إنتـظـــــــــــرونا وحلقة ضرب ناااااااااااار

مع عضوة متألقة فى الفترة الأخيرة وواحده من نجوم حلمنا قديماً وحديثاً





^
^











^
^








ما قلنا إنتظــــــــــــــــــــــــــرونا

ههههههههههههههههههههه جتله ضربة شمس من كتر الانتظار

ننتظر اهو

ده الطبيعـــى يا سلمى انك لازم تكونى أول المنتظرين

مقتطفات من الحوار ::



*وفاكرة برده لما كنا صغيرين جالنا حصبة وعدينا بعض وبقيت انا واخواتي في السرير ووشنا كلنا منقظ بنفسجي

*كنت بهرب من الفصل واروح اعد في فصول اخواتي

*وانا بحب جدا السياسة والعلاقات الدولية .. يعني الحمدلله اني درستها
مع اني قبل ما ادخلها مكنتش بتفرج على نشرة اخبار واحده


*بعد 11 سبتمبر بان عدائية جامدة اوي ضد المسلمين
بقت المعاملة جافة ودايما في نظرات

*ممكن ان الاحلام بدل ما كانت بالعربي بقت بالانجليزي مثلا خصوصا ايام الامتحانات بتخانق في قضايا سياسية بالانجليزي

* الغربة دي خلتني اتمسك اكتر بالعادات والدين
وعشان كده انا لاجئة دائمة على حلمنا

*لاني كنت بدور دايما على صحابات مسلمات

*وليه ميكونش اني وش الخير على الجزيرة
وبعدين يعني هو انا كنت اخر عضو سجل ولا ايه
وبعدين عرفت منين

*ماشي يا اسامة والله لتشوف

*ال يعني انت جربته (والله ما يعرف حاجة يجماعة ومبيعرفش يعمل شوربه)

*هو طبعا اتمنى اعيش في مصر بس المشكلة اني متعودة اكتر على تركيا وانجلترا
يعني دول اللي فاكراهم اكتر واللي خدت عليهم اكتر

*ليه يا متمرد بس هو انا فاشلة فيه بجد ولا ايه

*شايفاها مفيهاش ذرة ديمقراظية ..حكومة عسكرية واستبدادية وفاسدة
(ههههههه بتخبط فى الحكومة ...وانا مالى )

*والله سيسو ليه عندي معزة خاصة .. كفاية انه بيستحملني ويكلمني كان مفيش حاجة حصلت ويراضيني

*. وناس كتير اوي بس مش هقدر افتكر الكل فسامحوني بس اتاكدو من غلاوتكم عندي

وبحب بيبو تعمللي محشي

هههههههههه

أنا عرفت

عرفت


بس مش هاقووووووووووووول

ياللا مستني أهه عايز أشوف أنا صح ولا غلط

طبعاً بجد كلكو منوُرين الحلقة اللى بتمنى انها تحوز إعجابكم على قدر مجهودنا لإخراجها بالشكل ده ..
وهــى مع عضوة بالفعل تستحق ان تكون إحدى نجمات البرنامج أثرت فى حلمنا قديماً ولا زالت ..
مش هتكلم كتير عنُها بس من خلال الحلقة هتعرفوا عنها الكتير ...



والان نزيح الستــار عن الحوار الرابع من برنامج

حِـــــــوار عــ نار هادية





الحلقة إعداد وتقديم وإخراج ..المتمـــ osama ــرد


ضيف الحلقة ..Salma


شكــــــــر خاص لنجم الفوتوشوب .. tograa


الحلقة فقط وحصرياً لحلمنا دوت كوم



^
^

ازيكم يا حلماوية ...النهارده ضيفتنا عـ نار هادية عضوة جميلة ومحبوبة
من الناس اللى بدأو مع حلمنا من البداية غابت كتير بس رجعتلنا بكل قوة
واحده من أهم وأنشط الأعضاء فى الفترة الأخيرة
مش هتكلم عنها كتير بس هنعرف منها عنها الكتير




سلمـــى أهلا بيكى وحوار عـ نار هادية

اهلا بيك وبيكم كلكم



لو بدأت معاكى بسؤال يقربنا منك شوية وقلتلك بطاقتك الشخصية فيها ايه ؟

بصراحة معنديش بطاقة شخصية



معندكيش بطاقة شخصية ازاى ماشية ببطاقة بنت خالتك

ههههههههههههههه والله ماعندي بطاقة.. احب امشي مجهوله كده عشان اي جريمة متتسجلش



طيب قوليلى اسمك وسنك وعنوانك

سلمى- 23 سنة - لندن
ورقم 3 فى العيلة


مولوده فى لندن ولا عايشه فيها

لا عايشة فيها, مولوده في مصر




اتولدتى فين فى مصر ويا ترى طفولتك لسه بتفتكرى منها حاجه ولا بتحمدى ربنا انك نسيتيها ؟

لا طبعا فاكراها ودي تتنسي برده دي احلى ايام
اتولدت في القاهره
بس انا لو هفتكر من الطفولة مش هنخلص

لا احكيلنا فضايح الطفولة ...سامعينك

اول حاجة من طفولة الطفولة في مشهد مش ممكن انساه ومش عارفه ازاي فاكراه سبحان الله
المشهد ده ان مامتي كانت شايلاني نايمة على ايدها وبابايا ماشي جنبها وانا شايفاه طوييييييييييييييييل اوي
ومش فاكره الباقي

غير كده كنت شقية جداااااااااا بطريقة مش طبيعية.. كنت جرئية جدا وكل مانروح البحر احبي على ايديا
وادخل المية ومامتي تجري ورايا وكنت باخد كل حاجة بالدراع ..كنت قوية ومفترية

ولما كبرت شوية كنت بركب العجلة في الشارع واتسابق بيها واعدي بين العربيات
وفاكرة برده لما كنا صغيرين جالنا حصبة وعدينا بعض وبقيت انا واخواتي في السرير ووشنا كلنا منقظ بنفسجي

مبتدحكش ليه

انا ميت ع نفسى من الضحك ....كملى كملى

وكنت انا وجارتنا اسمها سارة كل يوم مع بعض
كل يوم ننزل متصاحبين ونرجع متخانقين .. لا ومين اللي كان دايما يعلق.. مرات البواب
بس طبعا بحبها اوي .. زي القطط منحبش الا خناقنا



يعنى عشتى طفولة مجنونة

جداااااااا مرة لاقيت واحد لابس بدلة كجلي افترته ابويا مسكت في ايده ومشيت

واول يوم في الحضانة ده كان مسخرررررررة
اعدت اعييييييييط واصررررررررخ ..اهبد في بيبان السرفيس واوقل نزلوني
من الدوشة اللي عملتها واحد معدي معرفوش جه وقالي لو مسكتيش هجيبلك دكتور يديكي حقنة..
انا طبعا ازبهليت ثانيتين كده ورجعت تاني اكمل المقطوعة
ومكنتش بحضر حضانة دي اصلا كنت بهرب من الفصل واروح اعد في فصول اخواتي
ومامتي مرة جاية تسال عليا فالابله نادي في حد هنا اسمه سلمى
وكنت بكره الحضانة دي كرة مش طبيعييييييييييييي كل ما اهرب ويحصل يعني انهم يقفشوني
تيجي دادتين ويمسكوني وانا احاول افلفص ..مش عارفة ليه التعذيب ده

وبرده وانا في حضانة جاتلي الصفرا وكنت بتربط في السرير

وكان في اكل ممنوع اكله.. وياوييييييييييييييلهم يا سواد ليلهم لو شميت الاكل ده
حتى لو في سابع نومة
كفاية باه مش عارفة ابطل دحك


مش لوحدك بجد طفولة مسخرة ووالله ما قادر أمسك نفسى

ولا انا وفي لسسسسسسسه كتير

طيب قولى

كنت جرئية لدرجة مميتة ..قررت اتعلم السباحة فنطيت في حمام السباحة بتاع الكبار
ومش عارفة اعوم طبعا بس الحمدلله لسه عايشة

مرة بردو خدنا بابايا محل جاتوه راقي اوي وكبير وسبليه باه وبتاع
وانا يقولولي عايزة ايه وانا اعيط واصرخ
واقول عايزة خييااااااااااااااااااااااااااااار



لو سبت الخيار وفضايح الطفولة دى أصلى ممكن منكملش الحلقة من كتر الضحك
وسألتك عن أسرتك ومدى تأثيرهم على حياتك

احنا ماشاء الله سبع اولاد واب وام
وهما كل حاجة ليا
وبسبب ظروف الغربة والتنقل الكتير بقينا كلنا اصحاب بعض
ومنقدرش نبعد عن بعض ومش بنثق في حد اد ما بنثق في بعض الحمدلله



ربنا يخليهمك ....تعليمك كملتيه فى مصر ولا فى لندن

.. حضانه وابتدائي في مصر - اعدادي في تركيا- ثانوي وكليه في لندن




مدى الإختلاف بين ال 3 دول فى مرحلة التعليم وايهم استفدتى منه أكتر واستمتعتى بفترة التعليم فيه

اممممممم
حضانة طبعا مستفدتش حاجة لاني هرباناها كلها
ابتدائي يعني اعدادي كان جميل جداااا كان بجد اجمل ايام وثانوي كان نص نص كان ملخبط شوية
عشان نظام تاني خالص يعني مستفتدش من التعليم.. انا اللي افادته


افدتيه ازاى

انه اتعرف عليا .. بهزر حضرتك



اكيد بتهزرى لان ده من سوء حظه
ههههههههههههه المهم عبرنا الحدود



كلية ايه ... وكانت حلمك ولا هروب الحضانه كمل معاكى فكنتى بتدخلى اى حاجه

سياسة وعلاقات دولية
انا من اعدادي كنت بحب الدراسة جدا وبستمتع بيها جدا وكنت يا اجي الاولى يا التانية

لما كنت في مصر كنت عايزة ابقى دكتورة اوي
وكان ممكن ابقى دكتورة لاني الحمدلله عنيدة
بس اللخبطة اللي حصلت وممكن تكون حصلت عشان خير
خليتني ابعد خالص عن موضوع الطب
وانا بحب جدا السياسة والعلاقات الدولية .. يعني الحمدلله اني درستها
مع اني قبل ما ادخلها مكنتش بتفرج على نشرة اخبار واحده




ايه اللخبطة اللى حصلت وخلتك تبعدى عن الطب

بعد الثانوي في حاجة اسمها A levels
زي تمهيدي كده بعد ثانوي كل واحد بياخد مواد معينة كامؤشر على يقدر يدخل في ايه
انا مكنتش عارفة وكنت حابة اجرب حاجات جديدة فخدت بيزنس وميديا وادب انجليزي و اي تي
فطبعا مش هدخل طب ولا ايه


اكيد او تدخلى طب فى الادب الانجليزى

ممكن برده



سلمى لو سافرنا معاكى لندن حيث العالم الغربى .... وبينتيلى الصورة للمسلمين فى لندن
وكيفية التعامل معهم ونظرة الغرب لهم هتقولى ايه

فيهم المسلمين اوي الصح يعني اللي بيعرفوا يدو صورة كويسة عن الاسلام
وفيهم التخلي او بيتهرب من انه مسلم وبيتصرف زي المش مسلمين
ممم هو مفيش كلام مباشر او عنصرية مباشرة ممكن تحصل كتير بس معروف ان مش بيحبوا المسلمين
ولو ماقالوش بس الجاليه المسلمة تظل ليها وزنها هنا وعددها كبير اوي



التعامل مع المسلمين قبل وبعد 11 سبتمبر ....هل كان فى اختلاف

بعد 11 سبتمبر بان عدائية جامدة اوي ضد المسلمين بقت المعاملة جافة ودايما في نظرات وكده يعني
طبعا اللي يختلف ان هنا في يهود كتير جدااااااااااااا عكس اي بلد عربية وبتقبى مضطر تتعامل مع الكل



مممممممم طيب لو سألتك عن سلمى فتاة مسلمة مصرية مدى تاثير العالم الغربى
عليكى ويا ترى لسه بتحتفظى بتقاليدك الاسلاميه ومن ثم العربية

هو اكيد ليه تاثيبره بس يعني مش انا اللي اقول ..ممكن ان الاحلام بدل ما كانت بالعربي بقت بالانجليزي مثلا
خصوصا ايام الامتحانات بتخانق في قضايا سياسية بالانجليزي ههههههههه

لا بص بجد
اكيد اثر فيا بس انا مش شايفه انه تاثير سلبي لاني لما نزلت مصر ومحدش يزعل مني
حسيت ان الحجاب نفسه اتغير كتير اوي واخلاق كتيرة اتغيرت ودخلت حاجات كتير بقت عادي عندنا
فممكن الغربة دي خلتني اتمسك اكتر بالعادات والدين وعشان كده انا لاجئة دائمة على حلمنا
وبحب دايما اتعرف على مصريين .. بس كمان على فكرة وجود الناس الكتير اوي من ثقافات مختلفه
وجنسيات مختلفة واني اشوف اد ايه مثلا اليهود متدينيين بولع الله وابقى عايزة نكون متدينين اكتر منهم
مواظبة المسحين مثلا على صلاة يوم الحد طب هما مفتخرين اوي بدينهم ومش مكسوفين احنا اولى نكون كده




أكيد احنا اولى ....طيب قبل ماسيب العالم الغربى قوليلى بمناسبة الحجاب مدى تقبلهم ليه
ومدى تأثيره فى شكل التعامل معكى عن قرب

لازم يتقبلوه مش بكيفهم هو
اما تقبلهم ليه فمعرفش
مسالتش بس يعني محدش كلمني عليه او علق , بالعكس انا بحس ان كل ما اتغطينا اكتر كل ما احترمونا اكتر
يبني بقولك الستات اليهود يااما يغطوا شعرهم ببونية ..يا يلبسوا باروكة وملابس طويلة للارض وفضفاضة
والرجاله كل واحد بلحية اد كده ومحدش بيقولهم حاجة اشمعنا احنا يعني



(هذا هو نبي الإسلام أيها الغربيون )موضوع ليكى قديم عـ حلمنا حسيت انك نفسك من خلاله تعرفى الغرب الاثم
من هو المصطفى ..طيب بعد مندمجتى وعشتى وسطهم يا ترى قدرتى تقوليها

لا
لاني كنت بدور دايما على صحابات مسلمات بس اكيد تصرفاتنا واخلاقنا بتقول ايه الاسلام
يعني مش هنتبع نبي (وحش في نظرهم) ونكون احنا حلوين ..ولا ايه
استغفر الله يعني






لو سبنا حياتك فى اوروبا ودخلنا شوية لعالم النت
لاجئة اون لاين النت بيمثلك ايه

هههههههههههه طريقة اتصالي بمصر
دراستي عليه والابحاث كلها عليه
ممم يعني لو عايزة اوصل لحاجة بدخل النت واجيبها بيسهلي حاجات كتير يعني
مش بيوصلني بمصر بس بيوصلني بكل مكان بس بمصر بالذات




وحلمنا ملوش مكان عندك فى أولوياتك ع النت

حلمنا ده تربيتي
بجد عشت معاه من 2003 لحد دلوقتي .. ربنا يديم المعروف
وهو طبعا اللي من خلاله اتعرفت عليكم كلكم وبجد حسيت اني وسط اخواتي
ربنا يخليكم ليا

يا رب يخلينا ليكى

عرفتى حلمنا ازاى وازاى وصلت درجة الحب ده اللى انا شايفها فيكى للمكان ده

لما كنت في دقدق وقفل وابتدى حلمنا كنت اتعرفت على سمسومة وريمي
وريمي ايدتني لينك حلمنا وفضلت فيه .. وحبي ليه ده عشان انا بحسة بتاعي بيتي جزيرتي



دقدق المدقدق ...حلمنا ايه الاختلاف وحابه مين اكتر

الحق يقال حاسة ان في فرق كبير
دقدق مع اني مقعدتش فيه فترة طويلة بس كان منتدى زي العسل .. وكووووووول الناس قريبة من بعضها
وبيحبوا بعض وكان نشيط جداااااا يعني بحس ان روح دقدق كانت احلىوكل عمارة كانت جميلة بجد
يعني لو قلتوا نرجع دقدق ولا نسيب حلمنا هقول نرجع لايام دقدق



عرفت انك مكملتيش شهر فى دقدق وقفل ....تفسرى ده بانك نحس على دقدق

ههههههههههههههههههههه وليه ميكونش اني وش الخير على الجزيرة
وبعدين يعني هو انا كنت اخر عضو سجل ولا ايه
وبعدين عرفت منين يا رخم انت



دى أسرار مينفعش الضيف يسأل عنها

هعرف برده



طيب لحد ما تعرفى قوليلى حلمنا ضافلك ولا اخد منك

ضافلي واخد مني
ضافلي معلومات كتيرة وضافلي اصدقاء كتار واخدهم مني


اخدهم منك ازاى

يعني في اصدقاء كتير مشيو بسبب مشاكل كانت على حلمنا
ودلوقتي تقريبا مبلاقيش حد منهم الا قليل اوي



مين اقرب ناس ليكى ع حلمنا

(سمسومة او ويذاوت فير, وسيكريت,مورفيوس,ريمي,طماطماية,دارك ديفل,ساحرة القلوب,
د.بيبو,موني.وبسام والمتمرد وجارة القمر)
وناس كتير اوي بس مش هقدر افتكر الكل فسامحوني بس اتاكدو من غلاوتكم عندي




ايه اكتر موضوع عجبتك فكرته ع حلمنا

تحت المجهر و حوار على نار هاديه و حيلهم بينهم
ومشاريع حفظ القران



مين من الاعضاء لازم تتابعى موضوعاتهم باستمرار

كلاسيك ، المتمرد ، د. احمد ، جارة القمر ، بيبو



امته قلتى مش هدخل حلمنا تانى

قبل ما ارجع المرة دي



وكان ايه السبب

انا قلت مش هرجع تانى علشان كنت زعلانة من سيسو



إدارة فاشلة .. تعليق من سلمى على بروفايل سيسو ..ليه ؟ ومتسئليش عرفت ازاى

ههههههههههههه مش هسئلك .. بروفايل سيسو عام !

المهم كنت قلته عشان كان في لخبطة جامدة ومكنتش حاسة ان اللي بيحصل ده صح و كنت متخانقة مع سيسو
(غالي عليا سيسو ده )



ايه اللخبطه .. انه شالك من الإشراف

لا يا باشا انت مكنتش معانا انا اللي طلبت اني اتشالدي كانت خناقة كبيرةةةةةةةةةةةةةة
معركة ودم باه ..بهزر .. شدينا بس
وطلبي اني اتشال ده كان من زمان من قبل المشكلة ما تحصل



قلتى انك انتى طلبتى الانسحاب من الاشراف معلوماتى بتقول ان الواحه بتعتك كان فيها تقصير
وكان بينزلها موضوعات اباحية ....سؤالى شايفه انك مكنتيش جديرة بالاشراف علشان كده طلبتى التنحى عنه

ماشي يا اسامة والله لتشوف

انا كنت انشغلت فترة طويلة اوي ومبقتش اقدر اجي
فكنت بكلم مورفيوس كذا مرة اني مش هقدر اكمل وكده وانه يكلم سيسو ..
اما المواضيع دي اكيد لو كنت اعرف بيها كنت دخلت مسحتها يعني ولا ايه
ومش مكنتش جديرة بس كنت مشغولة ومقدرتش اتواجد
الكورنر ده ابتدى من الصفر وان شاء الله يكمل ويبقى احسن كورنر ان شاء الله



قبل ماسيب حلمنا قوليلى مين دول من وجهة نظر سلمى
(مورفيوس ، يائوتة زعيمة الغلابة ، سيسو ، فنكوش المنكوش ، كوين ، ايرون هاند ، ، sarsoura ،
وطبعا مش هقول المتمرد علشان عارف ردك هيقى كلمة وحدة (رخييييييم )

رخيييييييييم بطيابة
كووووووووووووووليهم غاليين عليا جدااااااااااااااااا

ويائتي غايبة ومحدش عارف يوصلها ولسه بتوحشني

سرسورة اختي وحبيبتي زعيمة العصابة على راي بسام قمة في الطيابة .. ربنا يكرمها

مورفيوس اخويا بجد .. من زمااااااااااااان وانسان محترم جدا واخلاقه عاليه وشهم اوي

سيسو صديقي اللدود لا والله سيسو ليه عندي معزة خاصة .. كفاية انه بيستحملني ويكلمني كان مفيش حاجة حصلت ويراضيني

فنكوش المكنوووووووش ده باه راااايييييق وفي دنيا تانية غير الدنيا اخ وصديق عزيز جدا عليا ووقت الشدة تلاقيه ربنا يكرمه

ايرون هاند بيمثلي الفلسطينيين اخواتنا واهلنا ربنا ينصرهم ويكون في عونهم
معرفوش بس حاسة انه انسان كويس وحاسة باللي جواه

كوين ثكر ثكر وبحبها اوي وبحس انها اختي الصغيرة ربنا يكرمها

المتمرد... باشااااا على راي مؤمن ... رخييييم بس سكر طيب جدا ومحترم وشديد ربنا يكرمه يارب




طيب لو سبنا حلمنا شوية ودخلنا مكان عقدتك الممطبخ

وعرفت ازاي انه عقدة



منا قلتلك انا بعرف كل حاجه وعرفت كمان انك فاشلة فى المطبخ ......ردك ؟

هههههههههههههههههه لا والله انا في البيت بيعجبهم اكلي الحمدلله
بس مش بعمل يعني اكلات معقدة
محشي باة وحجات صعبه كده ولو ان بعد ما د. بيبو حبيبتي قالتلي على طريقته اتعقدت اكتر



هو انتى مفكرة ان الشاى اللى بتعمليه ده اكل

ال يعني انت جربته (والله ما يعرف حاجة يجماعة ومبيعرفش يعمل شوربه)


ده الطبيعى ..انى معرفش اعمل حاجه بس علشان مبقاش كداب انا بعمل بيض
بس انتى بنت يعنى هتجوزى وتبقى مسئولة عن مطبخ احساسك بفشلك فى المطبخ بيمثلك ايه

لا متخافش عليا .. خير ان شاءالله



هل بتحقدى ع البنات اللى بتعرف تطبخ ولا عندك لا مبالاة ومش فى دماغك ؟

ليه يا متمرد بس هو انا فاشلة فيه بجد ولا ايه

لا والله بالعكس باعجب بيهم وبصبرهم وبطلب منهم اكلات اتعلمها
(خلي بالك من كلمة صبر دي و تخيل ورق العنب ورقايه ورقايه)
هههههههههههههههه



امته مامتك قالتلك انتى فاشلة حتى فى المطبخ

هههههههههههههههههههههههههههههههه
هو عشان مكنتش بحضر حضانة هبقى فاشلة في المطبخ كمان
عمرها ما قالتلي كده يعجبها اكلي وبتشجعنى



احب بردو اعرف اكتر أكلة بتحبى غيرك يعملهالك منتى مبتعرفيش

لا انا مش فاشلة انا بطبخ حلو
بس عامة انا مش بعرف اكل حاجة انا طبختها بنفسي عشان علبال ما اعملها بكون شبعت
وبحب كل اكل امي وبحب بيبو تعمللي محشي



بعيدا عن الفشل الواضح فى المطبخ بس علشان نبقى منصفين بتعمل مكرونه كويس قوليلى

ايه اقصى احلامك

احلامى اني ابقى ناحجة جداااااااااااااااااااا في شغلي وفي حياتي كلها
وان شاء الله في مماتي واكسر الدنيا كده من النجاح




قلتى فى رد ليكى المفروض نودى الولاد اللى عـ حلمنا حلبة مصارعة ..ايه اللى بيجذبك فى الرجل

مدام عايزة انفيهم يقبى عاجبني فيهم ايه
اخلاقه وادبه وشخصيته لما تكون قياديه ومتواضعه ولما احس ان الراجل ده مسؤل بجد
انه يكون حنين وبرده حازم,يعرف امتى الجد وامتى الهزار



كل بنت بتحلم تكون اسرة بيت صغير وانسان يحافظ عليها ... حلمتى الحلم ده ولا لسه

بحلم بيه اهو .. نفسي في كوووووووووووووووووخ
بجد والله عايزة كوخ وولاد صغيرين وزوج حنين



طيب ولقيتى الحنين ده ولا لسه

لسه



مواصفاته .. يا ولا اهو ضل راجل ولا ضل حيطه

اكيد ضل حيطة
لا لو عالمواصفات كتيرة .. بس متهيالي ان الموضوع مش بيتحطله شروط
وتحاليل وكده هو لو حبيته وربنا وفقنا هشوف كل عيوبه شروط



لو اتجننتى فى عقلك واتجوزتى...ايه الطريقة اللى تحبي زوجك يعاملك بيها..
واى طريقة تحبي تنشأى اطفالك عليها

احب يكون في بننا احترام وثقة وتفاهم وصداقةو حب كبير و يكون طيب معايا وميزعقش
حتى لو جننته عايزاه قمة في الهدوء وضبط الاعصاب
وولادي احب اربيهم على الدين واعلمهم القران واحاول احفظهلهم كله قبل ما يدخلوا مدرسة ولو اني حاسة ان ممكن ملحقش ..
اعرفهم كتير اوي على الرسةل (ص)والصحابة
واعلمهم ازاي اخلاقهم تكون عاليه وعندهم كرامة وكبرياء
كمان عايزاهم يكونو عارفين كل حاجة في الدنيا ويفكروا بطريقة ايجابية دايما ويكونوا قريبين اوي مني واصحابي




مصر مسقط رأسك ... ايه اللى شفتيه فى اوروبا وقلتى ياااااااااه لو اشوفه ف مصر

اللي كان نفسي فيه لما نزلت مصر اني اشوفها نضيفة زي هنا وواسعة وفيها خضرة كتير
واني اشوف المرور مرتب كل ما اعدي اتشاهد على روحي
واني اشوف في احترام ونظام في تعامل الناس مع بعضها
وان مصر ترجع زي زمان... عارف ان مصر زمان كانت مسلفة انجلترا
وكانت بشهادة ناس اتراك انها من حوالي 30-40 سنة بالنسبة للاتراك زي باريس
بس ان شاء الله كل حاجة ترجع زي زمان واحسن باذن الله




هترجعى مصر إمته ان شاء الله

بصراحة لسه مش عارفة



لو خيروكى تعيشى ف مصر ترجعى تركيا تكملى ف لندن هتختارى ايه

هو طبعا اتمنى اعيش في مصر بس المشكلة اني متعودة اكتر على تركيا وانجلترا
يعني دول اللي فاكراهم اكتر واللي خدت عليهم اكتر




ايه أكتر حاجه ممكن تضحى علشانها ولا مفيش حاجه تستاهل

حاجة؟ ولا حد؟

هو سؤالى كان أكتر حاجه بس نو بروبلم نزود كمان أكتر حد ؟

حاجة اضحي عشانها النجاح ممكن استحمل اي حاجة بس اوصل للي عايزاه
حد اكيد اهلي بابايا ومامتي اولا




ايه اللى يخلى سلمى تبكى بحرقة ؟ وامته بتضحكى من قلبك ؟

لو حسيت بقلة تقدير ممكن او لو اتظلمت
وانا في فترة المراهقة اتظلمت كتير اوي من بنات كتير بسبب الغيرة
عشان كده صحابي البنات مش كتير والصبيان زي اخواتي مش عايزة تفكير شرير باه

اللى يضحكنى :: مش عارفة بجد ممكن اي حاجة وكل حاجة تضحكني و ممكن اضحك وانا بعيط
وممكن كمان حسب طبعة الموقف وحالتى النفسية




مين بتاخديه قدوة ليكى فى حياتك

بابايا ربنا يخليه ليا




ويا ترى مين أقرب شخص ليكى فى الواقع بعيدا عن النت

اختي..بتفهمني اوي حتى لو متكلمتش واحنا قريبين من بعض اوي
مع ان في حاجات كتير اوي بنفكر فيها عكس بعض خااالص وحتى اذواقنا في الاكل مختلفة بس بحبها جدا وهي اقرب واحده ليا
وطبعا ليا اصحابي اللي من ايام الدراسة واللي اتجوزوا ولحد دلوقتي الحمدلله علاقتنا متغيرتش ابدا وربنا يخلينا لبعض علطول



ايه هى نقطة ضعفك ؟

لا وانا اقولك عليها ليه
مهي نقطة ضعف




سلمى انتى راضية عن نفسك ( يعنى عن شكلك ، مبادئك ، تدينك ، حب اصدقائك ليكى ، اخلاصك لاصدقائك ..)

مم الحمد لله راضيه عن شكلي ومبادئي واخلاصي لاصدقائي
اما حب اصدقائي ليا هو اللي مالي عليا الدنيا ربنا يخليهملي

تديني...مش راضية وراضيه .. يعني في النص ...
احياينا بحس اني كويسة واحيانا كيترة يعني بحس اني لسه قدامي كتير اوي.. بس انا واثقه في ربنا



فى صداقات فى حياتك ندمتى عليها ؟

لا مندمتش بس بيتعلم الانسان انه ميعتبرش الكل اصدقاؤه وانه يفرق بس عمري ماندمت على حد



مش هدخلك فى السياسة أوى بس هسألك .. شايفة حكومة مصر ازاى وانتى خارج الحدود ؟

شايفاها مفيهاش ذرة ديمقراظية ..حكومة عسكرية واستبدادية وفاسدة
واتمنى يحصل تغيير للافضل ونكون ديمقراطيين ونكون كلنا ايجابيين ونقبى احسن ناس ان شاء الله


بتخبطى فى الحكومة ..وانا مالى
طيب لو انتى مكان رئيس الجمهورية اللى مش عاجبك ايه اللى ممكن تعمليه ؟

ياااااااااه كنت غيرت حاجات كتير اوي
كنت خليت القانون قوي والناس بتحترمة كنت خليت التعليم مفيد ويطلع عباقرة كتير ويساعد الشباب
كنت عمرت مصر وخضرتها خليتها كلها نضيفة وجميلة وجديدة ومتقدمة
كنت خليت الناس تعيش مرتاحة وبكرامتها وثروة مصر وخيرها يعم على كل الناس
كنت حاولت اشجع اي حد يتعب على النجاح وكنت امنت الناس وخليتهم يعيشوا من غير خوف



فلسطين وما يحدث فيها بيعمل ايه فى سلمى .... وحاسه انك بتعملى اللى عليكى تجاههم ولا مقصرة ؟

اكيد بزعل جدا وبتخيل لو احنا مكانهم كنا عملنا ايه ولا كنا قدرنا نتحمل ولا لا
بجد ربنا يويقهم وينصرهم وترجعلهم ارضهم
بس ربنا بيحبهم عشان اذا احب الله عبدا ابتلاه ..ربنا يثبتهم يارب
اما عني...انا مقصرة بدرجة مخجلة جدا ومش عارفة اعمل ايه



طيب بعيدا عن السياسة وحفاظا على عودتك لاراضينا المصرية هفرجك على مشهد .....
بنت بتتاخد من قفاها أو بتتربط فى السرير ( مشهد بيتكرر معاكى كتير يا سلمى ...عايزين نعرف تفاصيلو

انت رخم اوي ايه ده

مبتاخدش من قفايا انا حضرتك بروح بالذوق
وبعدين الكلام ده قديم وعمري ماتشديت من قفايا يعني
هو بيتزعقلي بس فبخاف وبقوم جري
خليتها باه ربط في سراير وشيل من القفا وناقص اتمد على رجليا..رخم رخم



احيانا بتحصلنا مواقف كل ما نفتكرها نتكسف من نفسنا ...يا ترى حصلك موقف معين بالشكل ده

ههههههه أيوه مرة كنا رايحين رحلة مع بنات كتير وكده .. كان زي مؤتمر بره لندن
المهم كنا متعذبين فيه وبناكل كاري كل يوم وكده ومفيش اي حاجة حلوة
فطلعنا بره وشوفنا عروسة باكستانية فالبنات اصررررررررروا انهم يدخلوا الفرح ويعملوا معازيم
فدخلنا والراجل ابوها رحب بينا وكل شوية يجي يمسح على راسي ويقولي كلي
وانا اللقمةو تقف في زوري .. حرامية باه وبعدين اصروا اننا ناخد معاهم صورة تذكار
فانا واختي واقفين ورا العريس وبقول ايه الهبل اللي بيحصل ده انا هموت من الكسوف
راح العريس لاففلي وقالي ولا يهمك شكة دبوس ..طلع مصريييييييييييي وفاهم كل حاجة

لحد دلوقتي لما بفتكر بموت من الكسوف





قبل ماختم حوارى معاكى كنت عايز اعرف انتى ليه بتحبى الناس تدلعك سوسو
هههههههههههه
هتشوف هتشوف .. اقفل الحلقة يا رخم

ملحوظة : هى بتكره الدلع ده وكانت هتضربنى فى السؤال استنوا فضايح الحوار فى الكواليس هتبقى مسخرة




تحبى تشوفى مين مكانك عـ نار هادية ؟

احب اشوف جارة القمر _ واقولها اني بحبها واوي وربنا يصبرها عليك




هسيبيك سطرين تختمى بيهم حلقتك الجميلة والممتعة دى ...هتقولى فيهم ايه ؟

هقول مبسوطة اني اتكلمت على نار هادية وبقول لكل اعضاء حلمنا انهم غاليين جدا عندي
وربنا يوفقهم وبشكرك على الحلقة دي خصوصا انك خليتني افتكر ذكريات الطفولة


سلمى شكــراً جزيلاً .. نورتينى ونورتى البرنامج

ده نورك ونور حلمنا واللي فيه , انا مبسوطة انك علمت معايا الحوار ده
ويارب اكون ضيفة حفيفة عالبرنامج والحلقة تعجب المشاهدين

اسيبكم بقى مع الحلقة وأتمنى انها تحوز إعجابكم

على فكرة بجد

الحلقة دى عجبتنى جدا جدا جدا

الجديد فيها بقى بالنسبة لى

انى بجد اول مرة اتعرف عالشخصية اللذيذة دى

واستمتعت جدا والله وانا بقرا كل كلمة فى الحلقة

واضح من شخصيتها انها بسيطة اوى وبتحب تعيش حياتها بمزاجها برضو وفيها حبة جنون لذاذ اوى

انتى عسولة ياسلمى على فكرة

وانت محاور ممتاز يااسامة

حلقة مجدية فعلا

هههههههههههههههههههههههههه فضحانا دايمن فى كل حته كدا ..... همك على بطنك
بس على رايو شكت دابوس ...

موضوع جامد جدا يا متمرد ... اسئله حلوة .. و كنت محدر كويس ابل الحلقه ... شويه فضايح عجب عجب
و بالذاب بتاعت الافى ده .... هههههههههههههه

سوسو ... طبعا مفيش حد هينده عليكى الا بالاسم ده بعد كدا ...
موضوع حلو اوى و كانت حلقه جمده اوى

ياقمراية انا اللى ليا الشرف انى اتعرف عليكى

وفى اقرب فرصة باذن الله نكون اصحاب

على فكره

أحب أدي اعتراف

إني ما كنتش بدخل برنامج على نار هاديه تماما

وما كنتش مهتم صراحة بالحوار رغم براعة المتمرد و و قوة الضيوف

لكن صراحة

الحلقه دي شدتني كتير أوي

يمكن أنا ما أعرفش سلمى خالص

لكن بجد طلعت شخصيه جميله أوي و جديرة فعلا بالحترام

فعلا حلقة قوية جدا و فعلا منوره يا سلمى

متمرد

أحب أقولك رغم اقتناعي بشخصيتك الجميله في الحوار

لكن الحلقة دي

حلقة من العمر بجد

و هاتتعب جامد أوي في الحلقات الجاية علشان تعمل شغل أحسن من كده

بجد تسلم أيدك و منورة مرة تانيه يا سلمى

السلام عليكــم ورحمـة الله وبركاتــة ،،

طـــــــــــبعا الحـــــــــوار جميل جـــــــــدا

تســـــــــــــــــــــــــــلم ايـــــــــــــــــــــــدك يا اســـــــامة

بصــــــــراحة كالعادة متالق يا بنى والله

و ديــــــــــــــما بتخـــــــتار نـــــــجوم حلمنا فعلا

انا اولا ما عرفت جيت جــــــــرى عشان اشوف الحوار

بحـــــــــــــــــــيكى يا ســـــــــــلـمى على ردك الجميل

وكمان عشان طولتى بالك على اس الى بيدى اسئلة تجنن

وتـخلى الواحد عايز يـــــــــــــــــــضربة

والحـــــــــــــــوار اكــــــــــــثر من راااائع

و طبعا يا اس انت عارف الظروف الى عندى
لما تيجى تنزل
ما وراااااء الـكــــــــــــــــــواليس
تقولى يا صــــــــحبى
ههههههههههههههههههه

بالتوفيق و النجاح

ان شـــــــــــــــــاء الله يا سلمى

تحيــــــــــــــــــــــــــــــــــــــــ تـقـبـلى ـــــــــــــــــــــــــــــــــــــــاتى

ومبروك علينا ماتش النهارده ....مع إنُه فوز معتاد يعنى