حلمك بين الكراكيب
جو دماغك شايل كراكيب
وحمل هموم
وانت يادوب وزن الريشة
والفكر فى راسك
مره يودى ومره يجيب
تحسب _ تطرح _ تجمع
تقسم حته شيكولاته
تمسكها بايدك وتدوق
تلاقيها بطعم الحنضل
وليها بسرعه تسيب
مسكين الصحرا جواك
تجرى تدور على نفسك وجواها تتوه
بتسمع من تانى النغمات
وتحس بلحن غريب
بتنخ ساعات وبتبرك
ع الارض الغضبانه
ودموعك تروى خدودك
والورد بيدبل
والشمس تغيب
بتحاول اكثر من مره
تمسك بخيوك الهوا وتقوم
وبتطلب من رجلك تثبت فى الارض
وبترمى بعينك النظره
على كوم الكراكيب
وبتلقى حلمك فى حته خردة
وبتعرف انه جواها غريب