حياء وكسوف
ام محمد نازله زياره للبندر .. من اسبوعين ليها بتحضر
هاتشوف احفادها ولاد ولادها .. ولبيوت الاوليا هاتزور
فرحانه هاتوا يا اولاد كل شيئ حدانا .. والسلام للغاليين امانه
اشي جبنه وزبده لبن وفطير .. من خير ارضها شايله كتير
معاها 30 سبت و 50 شيكاره .. اول مره تنزل زياره من زمن كبير
ست كبيره 70 سنه اسمها سعد الهنا .. مش هاقدر اوصف في التعبير
قلبها ابيض صافي .. للمريض تدعي الله بأسم الشافي .. نازله البندر
اوعي يا حاجه هناك تخافي .. ودعت الكل .. قالت السلام والعوافي
جابولها عربيه علشان يصملوها .. يعني يوصلوها .. بتاعه حسين ابن اخوها
بعد الزياره من هناك هايرجعوها .. الحاجه وصلت بالسلامه .. شافت ناس ولا يوم القيامه
ناس رايحه وجايه .. اشكال والوان .. قالت بالاحضان يا ولاد ولادي
وعلشان تكمل الزياره ... عايزه تزور السيده زينب وسيدنا الحسين
نزلت مع احفادها وركبت المترو .. وهي نازله وقعت .. الناس حواليها كتروا
ظهر من تحت الجلابيه .. جزء من السروال .. قالت ارجع محال
السروال بنطلون تحت الركبه بشبرين .. ظل خجلها معاها لسنتين
بنت الاصول عنها هاقدر ااقول ... هانروح فين جنبها .. الله علي قبلها
قالوا لها في مره نروح البندر .. اعتذرت وقالت مش هاقدر
تفتكر الموقف تضايق .. من خرج من داره اتقل مقداره .. كانت عندها احدي الحقائق