يا ابنى انت لسة بدرى عليك اوى.. اسالنى انا "
" يعنى بلاش اجرب "
" اة انا عندى خبرة اكتر منك..وياما عدى عليا ناس وشوفت كتير فى الدنيا دى..انت لسة جديد ابن امبارح
واللى يعيش ياما يشوف وانا شوفت كتييييير "
اكيد دة الكلام اللى كلنا بنسمعه ودى المقوله اللى دايما بتتداول فى كل بيت سواء بين الابن ووالده او البنت ووالدتها او حتى بينك وبين اى حد اكبر منك
اكيد مقوله انت لسة صغير او انت لسة صغيرة واسالينى انا انا جربت كتير وشوفت كتير دايما بنسمعها ودايما لما بتاخد راى احد حد فى مشكلة تخصك بيقول الكلام دة وبيكون عايزك تنفذ اللى هو شايفه من وجهه نظرة انه صح ومش عايزك تجرب بنفسك
اكيد الكلام دة مش بيكون بغرض التحكم وخلاص بيكون هدفة هو انك توصل للطريق والاختيار الصح ولكن باقصر الطرق وباقل الخساير..لكن احنا طبعا مش بنحسبها كدة ابدا ومش بنقبل كلام ولا نصح من اى حد وبنحب اننا نجرب حتى لو كان محكوم على التجربة بالفشل وبنحب نشوف بنفسنا ونتاكد ودايما ماشيين وراء مقولة الممنوع مرغوب ولازم تاخد قرارك بنفسك ومتسمعش كلام حد..ما كلنا بنعمل كدة وانا اولكم بس يعنى مش علطول
يمكن ساعات كتير بنكون فعلا غلط وكلامهم بيكون صح بس بردو دة مش شرط ومش علطول لان الزمن اتغير والناس اتغيرت وحاجات كتير اوى حولينا اتغيرت ومبقاش ينفع اننا نتعامل معاها زى ما كانوا بيتعاملوا معاها زمان يعنى زى ما بيقولوا بالبلدى لكل وقت اذان ولو احنا فعلا ولاد امبارح بس هنقدر نتعامل مع بكرة علشان هو لسة يوم جديد زى ما احنا لسة جداد فى الدنيا ومش معنى كدة اننا بنقلل من تجارب وخبرات الناس السابقة اللى بنكن لهم كل حب واحترام وتقدير واكيد دايما هنلجأ ليهم لما الامور تتعقد ونكون محتاجين مساعدتهم ماهما بردو الخير والبركة
المهم يعنى يا شباب وبعد الرغى الكتير دة انا عارفة انكوا اتخنقتوا منى وعايزين تقولوا انا عايزة ايه؟
حاضر حاضر بالراحة ومن غير ضرب
باختصار سؤالى هو :
هل انت من مؤيدى فكرة التعليم من اخطاء الغير ام تحب ان تخوض التجربة بنفسك؟ ولماذا؟
وهل ترى ديكتاتورية فى ان يبيح السابقون لانفسهم حق التجربة ويحرمونك منها؟وهل تجارب السابقين تصلح لهذا الزمن؟
يلى منتظرة رايكم
