Gigi
Sep 3 2007, 03:09 AM
احنا طلعنا أنانيين جدا يا جماعه
بقالنا كام سنة عمالين نقول عايزين وعايزين وعايزين
عايزين ديمقراطية وحرية ونشتغل وناكل ونشرب ونجيب ونشتري ونعمل
صحيح دي حقوقنا فى بلدنا بس لو كانت ظروف بلدنا صعبة
من حكم فاشي وموارد مسروقة وثروات منهوبة الى آآآآخره
عندها شباب وبنات كتير كلهم كبروا وبيدوروا علي حقوقهم
بس محدش فكر فى مصر ، محدش فكر هي مصر محتاجة ايه علشان تبقي فعلا دولة متقدمة؟
لية كلنا زعلانين من مصر وبص لنفسنا ومش بندور عليها
محدش فكر هي محتاجه اية كمان مننا زي اى أم ما بتحتاج منها؟
انا فكرت في الموضوع ده ... وسالت نفسي ، هي مصر محتاجة ايه يا عمرو علشان تبقي دولة متقدمة؟
1-
مصر محتاجة ادارة صادقة مش حرامية ونصابين
2-
الادارة ديه تحط خطط حقيقة بصدق وامانه فعلا لخدمة الشعب الفقير ده مش لخدمة المستثمرين ورجال الاعمال
ومحتاجة لسياسات لخدمة الناس وتحسين معيشتهم ، مواصلاتهم ، مساكنهم ، احتياجاتهم الاساسية البسيطة جدا
وبدل ما مواردنا المحدوده تروح للفنانين والرقاصين ولاعيبه الكوره ، تروح للناس الغلابة و المحتاجين فعلا
الناس دول محتاجين حاجات بسيطة اوووي ، محتاجين رعاية , محتجين اهتمام
3-
مصر محتاجة شبابها يشارك في بناها، عمل من نار ، علم وابتكار
اخلاق وتسامح ، إيمان بالله وعزيمة , محبه بين كل افراد الشعب ، تكافل بينا وبين بعض
ثبات على مبادئنا واخلاقنا الحلوة بدل من تغريب المبادئ
4-
مصر محتاجة عدل وحق ، مصر محتاجة الكفاءات الحقيقية ، مش الواسطة والمحسوبية
تفتكروا مصر محتاجة ايه تاني؟
يلا قولولى ردودكم
عاشق الساهر
Sep 3 2007, 03:33 AM
مصر محتاجه ولد بس الولد مش فاضى
بينى وبينك بقى
لما ابقى الاقى مصر
بتراعى شبابها
ومحدش بيفكر يسبها ويطفش من الخنقه والضيق اللى بنشوفهم
وان كل واحد بياخد حقه
ومحدش بيجور على حق حد من الحرمان اللى بنشوفه
ابقى اشوفها عاوزه ايه
واعملهولها
Nostolgia to Love
Sep 3 2007, 08:06 AM
مصر محتاجة صدق وأمانة وحب
صدق في معاملاتنا
أمانة في مشاعرنا
وحب يكون خالص لوجه الله تعالى
ولو تلاحظوا الي مصر عايزاه
مش عايزاه ليها
عايزاه لأولادها
الي هي محتاجة ليها
إن نتقي الله فيها
شكرا على الموضوع يا جي جي
marawan
Sep 3 2007, 08:55 AM
السلام عليكــم ورحمـة الله وبركاتــة ،،
اذيك يا Gigi
عارفة يا جيجي
المفروض قبل ما نشوف مصر عايزة ايه
و محتاجة ايه عشان تكون دولة متقدمة
او عشان تبقي دولة زي باقي الدول
اللي ممكن نقول عليها دول بجد
قبل كل دة
لازم نسأل نفسنا سؤال
سؤال مهم اوي
السؤال دة بكل بساطة
هي ايه مصر ؟؟
مصر هية الحكومة
و لا مصر هية مبارك
و لا مصر هية الحزب الوطني و الاخوان
و لا مصر هية الناس اللي عايشين فيها
و لا مصر عبد الوهاب و ام كلثوم
و لا مصر هية النيل و الهرم
وا القلعة و البرج
و مكتبة اسكندرية و قلعة قايتباي
و الاقصر و اسوان و شرم الشيخ و الغردقة
و لا مصر هية ايه بالظبط ؟؟!!!!!!!!!!
تعرفي ان اي واحد تحصل له مشكلة في اي حاجة في حياته
يقولك الله يخرب بيت البلد
ادي البلد و اللي بناخده منها
هية البلد عملتلنا ايه غير كدة
مصر دي عمر ما حالها هينصلح
دي بلد بنت .......................
و يقعد يلعن ويسبب في مصر و اللي جابوها
تعرفي
احنا محتاجين اننا نفرق بين حاجتين مهمين اوي
محتاجين نفرق بين مصر
و بين الناس اللي عايشين فيها
لو مرة موظف كشر في وشك و مخلصش ورقك
صدقني مصر ملهاش ذنب
لو لقيت انك متفوق جدا
و معاك شهادة جامعية محترمة
و قاعد ع القهوة
مش مصر اللي قعدتك ع القهوة
لو بصيت و لاقيت مصر من اكثر البلاد فقرا علي مستوي العالم
و متوسط مستوي دخل الفرد فيها لا يزيد عن دولار يوميا
صدقني مش مصر اللي سرقتني و سرقتك
لو نزلت الشارع و لاقيت الزبالة في كل مكان
صدقني مش مصر هية اللي رمتها
لو لاقيت المجاري ضاربة في الشارع
اللي انت اصلا مش عارف تمشي فيه من كتر المطبات
صدقني مش مصر هية اللي كسرت الماسورة
لو لقيت كيلو اللحمة ب 40 جنية
و رغيف العيش مينفعش يتاكل
صدقني مصر ملهاش ذنب
لو لقيت الناس المحترمة بيتقبض عليها و بيتلفق لها تهم
و الحرامية بيتمتعوا بفلوسي و فلوسك
صدقني مش مصر اللي سجنته و نهبتك
لو لقيت البني ادم المصري جوة بلده
ارخص من اي حاجة في الدنيا
صدقني مش مصر هية اللي رخصتك
من الاخر
يا جماعة بكل بساطة
مش دي مصر
للاسف اللي عايشين فيها و مسئولين عنها
همة السبب في الواقع المقرف اللي احنا بنعيشه
لازم نبطل نخلط بين الامور و نسميها بغير مسمياتها
تيجي كدة نسأل مصر
نسألها و نقول لها
انتي راضية عن اللي بيحصل لك دة ؟؟
بيتهألي مش هتكون راضية
كفاية ظلم
لو مصر دي كانت بني ادم
كانت سابتنا و طفشت من زمان
MARO
Shahinaz Mustafa
Sep 3 2007, 09:26 AM
هى حاجة واحدة محتجاها مصر
وحتجها الشباب
(الاسلام )
ماقدرش اقول اكتر من كدا
Gigi
Sep 3 2007, 02:54 PM
شكرا يا جماعة على المرور
وانا متهيألى كده مصر مش هتتغير الا لما احنا نتغير الاول
Memonesta
Sep 29 2007, 03:40 AM
مبدئيا...
موضوع غاية في الواقعية..
وانتي فعلا رائعة يا جيجي..
ثانيا
إقتباس
لو مصر دي كانت بني ادم
كانت سابتنا و طفشت من زمان
مروان...
أنت أستاذ ورئيس قسم..
لو مصر فعلا كانت بني آدم كانت طفشت فعلا..
مصر مالهاش دعوة...
مصر مش أكتر من أرض احنا عايشين عليها..
وأنا واثق أنها - زيها زي بقية الأرض - كل يوم بتدعي ربنا أنها تبلعنا وماتبقيش حد منا..
ومش هاقول أكتر من اللي قالته روح الإسلام..
إقتباس
(الاسلام )
تسلم ايدك يا جيجي..
Gigi
Sep 29 2007, 03:47 AM
شكرا على المرور يا ميمونستا
Bassam
Dec 24 2007, 09:49 PM
يعني بإختصار رخم جدا
مصر محتاجة كل واحد يعمل شغله صح وبعدين يتكلم
مش يتكلم الاول وبعدين يشتغل (لانه عمره ما هيعمل حاجة "الكلام ")
وراجع تاني
classic
Dec 24 2007, 11:06 PM
مصر محتاجه اخلاق
صحيح محتاجه اسلام
بس خلى بالكم ان فى ديانات تانية معانا ف مصر
واعتقد الأخلاق موجوده ف كل الديانات
لما يكون عندنا أخلاق
هنتقن عملنا
مفيش واسطه
فى امانه فى اخلاص
فى كل الحاجات دى واعتقد لو موجوده الحاجات دى
مصر هتكون احسن
وساعتها لو قصرت نبقى نطلب منها اللى احنا عايزينه
تسلم ايدك يا جيجى موضوع جميل ومهم
العقرب
Dec 24 2007, 11:41 PM
انا مع كلاسيك فى كلامها
فعلا يا جماعة مصر نسيت الاسلام و دة باين اوى
و انا من لرائيى
مصر محتاجة قنبلة زرية و نخلص من وجع القلب دة
Gigi
Dec 25 2007, 12:38 AM
إقتباس
مصر محتاجة كل واحد يعمل شغله صح وبعدين يتكلم
انا معاك جدا يا بسام والله بس خلى بالك لما يكون فيه شغل الاول
نورتنى والله ومستنياك تانى
وبجد يا كلاسيك انتى فعلا جبتى من الاخر لو فيه اخلاق هيندرج تحتها حاجات كتير اوى ومهمة جدا بس المشكلة فعلا انى بقيت الاحظ ان مسألة الاخلاق ده بقت مسألة نسبية
مشكورة يا يويو على الرد
منورنى دايما ياعقرب تسلم