سلسلة حلقات مواطن محدود الدخل تأليف واد بتاع بنات
يارب تعجبكم وانتظرو مني حلقات قادمه






الحكايه حكاية اكتر من نص الناس اللي بنشوفهم شبه الراجل ده مشكلته بسيطه وحلها بسط أغلبها بيكون مشاكل ماديه
والظريف في الحكايه ان كل الناس بتتكلم عنه بيقولو انهم عايزين يساعدوه وانهم قلبو عليه والحكايه مش قلبهم اللي عليه
ده جذمتهم اللي علي رقبته
المهم في صباح أحدي الايام الغابره والغابره مش مقصود بيها هنا الايام القديمه العتيقه ولكن غابره بمعناها اللفظي
مليانه غبار ....!!!
المهم قومت الصبح علي صراخ ام عبده جارتنا وهيا بتنده على عبده
ام عبده : يا وااد يا عبده انت يا واد قوم يا واد عشان تملى انبوبة البوتجاز.
عبده : ياما ياما سيبيني انام ده انا راجع من الشغل تعبان وكان عندي ورديتين .
ام عبده : قوم يا منيل ده عربيه الانابيب علي اول الحاره وهيه بقت زي الطماطم دلوقتي .
عبده : ايه يا اما انت هتعملي عليا سلطا ع الصبح.
المهم انا قولت سيبك يا واد من الكلام الفاضي ده وكمل نوم عشان ليلة امبارح كانت ليله جامده موووت واللي حصل فيها مش شويه
قال ايه قولت اعزم خطبتي ع عشوة بره ويارتني ما خرجت هحكلكم بعدين ع اللي حصل
المهم متهنتش ع النوم برده جه بياع الخضار وتحت الشباك مقدرتش افرق بين صوته وصوت لمؤخذه حماره يتاعه
بياع الخضار: حمرااا يا طماطم بجنيه ونص مجنونه يا أوطه !!
طيب انت مش لاقي غير شباكي تنادي جنبه
روحت قافل الشباك وقولت اهوه خنقه بخنقه في الصيف الحر ده وقولت اكمل نوم zzzzzzzzzzzzz
ياربي هوه يوم مش فايت جرس والخبط ع الباب كان هيخرم طبلة وداني
تك تك تك سو سو سو تك تك تك سو سو سو تك تك تك
قومت من ع السرير مش فاكر حته كنت لابس هدومي ولا لا
بصوت تخين مووت: مين اللي بيخبط
اللي ع الباب: أناااااااااااااا
بصوت تخين برده: معرفش حد بالاسم ده ( اللمبي )
اللي ع الباب :أنا محصل النور.
لحقت سترت نفسي وفتحتله
انا برده بصوت تخين: ايه انا مش لسه دافع الفاتوره من اسبوعين
المحصل: لا ما هوه طلع في غلط في الفاتوره بتاعتك
انا وصوتي وحالتي (مخنوق): يعني ايه ليا ولا عليا فلوس
المحصل (بيضحك ) : ليك هاهاهاهاها يعني لو كان ليك كنت جيت لحد عندك
المحصل بصوت جاد: طبعا عليك فاتورتك اللي انت دفعتها سبعتاشر جنيه واللي مفروض تدفعها هاي ميه وعشره جنيه
انا وانا بقع ع الارض (الناس بتفوق فيا وبخرف بقول): هيه ليله سوده من أولها عشوه وام عبده!! وحمره يا قوطه الطبخه مظبوطه!! وميه و عشره


(تتبع...)

رووووعة يا واد بتاع بنات


من زمان اوي ماضحكتش كده


يلا عايزة اشوف الباقي

والله قصه جميله
وعايزين نتفرج ع الباقي
قريب

زي العسل يا واد بتاع بنات



يللا احنا عايزين الباقييي بسررعة

معلش اا نا خذلتكم وان شاء الله هكملها قريب بس ادعولي مش انسي كلمة السر تاني

بعد ما فوقت من الغيبوبه لقيت نفسي ممد في مستشفي شعبيه عشان العين بصيره والايد قصيرة ..وقال ايه بقالي كام شهر في غيبوبه .. الغريب لما صحيت لقيت العنبر مفهوش غيري ومفيش ولا مخلوق جنبي فنزلت من علي السرير وانا مستغرب ايه اللي بيحصل ده الناس راحت فين وفجأه ببوص من شباك العنبر لقيت الناس كلها في الشارع بتجري في اتجاه الجمعية اللي جنب المستشفي المهم نزلت من المستشفي ومقابلتش ولا واحد في سكتي يقولي انت فين ولا مين ..

واول ما خرجت من باب المستشفي كانت الناس هتدوسني فسألت واحد معدي ايه اللي بيحصل ده هوه في ايه احنا سنة كام ؟؟ فرد عليا سنة كام ايه يا شخص .. اللحمه السوداني بيقولو نزلت في الجمعية ..

انا استغربت ايه ده .؟؟ هوه اللحمه بتاعت مصر كلها خلصت ووصلنا لدرجة اننا نستورد اللحمه ..

المهم قولت اما اعدي علي الجمعية اجيب نص كيلو لحمه عشان امي في البيت ..المهم ع مد نظري .. ايام مكان عندي نظر لقيت طاابووور طويل وفي اخره واحد واقف جوه الجمعية بيقول يا نااااس دي أشاعه

مفيش لحمه ولا حاجه

والناس تبوص لبعضها مفيش لحمه؟؟!! مفيش لحمه!!! مفيش لحمااااااااااااااااااااااا!!!

لأأاااااااااه المهم الناس كلها بدأت تخبط ايد علي ايد وبدأو يكلمو نفسهم قولت يلا مش مهم .. انا هروح بقه وخلاص

روحت داخل محطة المترو لقيت خير اللهم ما اجعلو خير نااااس كتير جداا في ايه يا بشر المترو متعطل ...

جميل جداا اول مره نسمع ان في مترو متعطل والادهي من كده انه متعطل في خط شبرا الجيزة يعني انفاق

وبعد خمس دقايق لقيت الراجل بينادي علي جميع المواطنين الركوب في القطار القادم ومن لم يؤكب ويبقي علي الرصيف فسوف يدفع غرامه قدرها 10 الي 50 جنيها ... ايه

يا لهوووتي كل دي ناس بتجري فوقعت ع الارض تاني في غيبوبه ..؟؟؟

يا تري هصحي منها ولا لأ ...


(تتبع...)

هههههههههههههه

حمد الله ع السلامه يا واد .. واحشانا خفت الدم دي والله .. والقصص الجميله دي

شكرا لمرورك يا جي ام

مفيش حد دخل تاني بس مش مهم انا بقول اللي عندي وخلاص




عندما استيقظت شعرت كانا هناك قطار قد مر عبر عظامي وبدات اتالم وابتديت احس اني كلي مكسر وفتحت عيني لقيت ولدتي قاعده جنبي مش معقوله انت صحيت يا ابني ده اناقولت هتروح في الغيبوبه زي المره اللي فاتت وتقعدلك سنتين تلاته كمان

قولتلها يا اما لأا كفايه الحمد لله ربنا ستر ؟؟ هوه ايه اللي حصل؟؟

امي ياااه يا ابني ده الناس جابوك وكان بوقك جزامه من كتر الناس اللي مشيو عليا

انا وانا مدمر : أه أأأه يا سناني .. عملو ايه فيا الوحووش

يعني الضعيف يعملو فيه كده .. يا رتني لا روحت المترو ولا عتبته طيب انا عايز أروح يااااما

امي : حاضر يابني لما نشوف الدكتور ..

الدكتور : الحمد لله انت بقيت كويس . بس يا حاجه لازم تجيبي الدوا ده وياخده كل 3 ساعات ولازم يكون من صيدليه الامانه اللي في اول الناصيه لان الدوا ده مش موجوده الا عندهم
طبعا انا فهمت بعد كده ان الدكتو رده يبقي اخو صاحب الصيديليه اللي كان فاتح عطاره وقفلها وفتح سيبر وبعد كده فشل وقال أما اجيب واحد صيدلي واخد اسمه واعمل صيدليه واجيب واد ب200 جنيه اوقفه فيها

الدكتور يكمل كلامه : وبعدين في الحاجات اللي في الفاتوره دي لازم تدفعوها كماااان 500 جنيه

امي :يا لهوتي طيب هندفع منين يا ابني ده انا محلتيش الا المعاش التسعين جنيه ؟؟

انا متخافيش يأأما اناأعرف واحد صاحبي ممكن يسلفني ده حبيبي لو عرف اني في زنقه

الدكتور طيب خلي رهن هنا عشان منضمنكش أحسن تقع في غيبوبه تانيه

انا : طيب يا دكتور هسيبلك ايه ..؟؟ امي مثلاا؟

الدكتور : طبعا يا حبيبي عشان نضمن انك ترجع تاني

انا بقول لامي : متخافيش ياا ما مسافةالسكه هروح واجيلك ع طول

أمي متتاخرش عليا يا ابني أحسن بعدين الناس دول مفترين

أنا وصوتي متعب ..متخافيش يا ماااا

فخرجت من المستشفي وقولت ابعد عن محطة المترو خالص !! احسن بعدين المأساه تتكرر

وركب الميكروباص للأسف طبعا دخلت في أخر كرسي .. وركبت جنبي ست كبيره وشايله كيس سمك خنقنا طول السكه

ولما وصلت الحمد لله دخلت ع الحل بتاع صاحبي فلقيته قاعد وحاطط ايده علي راسه

أبو حميد صاحبي حبيبي
أبو حميد : مين الواد حسونه ..عامل ايه ؟؟ ده ااحنا سمعنا انك مت يا ابني
أنا : لأأ انا مش حسونه .. اناا ..اناا ايه ده انا مش فاكر انا مين
ابو حميد انت حسونه صاحبي ايه حصلك

المهم قعدت وحكيت اللي فكره وقولتله حكايتي ايه وحكايه امي اللي حجزوها في المستشفي بدالي علي ما اجيب فلوس
فقالي يااه 500 جنيه بس ده انا اديك عيوني يا حسونه

أنا بصوت خافت : حسونه مين يا عم انت حسونه حسونه بس اخد الفلوس

ابو حميد : بس انا في مشكله انا في عربيه دلوقتي جيالي عشان ابو نسب عمل حادثه ولازم اروح اشوف ايه اللي بيحصل ما تيجي معايا يا حسونه

أنا
أبو حميد ايوه تعالي

المهم ركبنا ودخلنا لمستشفي نسأل ع المعلم زيكو التخين
الناس دلونا بعد ما لفينا الطواريق كلها وبعد كده دخلنا لينا الراجل متكوم ع سرير لمؤخذه متكسر وحالته وحشه خالص

أبو حميد : ايه ده المستشفي دي مفهاش دكتوووور الحقوونا احنا عايزين حد يجي يشووف أبو نسب

ابو نسب بقه : أأأهه أأه الحقني يا ابو حميد راهنت الواد بوله ع اني اقدر اكل ديك رومي ودكرين بط واحلي ب10 تجواز حمام

أبوحميد : وده كلام يا معلم :

أبو نسب: يا ابني انا أكلتهم وطلبت قدهم تاني بس وانا خارج من المحل اللي أكلنا فيه عيل غلس زيك كده رمي قشرة موز اتزحلقت ووقعت علي ظهري

أبو حميد : ألااه أألاه ليه الغلط بقه يا معلم استنه هجيبلك .. دكتور

المعلم ابو نسب: أأأأاااااااااااااااااااااااااه

انا طيب مفيش حد تعرفوه هنا يا ابو حميد ..

ابو حميد لأ طبعا متصرف انتده انتقضيت كام سنه في وسطهم
أنا بس انا قضتهنم في غيبوبه .. د
أبو حميد اكيد هتعرف تصرف معاهم

المهم فضلت ادور ع حد أعرفه وفي الاخر لقيت عم عبد ,يا سلام عليه راجل ده كان جارنا في البيت القديم في عزبةالنخل يا سلاام

انا : عم عبدو عامل ايه يا راجل:

عم عبدو : أهلااااا ازيك يا فتحي يا ابني امك عامله ايه
أنا : ايه فتحي .. فتحي فتحي مش مهم .... انت عامل ايه وايه اخبار كل الناس عاملين ايه ؟
عم عبدو :هااااه يا ابني الزمن جار علينا والبيت وقع والبت نجية اتجوزت وصفيه اتجوزت وسعاد اتجوزت برده وبقية البنات لسه مرمين في البيت

أنا واناببكي : خلاص يا عم عبدوو قطعت قلبي كفايه كفايه

عايزين دكتور يا عم عبدو في واحد قريبنا تعبان وعايزين دكتور .

عم عبده ..: عم عبده ؟؟؟ عم عبدووووووووووه

عم عبده : ايه في ايه ؟؟ عايز ايه يا ابني

انا ا:انت نمت .
عم عبده انت مين ياابني ؟

أنا : انا فتحي مش فاكرني

عم عبده : مش فاكرك يااد

المهم كلمته لحد ما افتكر وقالي تعالي هجيلك دكتوور كبير خبرهو حته تقيله في البلد
تعالي ورايا احم احم

والله انا حاسس انه هيموت قبل ما يوصل للباب

المهم دخلنا خير اللهم اجعله خير غرفه ابيض في ابيض وكلها صناديق

انا : هوه فين الدكتور يا عم عبده

عم عبده : استنه هجيبهولك اصله في صندوق 29

أنا 29 : ؟؟؟؟ ايه

المهم راح فاتحلنا صندوق وجواه واحد
انا : ده الدكتور نايم يا عم عبده .

عم عبده لاا يا ابني ده ميت

انا : ايه ميت... هوه احنااا فييييييييييييييين

عم عبده : احنا ياابني في المشرحه

أنا : أاااااااااااه ووقعت في الغيبوبه تاني وسامع صوت خافت جنبي تقريبا صوت عم عبده

أهوه انت كده يا شباب اليومين دول قلبكم رهيف وبتخافو من أقلوها شئ

يا تري هروح فين المره الجايه




(تتبع...) ..

ربنا يستر يا واد وماتصحاش تلاقي نفسك في صندوق من الصناديق


جميييييييييييييييييييييييلة جدا


يلا عايزين الباقي

جميله يا واد بأمانه مش عارف ليه انا حاسس المواقف دي زي ما يكون حصلت معايا

لا مش للدرجادي يا without fear

وعلي فكره يا ج ام المواقف دي بتحصل مع اغلب الناس بس اللي يعيشها ويعرف يجسدها بيكون كويس عشان الناس بتتعلم منها مش مجرد تسليه وخلااص

شكرا لمروكم انتو الاتني

طيب فييييين بقية الناس

ماحدش بيجي يقرأ معانا ويتابع ليه

جمييييلة يا واد
انا والله من زمان مضحكتش كده

يلاا ورينا الباقي


بالتوفيق

اوك طيب النهارده بالليل هاحاول احكيلكم ايه الللي حصل

نوم العوافي (الحلقة الرابع)

للأسف لما فوقت من الغيبوبه دي كنت مستلقي في احدى الاماكن الضيقه لا أعرف أين ولا كم الوقت .

ولكن سمعت بأصوات تبدو وكأنها أصوات محركات طائرة ..


ولكناها لم تكن كذلك لانني اكتشفت انها بعد ذلك صوت السياره التي تحمل الموتي .. وانني في الطريق الي المقابر لدفني لانهم ظنو أنني موت بعد الغيبوبه الظاهر اني طولت


بعد وقت سمعت صوت المحرك توقف وبدأت أسمع صوت الناس من حولي يبكون ومنهم من يقول الله يجحهم ده كاان غلس وواحد يقولو كان ليا عنده عشرة جنيه واللي واللي.. وسمعت صوت حماتي بتقول الحمد لله استريحنا منه ده كان إيحة ومعفن
والمصيبه ان عروستي اللي كانت مفروض بحبها وبتحبني المفروض انها بتعيط عليا لكن سمعت صوت ضحكتهااا اللي خرم ودني وانا جوه النعش .

وبعد دقاءق من حملهم لي توقفو امام القبر .. وحينها شعرت برعشه قويه فقد كنت متعب جدا لدرجة اني لا استيطع ان انادي انني هناا انا علي قيد الحيااة ..
واحسست انها النهاية وانني مت فعلااا

وبدأ ضوء النهار يدخل علي وجهي . فلم استطيع أن أفتح عيني وعندما بدأو في حملي لينزلونني الي القبر

بدأت أطرافي تتحرك .

لأأأأأأأه أنااا عايش .. يا خلق هوووووووووووه أنا عاااايش مش ماااايت

الناس كلهاااا يااااالهوتي الراجل صحي وساعتها كان في ناس من الضعفاء النفس

احدهم يتحدث للأخر : في ايه
الاخر : ده بيقولو في واحد صحي بعد ما مااات
الاول: ولي...؟؟؟؟؟؟؟؟
الأخر : مدد ياااا ولينااا مدددد !!!!!
الأول : احنا لازم نزوره ونعرفه .

في نفس الوقت بدأ كل الناس اللي في الجنازه في الهروب والزعر فلووو جميعاااا يعني هربووو

وجالي الاتنين دول وقالوولي مدد يا والينا مدد انت اللي عليك البشااره

روحت قايله : بشاارة ..؟؟ بشارة ايه وانا مستغرب

قال احدهم : انت الولي الزغلولي

التاني : مدد يا زغلولي

أنا (في نفسي ) : الناس دي مجانين ؟؟

الاول : انت لاازم نعملك مقاام والناس تيجي تزوورك

أنا : والله عجبتني الفكره أهوه دي حاجه كويسه ونسترزق منها

المهم شالوني ع كتافهم وهما بيهللو مدد يا زغلولي مدد .. والناس بدأت تتجمع حواليهم ولقيت الأعلام طلعت من كل حته ..

في هذه الاأونه كنت أرتدي الكفن .. وغطو رأسي بأحد الفوط .. الخضراء كان شكلها مثل العمامه ..

واجتمع الناس حولي .. كثيرا جداا
وواصلو السير بي وهم يحملوني وكل من يسمع مدد يا زغلوولي مدد يجي وينادي معاهم ..

المسيرة بدأت .. من سرايه القبه لميدان التحرير كانت مصر كلها ورايا

اللي فاكره ان عدينا ع محطة مصر وكان أحد القطارات التي تأتي من صعيد مصر كانت وقت وصوله ونزل القطار كله خلفي والناس تهتف مدد يا زغلووولي


زغلولي مين ده ؟


راحو خالعين جذامهم

وبدأ يمسحون أيديهم في حديد المتروو ويقولووون مدد يا زغلوولي مددد


وانا ده كله غلبت مش عارف أعمل ايه الغريب اننا لما عدينا ع المسره بجوارها كان في واحد عنده عربيه كارووه راح فك الحصااان وركبوني عليه .. وبرده ع نفس المقوله .. مدد يا زغلوولي مددد


ولما وصل ميدان التحرير وجدنااا هناااك استقبال حافل فقد كااان هناك ما يقرب من مليون شخص في انتظار الولي الجديد

الزغلولي .. وعربيات الامن في كل مكاااان




وبعدهااا استمرينا في السير .. كان في خناقه كبيره قوي في العتبه عند ميدان العتبه بين بياعين وفيها سنج ومطااوي وسيووف

فلما سمعووو مدد يا زغلووولي مدد سابو الخناقه وجري معا اللي بيجروو ولقيت سيف من اللي معاهم جه في ايدي معرفش ازاي؟؟

وحين بدأ الموكب في الوقوف في بجوار تمثال عمر مكرم وانا أمطتي الحصان بتاع الكرو قصدي الجواد
واحمل السنجه .. قصدي السيف

والناس جميعاا يهتفووون

مدددد يا زغلوولي مدد ... مددد يا زغلوولي مددد

وبدأأأ و في السكوت ينتظرووونني أن أتحدث وألقي كلمه عليهم .. بس

فاااا. جاااابو ميكرووووفوون واكتشفت أنا هنااك سمعاات في كل ميدان التحرير

فقولت .. أما نتكلم عن أي حاااجه .. طبعا صداا الصووت عالي جدااا

في قولت

: S SssSSSssSS إس إس ..ألوووه ألوووه إس إٍ

الناس جميعاا تملأ الميدان وينتظرون مني أن أتحدث وان أنفذ طلبااتهم

فطلع واحد من بين الصفوف

وقالي يا ياا مولاانا الدنياا بقت غليييا ناااااارر
وواحد تاني الجواز بقه بعد الاربعين
وواحد تالت واللحمه ب 30 جنيه
وواحد رابع والمواصلات صعبه
وواحد خامس والحااجات بتغلي وامرتباتنا بتقل يا سيدناا

في حينها .. نظرت في الأرض ثم الي السماء .. الناس افتكرو اني بدعيلهم

ونزلت الفوطه الخضرا من فوق دماغي ورميت السيف وقولتلهم

.. انا زي زيكم . أنا شاب وعندي دلوقتي 35 سنه ومرتبي مبيعديش 200 جنيه وخاطب وخطيبتي ما صدقت انهم قالو اني موت
مبعرفش اركب تاكس والاتوبيس هوه وسيلتي الوحيده .. بقضي نص حياتي في الوقوف في الطابورهات يعني ساعتين في طابور الفرن و ساعه طابور الامضاء الحضور وطابورو الجمعية عشان اللحمه السوداني اللي مش موجوده وفي الاخر باشتري الفراخ البيضه اللي بتجيب المرض و طاابوور إلخ
عايز اتجوز ومش عارف .. قولولي علي حد يسلفني 5 الاف جنيه ادفعهم مقدم شقه

وحين انتهيت من الكلام بدأت أصوات الناس ترتفع وينظرو لبعض

وفجأأأأأأه كل واحد ماسك حاجه في ايده حدفهاااا علياا جزمه كوبايه طوبه طماطمايه خوخه

وحينها القيت ع الارض مره أخري لأفقد الوعي لعدت سنوات أخري

صوت حماتي بتقول الحمد لله استريحنا منه ده كان إيحة ومعفن
والمصيبه ان عروستي اللي كانت مفروض بحبها وبتحبني المفروض انها بتعيط عليا لكن سمعت صوت ضحكتهااا اللي خرم ودني وانا جوه النعش .





اخص

ندالة انما ايه يا واد

انت شكلك كنت مزقوق عليهم


يللا ياترى انت هتفوق المرة الجاية ف سنة كام

جميلة واحنا في انتظار الباقي

جميله يا واد .. انت اجمل حاجه انك بتمثل نبض الشارع بجد

يللا عايزين التكملة قريب بقى

انا مستغرب اشمعناا احنا الاتنين بس اللي بنقرا القصص دي هوه في ايه .. ايه يا واااد ؟؟


بس احنا متابعينك فعلاا

متشكر يا جمااعه
يا جماعة انا برتجل القصه وانا هنا يعني حالة مش اكتر

وربنا يسهل والحالة تيجي تاني

علي فكرة انا قريت الحلقة الاولي والتانيه

بس لسه ما كملتش البلقي

بس ظرااااااااااااف كتيييير يعني جامدين جدا

ايه حكايتك يا واد .. مفيش قصص خلااص؟؟

أسف علي تاخيري

كل سنه وانتو طيبين

الحلقه دي من زمان كتبتها يا رب تعجبكو



نوم العوافي (الحلقةالخامسة)



المره دي لما صحيت . لقيت نفسي في بتنا صحيت حوالي الساعة 4 الفجر وقولت يا واد روح صلي الفجر في الجامع يمكن ربنا يكرمك وتتصلح الامور ..
وانا في الطريق فضلت افكر طيب وبعدين انا دلوقتي عندي 35 سنه ولسه متجوزتش ولا عملت حاجه في حياتي .. لازم في حل مش معقوله هفضل كده .. ع الاقل أموت وانا خاطب يعني ..

فدخلت وبعد ما خلصت الصلاة وراجع بتنا سمعت صوت عربيات جية وبيب بيب بيب بيب .

في باللي بقول :ايه الناس اللي مش بتراعي الجيران دي . وجايين ع وش الفجر يعملو زفه فروحت اشوف ايه اللي بيحصل .. .

ايه ده .. ؟؟ مين .. الواد حموده السباك.. راكب عربية جيب شروكي.. وايه ده كله اللي فوق العربيه .؟؟ ايه اللي بيحصل في الدنيا دي.. وروحت قولت اما أسلم عليه .. يمكن ينولني من الحب جاانب . وبعد ما سلمت .. عليه طبعا مكنش فاكرني انا مين .. وروحت بتنا وانا بفكر . ايه ده ازاي الواد السباك اللي كان من خمس سنين ده هدومه مقطعه .. بقه كده ماشاء الله ..أكيد الحكايه فيها إنه .. وقولت اما اريح شويه ..

في حدود الساعه 9 اشتغل اذاعة أم عبده .. جارتنا (فاكرينها) كانت بتكلم مع أمي ولقيت ودني معاهم كده وهما بيقولوا

أم عبده: شفتي يااا ختي الواد ابن ام حموده .. السباك رجع من الكويت امبارح .. وجايب شئ وشوياات
أمي : هيه الزفه دي كانت بتاعته ..بس يعني الفلوس دي حلال يا ام عبده؟؟
أم عبده : حلال ولا مش حلال . أمال ايه ده بيقولوو انه لما راح هنااك .. اشتغل ع طوول سباك دبلوماسي ..
أمي: سباك ايه يختي
أم عبده:دبلومااسي.. زي الفول المدمس كده يختي..
أمي : أه يعني اشتغل بتاع فول وفلافل..؟؟
أم عبده : الظاهر كده بس انت عارفه مين الي سفره وعمله كده ..؟
أمي: مين يختي؟؟
أم عبده : علي المكوجي.. أه علي المكوجي أصله ليه جوز اخته في ليبيا ..
أمي : طيب هوا راح السعوديه ؟؟ ازاي بقه دي؟؟
أم عبده :كان في الكويت يا وليه و ما يختي ليبا والكويت فردة كعب.. زي العتبه وروض الفرج كده .
أمي : ده أنا افتكرت ان الكويت دي ع الصحرا الغربيه وليبااا في البحر المتوسطن
أم عبده : متوسطن مين يا وليه اسمه الشرق الأوسط..
أمي: (بصوت عالي حبتين) ينيلك .. يا بت .. انت بتعرفي في السياسه ؟؟
ويضحكو .. وأنا جوه ميت علي نفسي من الضحك ..
أم عبده .: أمال ايه .. سيبيكي يختي واكملك بقه جاب تاني ايه معاه ..امممم ايشي هدوم لخواته البنات وتلاجه 25 قدم وبوتجاز 9 عيون الخضراا دي والزرقاا وجاب خلاط للبت سميحه جارتهم .. أصلها كانت بتقرفهم بالخلاط القديم بتاعها اصل صوته كان بيصحي الحاره كلها
أمي : أه إنت هتقوليلي .
أم عبده : وتليفزيوون 30 زعزوعه ..هاها هاهاه.. شوفتي يختي الولاد... مش المنيل عبده ابني . يدهول في نفسه طول الشهر وفي الاخر يجيبلي 250جنيه بدفع منهم 50 كهربا و150 ايجار و50جنيه الفاضله بيجيب يدوب ياكلونا اسبوع ..
أمي: امال انا اعمل ايه ع بخت ابني المنيل .ده اترفد من الشغل عشان مبروحش وعايشين بالمعاش بتاع الله يرحمه .. يدوب معيشنا الحمد لله يختي..
أم عبده : انا هكلم علي المكوجي يشوف لعبده ابني سفريه.. واخليه يشوف لابنك لؤي برده
أنا ( ايه ده انا اسمي طلع لؤي)
أمي : لأ يختي انا مقدرش اعيش وابني بعيد عني انا عايزه اموت وهوه جنبي..
لحظتها انا قومت .. جري..
أنا : سلامتك ياا أما رابنا يديكي طولت العمر.. خير في ايه يا ام عبده . عامله ايه وازي عبده؟
أمي وهيه مبسوطه : ايه ده انت صحيت امته يا ابني
أم عبده :لووولوووولووولووووي .. يا ألف نهار أبيض .. يا ألف نهار مبرووك .. حمدالله ع سلامتك يا ابني يا رب ماتروحش تاني وتسيب امك الغلبانه دي.
أنا مبتسم ومنشكح: لا ربنا يسترها بس . و(أقدر أكمل الحلقه )
أم عبده : لسه بكلم امك على الواد علي المكوجي يجبلك سفريه انت ولا الواد عبده ابني..
أنا: والله فكره ياا أما ايه رايك؟؟
أمي : ايه يا ابني انا مش حمل فراق وغربه يا ابني ..
أانا : طيب هنعمل ايه ياا أما انا دلوقتي 35 سنه ولسه معملتش حاجه في حياتي ؟ وعلامات اليأس علي وجهي..
لحظته باب .. شقه ام عبده اتقفل..
أم عبده : أهوه شرف سياادته (قصدها علي عبده ابنها) .. ياا واد ياا عبدووووووووووه ..
انت ياا وااد يا عبده .
عبده ( صوته واطي لانه بيتكلم من ورا باب شقتهم : ايه ياا أما خير . أنا جااي تعبان ومش معايا فلوس ...
أم عبده تعالي يا واد سلم عي لؤي صحي .. وفااق وعشان عيزااك
عبده في سرعه فتح الباب وجه جري وهوه مبسوط ) مش معقوله .. لؤي (ايه ده ده انا اسمي طلع لؤي بجد) يخرب عقلك واحشناا ياا رااجل اانت هتدخل موسووعة جينز . للارقام القياسيه في الغيبوبه ياا رااجل ( وراح حضني ).
أنا : طبعا مش فاكر حاجه.. اهوه كانت ظروف وعدت انت عامل ايه في الشغل بتاعك.
أمي : أما أروح أعملكوو شاي يا ولااد . متمشيش يا ام عبده . عشان نكمل كلام في السباك الدبلوماسي . وضحكتنا كلنااا . هاهههااهه ههاههاها هاهاه

عبده بعد ما خلصنا ضحك : (علامات اليأس على وجه ) والله يا لؤي انا زي ما كون شغال في ساقيه ليل بقه نهار والنهار ليل.. حاجه تقرف
أنا : طيب ليه يا ابني .. انت بتشتغل ايه ؟
عبده : بشتغل في سيبر بتاع نت بس باخد وردية ليل ..
انا: سيبرات ..؟؟ ايه دي ونت كمان .. مين ده
عبده : (زهزه يضحك) اه صحيح ما انت روحت في الغيبوبه قبل ما النت يدخل مصر
أنا ايه النت ده .. ده باين عليه .. حاجه جديدة
عبده : النت ده عباره عن حاجه زي التليفونات كده بس بدل ما تكلم بس لاا ده انت ممكن تشوف اللي بتكلمو وفيه ناس بالهبل عليه طول الليل والنهار قاعدين وفي أي حته في الدنيا.
انا : طيب بيصرفوو منين؟؟ الناس دي
عبده : والله ما انا عارف المهم والعياال قروود .. تلاقي عندهم امتحاانات وجايين يلعبو . البلد بااظط والله
أنا : طيب ليه الحكومه متخليش السيبرات دي ليها وقت معين وبسن معين
عبده : الحكومه هتعمل ايه يا اخوياا (وهوه يضحك ) طبعا مينفعش . النت أصلا ده حاجه مفيده بس احنا بنستخدمه غلط ..
أنا : أأأأأه .. قولتلي ..............
عبده : سيبك بقه من ده كله انت معرفتش أخر أخبار البت سعاد خطيبتك القديمه ..؟؟
أنا ايه مالها دي كمان ؟؟
عبده : دي حكايتهااا حكاااااااااااااااااااااااااااااااااايه...............

تتبع
( الحلقه القادمه بقية الكلام عن سعاد و النت وحكاية السفر)
.

إنتهت الحلقات التي .. يغمي علي لؤي .. ونستعد لمجموعة الحلقات الواقعية

النهارده كنت جايب الحلقة .. السادسه . بس للاسف محدش شاف الخامسه من اساسه ...

لأه انا شفتها كمل ياعسل كلي ودان متصاغيه

جميله الحلقه جدا منتظريين نعرف اللي حصل لسعاد وياريت تنزل الحلقه السادسه بسرعه

وبهنيك بجد اسلوبك رائع

وبعد 8 شهور من الغياب عاد ولد بتاع بنات ليكمل . القصة..

وحشتوني وانتظروا مني البقية ..

فى انتظار البقيه

لانها من اولها تحفه

يلا كمل ومنورنا تانى

مواطن مطحون الحلقة ( السادسة)

بعد ان جلسنا انا وعبدوا نتساير ونتكلم عن الانترنت الاختراع الغريب ده .. واخبرني بما فعلته سعاد خطيبتي القديمة ..
مجمل قصتها انها في يوم وهي شغاله في كافترية النجوم .. اتعرفت علي واحد مخرج فيديو كليب وهي طبعا كانت بنت ملعب شويه فعرض عليها انها تغني وهي ما صدقت بس .. وساقت فيها وعملت كليب والتاني وبقت نجمه مشهورة واتغير اسمها بقه سوسو الموولعب . ..

المهم اتفقت مع عبده اننا هنخرج بالليل مع بعض .. وراح عبده عشان ينام لانه كان في ورديته ..
ورجعت لمنزلنا مره أخري . وجلست أمام شاشة التلفيزيون لاتابع نشرة أخبار الساعه 12 .

وكان بيتصدرها عناوين الاخبار .. مقتل 10 في افغنستان .. مذبحة جديده في بيت حانون .. اعتقال العشرات في مظاهرات في الاراضي المحتله . وكلها اخبار موت وقتل ..
ياااه اكيد في حاجات كتير حصلت وانا في غيبوببتي دي ..

جلست جنب الشباك اتابع الناس في الشارع .. رتم الحياة اصبح مخلف جداا .. ها نحن في 2006 وانا منذ حوالي 15 في غيبوبتي .. لقد تغيرت الدنيا بلا شك ..

ارتديت ملابسي .. وقررت أن اخرج
أنادي علي أمي : يا أمااا . يا أمااا ..
أمي: أه .. يا ضهري يانا.. أيوه يابني .. خير
انا : هنزل يااما انا خارج عايزه حاجه من تحت .
أمي : تسلم يا بني . بس متتأخرش ..
أنا : حاضر يا أما ..
ونزلت من بتنا .. الشمس اصبحت مختلفه جداا عن شمس زمان والدنيا حر جداا هو حصل ايه في البلد .
حاولت ان اتفادي ركوب المكروباص او المترو حتي لا تحدث مأساتي القديمه ..
فإرتجلت حتي وصلت لكبري قصر النيل ..
ووقفت في منتصف الكبري أشاهد القاهره بعين عاشق غاب عن معشوقته مدة طويله ونظرت لمياه النيل وكأنها تبكي ولكن لا أعرف . من ماذا .
قاطع تفكيري بنت صغيره ..
البنت : لله .. زكي عن عفيتك وصحتك يا بيه . ربنا ما يحرمك من نظرك يا بيه . ربنا يرزقك في كل خطوه سلامه يا بيه .. ربنا ما يحرمك من مراتك يا بيه .
أنا : بس بس .. قطعتي كم القميص .. عايزه ايه يا بت انتي
البنت : حسنه لله يا بيه .. انا يتيمه وامي تعبانه وعايزه اجبلها الدوا اصلنا من الفيوم وانا جت مصر مع خالتي وهي مشيت وسابتني وانا عايز اروح .
أنا: طيب بس يا ماما قطعتي قلبي .. طيب وانتي بتنامي فين .
البنت : تحت الكوبري .
أنا : كوبري ايه ؟
البنت تحت الكوبري هنا يا بيه . الدنيا بتبقي ساقعه قوي يا بيه ..
أنا خلاص يا بت انت قطعتي قلبي خالص تعالي وانا هوديكي لأهلك في الفيوم .
البنت : لا لا مش عايزه أروح .
أنا : ألله .. انتي مش لسه بتقولي عايزه تروحي بلدكو.
البنت : بس جوز أمي بيضربني .
أنا ممم انا مش مستريحلك يا بنت انت .
وإذا بمرذبه علي قفايا . أكتشف لما دورت وشي انه ايد بني أدم زيه زينا .. بس مختلفة التكوين . يعني تقدروا تقولوا فيها 7 صوابع مش 5
الشخص الغريب : وبصوته الأجش .. في. إإإإإإإإإإيه با بت يا لووزه الأفندي مدايقك .
أنا : يا أستاذ أبو كف . خير محلش حاجه ده البنت تايه وعايزه مساعده .
الشخص الغريب : طيب ما تديها اللي فيه النصيب وتسبها انت هتحكي معاها .
البنت : معلش يا زلومه .. البيه راجل طيب وكان عايز يساعدني .
الشخص الغريب .. يساعد مين يا بنت ........
انا: عيب يا استاذ زلومه . دي برده زي بنت حضرتك .
زلومه: بقه دي بنتي ده لو بنتي كنت قتلتها من زمان .
أنا طيب عايزين ايه دلوقتي .
زلومه : طلع اللي في جيبك .
أنا : والله انا نازل اتمشي ومفيش في جيبي غير الجنيه ده .
زلومه : ايه .. جنيه انت عايز تفهمني انك ططويل وعريض في جيبك مفيش غير جنيه طبعا كالعادة بصوته الأجش .
أنا : بكل برائه . أه والله . أصل أقولك الحكايه .. أصل انا كنت في غيبوبه وبعدين ..
زلومه : قاطعني . انت هتحكي قصه حياتك يا أستاذ انت شكلك كده رغاي روحي يا بت يا لوزه شوفي الزبون اللي ع الرصيف التاني . وانت اطرق يا ستاذ انت .
المهم عدلت قميصي وجريت من قدامه .. احسن الحكايه مش ناقصه يغمي عليا كمان وانا وعدت الناس انه خلاص هعيش حلقات واقعيه .
شاورت لأحد التاكسيات علي اساس انه يوصلني البيت واحاسب عند البيت . لأان مبقاش في جيبي ولا مليم . ومش هقدر ارجع زي ما جيت مشي .
الغريب اني كل ما اشاور لحد ميرضاش يقف .. ففضلت اتمشي لحد ما شوفت منظر غريب .
بنتين ماشين يا أرض احرسي ما عليكي .. شعر ايه .. ومشية ايه .. وبناطيل ايه ..
الغريب انهم أول ما دوروا وشهم وشاورا لتاكس وقفلهم 5 تاكسياات مره واحده طيب وانا ولا واحد
المهم لحقت تاكسي من الوقفين وركبت معاه .. ع اساس انه يوصلني للبيت ونتحاسب هناك ..
واحنا في الطريق شاور واحد والتاكسي وقفله وركب قدام .
المهم لقيت الشاب اللي ركب ده شكله غريب شعره عليه حاجه زي السمنه كده ولابس تيشيرت مبين قفاااه كله ولابس سلاس غريبه كده . شكله يقرف .
الغريب لقيت الواد عمال يكلم في نفسه طول السكه لحد ما نزل ..
السواق : ايه ده يا كابتن
الكابتن : بصوت مدلع في يا مان . دي الاجره .
السواق : ما انا عارف يا خويا الاجره . بس الفلوس دي متتصرفش ولا حتي ببلاش
الكابتن : يامان روش نفسك . اديله لأي زبون .
المهم حاسب السواق ونزل .
الغريب انه اول ما نزل شوفت حاجه غريبه جداا الواد الملابس الداخليه بتاعته من ورا باينه . يخرب بيتك مش مكسوف .
السواق : شباب خنافس اخر زمن .
أنا : ليه بتقول كده يا سطي .
السواق : الأفندي ده موبيل وهاند فري بلوتوث . وبيديني جوز جناهات مقطعين .
أنا : ايه .. النوباايل ده .. واللتوث ده .
السواق : ها ها هااا . بقه متعرفش الموبيل ده ايه يا استاذ . شكلك بتشتغلني .
انا : لا والله . هو ايه ده يا يسطي .
السواق ده تليفون محمول يا خويا وهو اللي خرب بيت البلد كل العيال شايلينه ومنظره .
أنا : ياه تليفون كده بيتكلم في الهوا .. ده الواد مبطلش كلام من ساعة ما دخل انا افتكرته بيكلمك .
السواق : ها ها ها .. لا يا استاذ . ده كان بيكلم الموزه . بتاعته .
أنا : ايه ده هو الموز بيتكلم اليومين دول
السواق : ها ها ها .. موزه يا استاذ .. ده انت باين عليك خاام خاالص يا بتستهبل ..
أنا : لا ابدا بس الدنيا حالها بقه غريب فعلا ..
وقفنا في اشارة المرور .. خير يا سطي وقفنا ليه .. في تشريفه معديه .. منهم لله البعده كل ما وواحد ينزل من بيبته يقفلوله الشوارع . الله يهدهم .
انا : هما مين دول يا سطي .
الاسطي : خلينا ساكتين يا استاذ عايزين نربي عيالنا .
أنا : طيب .. المهم وقفنا في الاشاره دي اكتر من ربع ساعه .. ووصلنا البيت ..
فقولت للسواق استني يا سطي دقيقه هجيبلك الفلوس من البيت
السواق : تجيب ايه ياا خويا . مبنكلش من الكلام .. ده
أنا : في ايه يا اسطي انا ابن ناس اصبر هجبلك الفلوس .
السواق كلهم بيقولو كده يا خويا .. وعاملي مش فاهم حاجه طول الطريق لو انت مجنون أنا اجن من اللي خلفوك .
لحسن الحظ ان عبده بص من الشباك ولقيته نازلي جري بالشورت والفلينه .. في ايه يا لوي ماله الراجل ده .
السواق : لا يا استاذ . بس أخينا ده عمال الف معاه من الصبح وبعد كده مش عايز يدفع الاجره .
أنا : يا سطي ان قولت هطلع اجيبلك من البيت .
السواق واناايش ضمني ..
انا : ياعم الحاج . انت مش مصدقني ليه .
السواق : من اللي بنشوفه . عموما .. انا مستني اهو
المهم طلعت جبت 10 جنيه ونزلتله ..
فبديله الفلوس: خد حسابك ياسطي وهات الباقي .
السواق . راح اخد 10 جنيه وراح مديني لفه فلوس في ايدي وجري .
ببص في الفلوس ..
ايه ده الاتنين جنيه اللي الواد الخنافس ادهملوو .. ياااا بن ال........

.. تتتبع ..

( الحلقة القادمة في السيبر مع عبده )

القصة دي جامدة موت يا باشا بس حكاية الاغماء دية ماخوذة من حلقات حصاوي (لنين الرملي) في ملحق الساخر (ايامنا الحلوة سابقا)

بس دة مايمنعش انها جامدة

شكراا يا باشا[size=3][b][i][color=#000099]

اهلا يا واد .. نورت حلمنا مره تانيه بقصصك
وحشتنا والله ..

يا تيكو . ع فكره واد بتاع بنات علق ع الموضوع ده قبل كده .. ودلوقتي الحلقات مفهاش اغماء زي ما وعدنا ..



في انتظار المزيد يا جميل

[font=Arial]انا الصراحه لسه شايفه الموضوع ده دلوقتى
وقرءت كل الحلقات اللى كتبتها
وبجد موضوع خرافه
طريقه كتابته رائعه
والكوميديا اللى فيه جميله موت
ومضمونه قيم
موضوع تحفه

منتظرين الباقى
تحياتى لك

في انتظار باقي الحلقات يا وااد واوعي يغمي عليك تاني بقه ما صدقنا انك صحيت ورجعت تكتب تاني

الغامض وتيكو وجي ام وشمس الوداع وسلمي سلطان ..
اشكركم علي مروركم .. وانتظروا المزيد قريبا باذن الله ..

مواطن مطحون الحلقة ( السابعة)


بعد أن دخلت المنزل اكنت الساعه في حدود الثالثة والنصف عصرا سمعت الهاتف .. فذهبت لارد .



أنا: ألو .

المتصل : كان صوت حريمي وناعم جداااا .ألوه ..أحمد موجود.

أنا : أحمد مين حضرتك أنا لؤي .

المتصل : أوه سوري النمره غلط ..

أنا : لا مفيش اسف يا فندم دي فرصة سعيدة جداا

المتصل : بس انت شكلك لطيف قوي يا اسمك ايه .

أنا : لؤي خدام السيادة .

المتصل : ضحكه .. دلع علي الاخر .. ها ها ها هاااههاا...

أنا .. وانتي اسمك ايه ؟

المتصل : انت قديم خالص الكلام ده كان زمان .. انت منلزتش الأبديت بتاع الكلام الجديد ولا ايه

أنا : أبديت مين .. هو في كلام جديد نزل ولا مش واخد باللي

المتصل : عموما ان جميله .

أنا : باين حضرتك والله من الصوت انك جميله فعلا .

المتصل : هاهاها . ضحكة بدلع طبعا .. لأه ..أنا اسمي جميله . واستطردت في الضحكة ..

أنا : ياااه ده باين عليه اسم علي مسمي ..

المتصل : انت دمك خفيف قوي يا لولو..

أنا :ههههههههه بقيت لولو .. بعد ما كنت مش فاكر اسمي ايه .. ..بقولك ايه انا بدخل رايح بالليل انترنت كافيه ممكان نتقابل هناك.

جميله: مره واحده مش نتكلم ونعرف بعض الاول .. ممم أقولك فكره . ايه رأيك نتكلم ع المسينجر .؟؟

أنا : وعلامات الاستفاهم تدور حول رأسي مسينجر مين ؟؟

جميله : مستغربه .. مش معقوله مش عارف ايه المسينجر . عموما ضيف ايميلي ده اكتبه وصحابك اكيد هيعرفوك .

gamilaweamora12345@hotmail.com (طبعا ده ايميل وهمي .. بس عشان الدراما يعني )



أنا : ياااه كل ده طيب استني لما اكتبه بقه ...



وظللنا نتحدث في الهاتف اكثر من نصف ساعه نتعرف علي بعض .. حتي دخلت امي فوجدتني اتحدث في الهاتف

أمي : ايه ده يا لؤي انت جيت امتي .؟؟ وبتكلم مين

أنا : ومضطرب. لأ أبدا يا ماما . ده النمره غلط ..

جميله المتصله: هههههههه مامتك قفشتك .. يا خلبوص

أنا : النمره غلط يا فندم جرب مره تاني

جميله : هكلمك كمان شويه

انا : تحت امرك يا فندم ..مفيش مشاكل .

ووحت قافل السماعه .. ووشي محمر

أمي .. مالك يابني احمريت كده ليه ...

أنا لا أبدا أصلي كنت بره وراجع الدنيا حر ع لأخر .

أمي .. طيب يلا عشان احضر الغدي .

طبعا احنا علي قد حالنا .. كان الغدي فول وجبنه ..

أنا : ايه ده يا اما انتي بتحتفلي بيا ولاايه . فول كده ع الغدا .

أمي : معلش يابني اصل المعاش بتاع ابوك خلص ويدوب دي لقمه علي ما أوسوم .

انا : طيب ما كنتي عملتي عتس أحسن .

امي : العتس ياخويا دلوقتي الكيلو بتلاته جنيه ونص . يعني اغلي من الخضار .

.. ثم اخذت نفسها واستكملت الحكي .. وهي تبتدي في الاكل .. الحياة بقت غاليه قوي يا بني . ومش عارفه احنا لولا المعاش بتاع الله يرحمه كنا ملقناش ناكل ..

أنا: ان شاء الله يااما انا من بكره هدور عي شغل هحاول اروح الشركة اللي كنت شغال فيها زمان .

أمي : يابني الشركة دي انا روحتلها لم اكنت انت تعبان محدش منهم عبرني . وبعدين سمعنا من فتره ان الاجانب اشتروها . وبقت نظام انجليزي . ومبيشغلوش مصرين

أنا : بس انا ليا علاقاتي هناك اكيد زمايي اللي كانو من سني دلقتي بقو حاجه كبيره .

أمي : يا رب يا بني . يكرمك ويفتحها في وشك

واكلنا مع بعضنا البعض .. وقومت ارتاح .. شويه لاستعد لسهره الليل مع عبده . علي هذا المجهول المدعو انترنت ..



استيقظت في حوالي الساعه السابعه مساءا .. علي دقات الباب .. انه عبده . فتحت امي الباب ...

عبده : مساء الخير يا حاجه . لؤي موجود

أمي ا: ايوه يا بني ده نايم استني اما اشوفه

أنا: انا صاحي يا عبده 5 دقايق هغير هدومي وانزل معاك ..

غيرت هدومي ونزلنا روحنا الانترنت كافيه اللي شغال فيها عبده .طبعا كان مظلما وموسيقي صاخبه .. استغربت جداا من اللي شوفته .. عيال صغيره من 5 سنين ل 14 سنه قاعدين قدام الشاشات وعمالين يجو يمين ويجو شمال وعمالين يشتموا بعض ويشتموا الشاشة بألفاظ ما أنزل الله بها من سلطان .. قمة في قلة الأدب

أنا : ايه ده يا عبده ايه قلة الادب اللي العيال فيها دي .

عبده : هما بيطلعوا همهم في الكمبيوتر اللي هربان من درس واللي ابوه منكد عليه واللي صحبته قالباه ..استني انت لسه شوفت حاجه هروح امسك الوقت أوجيلك .. تشرب ايه .

أنا : هربان .. منكد .. صحبته .. طيب هشرب اي حاجه سقعه .

جابلي عبده الحاجه الساقعه ووقفت أمام الانترنت كافيه أتأمل هؤلاء الصبية . انهم ما زالوا في عمر الزهور ويسبون بعض بأقذر الشتائم ولا يعانون ان تكون جالسه بجوارهم بنت أو سيدة كبيره فقد أزيلت مل القيم .. والأداب ..

واستطردت في التفكير.. كيف أهلهم يساعدوهم علي هذا ويعطوهم النقود التي يضيعونها هباء .

قاطع تفكيري كلمة عبده .

عبده : ايه يابني سرحان في ايه ..؟؟

أنا : لا أبدا بس بفكر في حال العايل دي بقه كده ازاي ده البلد خربت خالص .

عبده وعلاما ت اليأس علي وجهه . ياااااااااااه من زماااان

أنا : المهم النهارده ياعبده اتعرفت علي واحده بالصدفة وادتني البسنجر بتاعها

عبده: بسينجر ايه يااعم اسمه مسينجر .

انا : ألا صحيح ايه المسينجر ده يا عبده .

عبده : ياااه دي حاجه كده زي التليفون بتكلم وتشوف ناس من علي الانترنت .. ده دلوقتي العيال دول كل واحد منهم عنده مسينجر .

أنا : يا رااجل .. طيب اجراءاته ايه .؟؟

عبده : هاهاهاهاها اجراءات ايه ياعم . انت بتعمل بطاقة .. دي بسيطه خاالص . تعالي اعملك واحد كده .

انا : يلا ياخويا مادام ببلاش اعملينا اتنين تلاته واتوصي ..

فجلسنا أمام احد الشاشات .. وابتدت تختلف الاضاءه علي وجوهنا من سرعه اختلاف الشاشات اللي بتطلع وتنزل .. قدامي

أنا : مستغرب ومش فاهم حاجه .؟؟؟ ايه ده كله انا مش فاهم حاجه يا عبده ..

عبده : اصبر بس هانت اهوه اخلص بقية البيانات دي وتبقي خلاص من أصحاب المسينجرات .

أنا : ساعتها حسيت اني هبقي من أصحاب الملك مثلا وانشكحت قوي .. وكان يقتلني الفضول لأعرف هذا الشئ.

عبده : مبروك يا سيدي .. ايميلك اهوه استني افتحهولك . المهم كتب الايميل وفتحه روحت فتحت الورقه اللي كتبت فيها ايميل جميله

قولتله خد طيب المسينجر ده .

عبده : هات كده .. تك تك تك .. @ ... add ...استني لما توافق

انتظرنا لحظات مفيش حاجه حصلت

عبده : الظاهر صحبتك مش موجوده ياعم . دلوقتي .

أنا إزاي مش بتقول زي التليفون . يبقي اكيد بيرن عندها دلووقتي .

عبده . يرن ....طيب انت شكلك هتقضي عليا يا لؤي النهارده ..

عبده . استني استني اهيه دخلت أونلاين .

أنا : ببص ورايا .. فين فين ؟؟ انت عرفتها ازاي .

عبده : ياعم اصبر اهيه قدامنا ع الكمبيوتر ..

أنا : طيب كلمها كلمها ..

عبده : حاضر يا سيدي اصبر بس .

أنا : قولها انالؤي ..

عبده ... وااااو .. يخرب عقلك يالؤي ده لو دي صورتها تبقي طلقه .

أنا : فين فين ؟؟

عبده اهيه في الجنب يابني.

اذا بصوره مصغره في الجنب لبنت شعرها اسمر . ومتجعد . وبشرتها خمريه وعيناها شديده السواد .. قمة في الجمال .

أنا .. دي اقل حاجه يا بني عندي

عبده .ههههههههه ياعم اجري اجري .. المهم خد الكاي بورد اهيه ودوس ع الحرف عشان تعمل الكلمه وبعد كل كلمه دوس هنا علي المسطره .

أنا : استني طيب متسبنيش .

عبده : انا موجود هشوف بس الناس .

أنا: جلست امام لوحة المفاتيح . لأاكتب انا لؤي .

لقيت في كلام بيظهر .:

البنت الجميله الحلوه : هاي !!!

أنا : اعمل ايه اعمل ايه .

البنت الجميله الحلوه : هااااي !!! حد هنا ؟؟

أنا : يااعبدووووووووووه ياا عااابدووووووووه ..

عبده : ايوه خير.. في ايه

أنا : الحق إلحق البت بتقولي هاي ..

عبده خضتني ياعم ما تقولها هاي ..

أنا ازاي ..

عبده : يوووووه قدامك اهوه .. وكتبلها هاي

البنت الجميلة الحلوه : مين معايا ؟

أنا علي يد عبده : انا لؤي اللي اتكلمنا في التليفون النهارده .

البنت الجميله الحلوه : أه أه افتكرتك ازيك يا لوولوو .

أنا : ههههههه شوفت يا عبده أنا بدلع ..

عبده شكلها . موزه موزه يعني ..

أنا : ايه حكايه الموز معاكو يا جماعه .

عبده : أقصد فرده يعني .

أنا: فرده ايه بس .

عبدع : شجرةة موز يا سيدي .

أنا : ألله .. في ايه المهم مش بتقول في صوت .؟؟ انا عايز اكلمها

المهم قالها عايز نتكلم ميك وابتدي اجراءات الصوت وركب السماعه والميكروفون علي وداني .

أنا: ألووه .ألووه

البنت الجميلة الحلوه : ألوه .. إزيك .

أنا: الحمد لله بخير. انتي صوتك بعيد قوي . انتي سافرتي بره ولا ايه ؟؟

البنت الجميله الحلوه : ضحكة الضحكه الي ضحكتها في التليفون .. لأ هو بس تلاقي الانترنت بطئ شويه .

أنا .. طيب يا ستي .. انا سمعت اننا ممكن نشوف بعض من الكمبيوتر

البنت الجميله الحلوه : هاها .. مره واحده نشوف بعض .

أنا : هو ممكن علي مرتين

البنت الجميلة الحلوه : هاها ها .. ده انت نكته لأ بس لازم نتعرف ع بعض اكتر .

أنا : نتعرف وماله ..

وظللنا نتحدث في اشياء كتيره ..منها ما هو هااايف ومنها ما هو أهيف من انه يكون هايف... حتي قالت لي مقوله .. ظلت تتردد في أذني . لعدة ثواني .. تلك الكلمه هي ....



...



تتبع ..



(الحلقة القادمة هنعرف ايه الكلمة وايه اللي هيحصل بعد ما تقول الكلمة دي .؟؟؟ )

هههههههههههههههههههههههههههههههههههههههههههههههههههههههههههههههههههههههههههههههه
هههه
ربنا يستر ومايروحش فيها لما يسمعها
جميله اوى الحلقه دى
بجد الحلقات كلها تحفه

تسلم ايدك
منتظرين الحلقه التامنه
تحياتى لك

خير يا هل تري قالتله ايه ياعم لؤي ....

ألا صحيح يا واد بتاع بنات انت اسمك ايه ؟؟؟؟

القصه روعه فعلا .. وشكلها عاجبه الناس

يااااااااااااااااااااااااترى فين صاحب القصه.......وهتكملهنا امتا بصراحه قصه جامده.......نتمنى تكملها