من شباك القطر
الشمس لابسة مريلة المدرسة المكوية
وشايلة السندوتشات والزمزمية وكراسة الأحلام الجديدة
وهي طالعة من ورا بيوت الفلاحين
والسحاب القطيفة
والجبل النحاس
من شباك القطر
مرت جنينة ياسمين
لمست خدي
وريحتها ملت الدنيا
ودخلت جوا الشنطة واتلخبطت مع الهدوم
والفلوس والتذاكر وعلب الأسبرين
من شباك القطر
ولد صغير بص لي
كان بيلعب
وهو داخل يشوط ضربة جزاء
ابتسامته خلتني أبتسم
بس يا خسارة
مشي القطر قبل ما أعرف
هو جابها جون ولا لأ
من شباك القطر
عربيات كتير محشورين
قصاد المزلقان
وتكشيرة غامقة ملخبطة ملامحهم
كإنهم ضل ناس مبسوطة رايحة الشغل
ضحكت لما اكتشفت
إنهم مستنيين " سعادتي " لحد ما أخلص فرجة
وأعدي
من شباك القطر
النيل لسة بيجري عادي
تحت الكوبري
ولسة لونه أزرق
كإن مفيش حاجة اتغيرت
كإن مكنش فيه اتنين
ماسكين إيد بعض تحت المطر
والدنيا تلج
ولا كإن فيه ولد شاعر
في صدره برد
وحنين
رمى في الميه قصيدة جديدة
كان المفروض تقراها
البنت اللي لابسة نضارة
ونومها خفيف
ومش بتحب فيروز
من شباك القطر
الشمس العجوزة اللي عندها يوم
لابسة بالطو تقيل
وماسكة كباية الشاي الفاضية
وقلم مافيهوش حبر
اكتشفت إن أنا مع إني مسافر لوحدي
والمسافة طويلة
والتكييف ساقع
والموبايل مش بيرن
كان فيه حاجة محسساني بالدفا
من شباك القطر
سرحت
قلت لو الدنيا بقت ضلمة
حابطل أبص
عشان ما أشوفش وشي وأنا صاحي من الحب
فكرة جت في دماغي
خلتني أغمض قوي
وخلتني ألف نفسي في الجاكيت
وإحساس صعب
كإن كل الشبابيك اتفتحت على البرد برة
ياربي
كنت أعمل إيه
لو القطر
مافيهوش شباك
