ورحمـة الله وبركاتــة ،،
قلت لهم وأنتوا قلقلين كده ليه؟
قالوا لى أصل بنلاعب الكاميرون وخايفين نتغلب
عندهم حق
هو أصلاً في حاجة تقلِق
Bassam
Nov 21 2007, 02:50 PM
(( ارمي ...الساعه ))
بَوّابْة تَفتيش عَلَى بَابَكْ....
كُل ما احَاولْ أعَدَّى تَزَمَّرْ...
وبْتْشَرَّطْ...
وَبتْتْأمَّرْ...
أرَجَع أدَوَّرْ تَانى وأدُوَر...
وكُل ما عَدَّي بَرْضُهْ تزمَّرْ...
طَب آدى السَّاعَةْ...
Bassam
Jan 14 2008, 03:38 PM
علي باب سفارة كندا (إبليس)
على باب سفارة كندا
لمحت ابليس و ف ايده استماره
بقول له على فين
قاللي بص
يا هجره يا اعاره
يا عم زهقت كفرت
الاقيش معاك سيجاره
انا انتهيت خلاص
لا نافع وسواس ولا خناس
ولا ليا عيش وسط الناس
بقالي سنين عاطل
و انتوا بتعرفوا
تقلبوا الحق باطل
وتقتلوا القتيل
و تسلكوا القاتل
ومفيش مشاكل
يا عم ده انا بقيت أوسوس بالمقلوب
و أقول للحرامي كفايه بقى إنت مش هتوب
انت هاتعمل كل الذنوب لوحدك
و أنا ابليس
أشتغل واعظ
ولا كمساري ف اتوبيس
يا عم ده انا زمان
كنت استنى حد ينسى
يسمي وهو بياكل لقمته
دلوقتي كل اكلكم ملوث
و بصراحه الواحد خايف على صحته
ده مفيش ضمير اساسا
عشان اموته
و كل واحد بمزاجه
خربانه ذمته
يا عم ده كل حاجه اتسرقت
وكده الاجيال الجديده
م الحراميه اتظلمت
يا راجل ده من كتر ما لطشت معايا
خرجت ف مظاهره
مع الناس اللي بتقول كفايه
و برضه مفيش فايده
nome
Jan 15 2008, 01:23 AM
قاللي بص
يا هجره يا اعاره
يا عم زهقت كفرت
الاقيش معاك سيجاره
انا انتهيت خلاص
لا نافع وسواس ولا خناس
ولا ليا عيش وسط الناس
حتى ابليس زهق و عايز يهج
جارة القمر
Jan 15 2008, 12:07 PM
ما تكلملي ابليس يا ابيه
انا تعبت
Bassam
Jan 16 2008, 09:48 AM
حاضر
من عونيا
ومعاك تذكرتين كندا يا بيسو (مش برضه ده دلع ابليس)
Bassam
Jan 16 2008, 09:53 AM
معرفش ليه تنّحت للدنيا كده
فجأة لقيتني مسكون بالملل
لا عندي رغبة في البكا
ولا في الكلام
ولا عارف أنام
ولا حتى بسأل إيه ده إيه
و أخرتها إيه
و إيه العمل
و أخاف أقول لأي حد
أحسن يقوم يقلبها جد
حد صاحبي ينزعج
يمد إيده في قلبه من باب الكرم
عشان يشاركني الألم
أو يستلفلي من لئيم حبّة أمل
حالة كده .. معرفش إيه
حالة كده ملهاش معالم
ساعات تزورني في الربيع ..
في الحر ..
و في عز الشتا
و تجيب حاجات
لا فيها روح ولا ميتة
حاله كده ..
لا معاها تنفع كلمتين
ولا غنوتين ..
ولا لقطه من ألبوم صور
..ألاقى قلبى ف الهوا
ويا الكور
..أخاف اقول لأى حد
..أحسن يقوم يقلبها جد
..حاله كدة
.معرفش إيه
لكنى بطلع منها بعد السكات ..
فاهم شوية في اللي فات
حاسس أوي بحضن الصحاب ..
محظوظ أنا
ساعات أشاور
ينفتحلي ألف باب
لكنّي بغلط في الحساب
!!ومعرفش ليه
جارة القمر
Jan 16 2008, 10:02 AM
أخاف أقول لأي حد
أحسن يقوم يقلبها جد
حد صاحبي ينزعج
يمد إيده في قلبه من باب الكرم
عشان يشاركني الألم
جميله اوي دي يا بيسو
تعبير حلو فعلا
واه بيسو دلع ابليس
ودلع بسام برضه
