السلام عليكــم ورحمـة الله وبركاتــة ،،


اسعد الله اوقاتكم فى كل مكان اخوانى اخواتى الاعزاء

أتكلم اليوم فى موضوع شغَلَ بالى وارجو منكم ان توسعوا صدوركم لى


ايه الكلام الكبير ده يا عم كلمنا عربى

ببساطه يا جماعه بدون فلسفه ولا فزلكه


انا هتكلم فـموضوع شغلنى او موقف حصل وبيحصل كل يوم

كتير جدا بنشوف كهل كبير او سيده عجوز بتعدى الطريق

ربنا يقدر الجميع طبعا اى حد بيحاول يساعده او يساعدها على تعدية الطريق

او فى لحظات تانيه وانت فى مكان عام بتشوف راجل كبير بتشوفه بتفتكر شعب مصر بطبيعته بطيبته بنقاءه

شعب مصر الاصيل بدون اى تحريف او تعديل

من شهر او شهر ونص جدتى ماتت

ربنا يرحمها ان شاء الله ويكون مكانها الفردوس الاعلى بإذن الرحمن الرحيم

بعيد عن انها كانت ست كبيره او انها كانت محبوبه او او كانت بالنسبه ليا ايه او كنت بحبها قد ايه

بس بعد ماعديت من الموضوع على خير الحمد لله

بصيت لقيت انى من يوم ماوعيت على الدنيا وهى موجوده وابدًا ماتخيلتش فى يوم انى ماشوفهاش او كده

بس انا لله وانا اليه راجعون

طبعا الموت علينا حق

بس انا بقول الكلام ده مش من باب الفضفضه او كده

بقول الكلام ده وبسأل سؤال هل الناس دى هنشوفها تانى


( هو الواده اتجنن ولا ايه )


لاء قصدى هيبقى فى الاجيال اللى جايه حد بطيبة وأصالة وحكمة الناس دى

الرجل العجوز اللى فى ملامحه كل معنى لكلمة مصرى

هنشوفهم الناس دى تانى

طيب مع انحلال الاخلاق وسياسة نفسى نفسى

هنلاقى فى المستقبل الشاب اللى يقوم لست كبيره تقعد ويستحمل هو

هل البنت اللى بنشوفها النهارده بتستغل كل مفتنها ومظاهر انوثتها ومش مراعيه اى حاجه

هل البنت دى هتكون بكره الست الكبيره الطيبه

على طول لما الناس الحلوه دى تموت وده لازم يحصل طبيعة الحياة بنقول ياسلام على الناس اللى مش هيجى زيها تانى

لو فيه واحد كويس بنلاقى عشره مش كويسين

لو فيه واحد مهتم هنلاقى عشرين عنده لا مبالاه

هل الناس دى هتربى اجيال بعد كده


انا عادةً بيكون كلامى بينى وبين نفسى لكن الواحد ساعات بيحب يشوف ايه راى الناس فى اللى بيدور حواليهم

انا اصلا مكنتش هكتب لولا حوده باشا ميمو نيستا قالى ماتكسلش

وقريب هتشوفوا موضوع تانى اسمه

ثورة الجياع

بس حبيت ابدأ بحاجه لذيذه كده الاول