بسم الله الرحمن الرحيم
من منطلق المحبة في الله أكتب هذه الكلمات وأسأل الله تعالى أن ينفع بها وأن يجعلها خالصة لوجهه تعالى
أنا قلبي تعبان وبحس كتير اني زهقان ومش فرحان
وأحيانا أذهب لاماكن تانيه عشان أغير جو بس برجع زي ما أنا مش عارف ليه ولا اعمل ايه قرفان من الحياه ومن كل حاجه ؟
أنا أقول لك ليه يمكن نفسك تبقى غني ومعاك فلوس كتير عشان تعمل كل اللي نفسك فيه وتحقق احلامك ؟
طيب ما هو في ناس كتير ومشاهير أجانب وعرب أصحاب ملايين وبرضه مش سعداء وسمعنا عن ناس مشاهير وغنيين انتحروا لانهم مش حاسين بسعاده
يبقى المال مش هو الحل و مع وجود الحاجه اليه وضروريته
طيب يمكن نفسك تتجوز وترتاح وتفرح ؟؟
هو صحيح الزواج بيفرح وبيجيب سعادة وله فوائد كتيرة بس كتير متزوجين ولم يجدوا السعادة اللي كانوا بيحلموا بيها وكمان الزواج بداية لاتعاب كثيرة وليس نهايه
إزاي يعني ؟ يعني مثلا ييجي الحمل وقرفه ووحم الزوجة والمتابعة عند الدكاترة والعلاج والولادة وتوابعها
والأولاد وامراضهم ومصاريفهم وتربيتهم وتفضل شايل همومهم طول ما انت عايش
يعني ايه منتجوزش ولا ايه ؟
لأ أقصد أن ده مش الحل النهائي لقلبك واللي هيجيب لك السعاده والراحه النفسية
وفي ناس كتير جربوا الشهرة والمال والنساء وكل انواع الرفاهيه ولم يشعروا بسعادة
يمكن عايز احب واتحب واسمع كلام حلو ؟
طيب هتحب وتتحب وتسمع احل كلام وهتعمل كل اللي نفسك فيه
وبرضه هتحس ان قلبك تعبان وانك بتعمل حاجة غلط ومش حلال
انتي عايزه تقولي ايه خلصينا رفعتي ضغطي ايه ده
يعني الحق عليه عايهز اعرفك الطريق الصح طيب خلاص
اسمع قلبك ده ربنا خلقه على الفطرة يعني ايه يعني خلقه عشان يحبه هو ويتملى بحبه وينعم بذكرة وهو ده حياته وغذاؤه ومن غيره مهما راح وجه هيفضل تعبان ومريض لانه دايما هيحس انه جعان ومهمه حطيت له غير غذاؤه ده هيفضل مريض وصاحبه تعبان
في ناس كتير أسلموا وقالوا كده دورنا كتير على السعاده ولم نجدها الا في الاسلام والممثلين التايبين قالوا لم نشعر بسعاده الا لما عرفنا ربنا لان القلب وجد الغذاء بتاعه اللي ربنا خلقه عشانه
طيب أنا لما بسمع قران او موعظه مش بتاثر ومش عايز أسمع
لأن القلب عليه طبقه غليظه بسبب المعاصي هي اللي بتعمل كدة لان الرسول قال في معناه ان كل معصيه بتعمل نقطه سوداء شوف كم نقطه على قلبك (كلا بل ران على قلوبهم ما كانو يكسبون )(افلا يتدبرون القران ام على قلوب اقفالها )
والطبقه دي لازم لها مجهود عشان تتشال مجهود من الدعاء والاستغفار وترك المعاصي
( الذين جاهدوا فينا لنهدينهم سبلنا )مينفعش نقول رنا يهدينا وخلاص لازم نبذل مجهود ولما يلاقي منك الصدق هيهديك وهيعينك ويعرفك طريقه وهتحس بسعاده كبيرة اوي حقيقية
الانسان لما يلاقي نفسة بيقرأ ومش بيعمل حاجة وبيكتفي بقول ممتاز ورائع وجامد لا مينفعش أبدا
علامة ايمانك انك تطبق وتنفذ على طول (انما كان قول المؤمنين إذا دعوا الى الله ورسوله أن يقولوا سمعنا وأطعنا )
شوف انت مؤمن ولا لأ ؟القلب اللي ميحبش الموعظة ولا أوامر ربه يبقى مريض ولازم يتعالج
بكثرة الاستغفار بالدعاء بترك المعاصي فورا
ابعد عنك الحاجات اللي بتحارب قربك من ربك زي الدش والفضائيات والغناء ومشاهدة المحرمات
بس أنا لسة شباب وعايز أفرح بشبابي
يا سيدي انت ضامن انك تعيش ده الموت بياخد الشباب اكثر من العجائز والقلب المؤمن عمره ميفرح بمعصيه ابدا
أفرح بنعم الله الكثيرة عليك (قل بفضل الله وبرحمته فبذلك فليفرحو هو خير مما يجمعون )
بس بحب أكلم بنات وبفرح بكلامهم وردودهم
من ترك شيئا لله عوضه الله خيرا منه
(ومن ترك النظر لله أبدله حلاوة يعرفها في قلبه )ودي لذتها اضعاف لذة الكلام مع البنات
امنع المحرم عشان الحلال ولذة الايمان احلى بكتير اوي لمن جربها
وأخيرا قال تعالى (وأما من خاف مقام ربه ونهى النفس عن الهوى
فإن الجنة هي المأوى )
و
(وأما من اثر الحياة الدنيا فإن الجحيم هي المأوى )
هيا خلينا نغير حياتنا ونشيل منها كل اللي بيسبب لنا التعاسه ويبعدنا عن السعاده
خليك قوي الارادة تغلب على نفسك وشيطانك واستعن بالله فهو ارحم بنا من أنفسنا
وأسفه على الاطالة فهي من محبة الخير للجميع
والسلام عليكم ورحمة الله وبركاته
