منتديات جزيرة الاحلام > راديو؟... تليفزيون؟؟؟ .. وكمان موبايل؟؟ ازاااي؟

المساعدة - البحث - قائمة الأعضاء - التقويم

راديو؟... تليفزيون؟؟؟ .. وكمان موبايل؟؟ ازاااي؟

منتديات جزيرة الاحلام > شاطىء العلوم و المعرفه > العلم نور > بنك المعلومات

Without Fear

Sep 18 2005, 11:53 AM

Signal Modulation.. يعني بالعربي تجسيم الموجات!!

السلام عليكم ورحمة الله

انا هتابع معاكم بقية الموضوع اللي بقيته عن الموجات وارسال واستقبال الموجات (برغم ان الحمد لله ماحدش تابع الا اكرم وناجي :D )

لكن الموضوع فعلا جميل ومشوق واحنا بدأنا في الجزء الاصعب دلوقتي فيارب اقدر اوصله باسهل ما يمكن:

في اخر موضوعنا اتكلمنا عن ان الموجات بتبتدي قوية جدا وكل ما زادت المسافة اللي بتقطعها بتضعف الموجة لغاية لما بتختفي!

وقولنا اننا هنتكلم عن الطريقة اللي قدرو يتغلبو بيها على المشكلة دي

والطريقة والفكرة محتاجة شوية تخيل وانتباه مننا وان شاء الله هنقدر نتخيلها ونصورها زي ما بتحصل في الطبيعة:

خلونا نتخيل موقف

الشباب عندنا عايزين ينقلو حبل طويل من الواحة العامة لغاية المديرية مثلا :D

مين اللي هيتطوع من الشباااااب؟

اختار انا ....

اكرم (هاخدك بقى assistant علشان كنت نشيط معايا في الحصة اللي فاتت :P ) ... اممممم .. وهاخد ماتريكس كمان ... وشاشو :D وسيسو :P ...

لما يجو يشيلو الحبل هيبقى المنظر كالتالي

user posted image

جميل كده؟

طيب لاحظو معايا ان كل واحد فيهم شايل جزء من الحبل والباقي نازل لتحت (بالظبط نفس شكل الموجة) ...

طيب دلوقتي الشباب بدأو يمشو على الواحات كلها .. وكل شوية يتعبو اكتر ... اعتقد يعني على ما يوصلو للمديرية هيكونو ساحبين الحب معاهم مش شايلينه :P

صح؟

طيب اكرم وماتريكس وشاشو وسيسو قررو التالي .... هيجيبو اخوانهم الصغيرين يشيلو معاهم الحبل ... وعلى الاقل الحمل هيتوزع عليهم كلهم

هيبقى الشكل كالتالي:

user posted image

(طبعا سيسو الاولاني خالص على اليمين .. قالهم اان الادمن مش هجيب اخواتي اتصرفو انتو :P )

دلوقتي الحمل اللي كان متوزع على شخص واحد بقى متوزع على كذا شخص ... وبالتالي هيقدرو يوصّلو الحبل على المكان اللي هم عايزينه ويكون لسة فيهم حيل :D

طيب خلونا نتخيل حاجة

لو شيلنا الحبل وخليناهم ماشيين بنفس الترتيب .. هيبقى عندنا ايه؟

اوريكم الصورة هتبقى ازاي

user posted image

اللي حصل دلوقتي اني شيلت الحبل .. لكن لسة الشكل اللي الحبل مكونه موجود قدامنا .. مش كده ولا ايه؟

Without Fear

Sep 18 2005, 12:00 PM

ده بالظبط اللي بيحصل في حالة الموجات لما بنبقى عايزين ننقلها من مكان للتاني

بنجيب الموجة الاصلية

user posted image

وبنخلي موجة تانية تشيلها .. بس الموجة التانية بتكون اسرع بكتير من الموجة دي (بيبقى ترددها اعلى) ... الموجة الجديدة اللي هتشيل الاولانية اسمها الموجة الحاملة (carrier signal)

user posted image

خلو بالكو ... اللي هتتنقل هي بس الموجة الزرقا ....

user posted image

فتخيلو بقى لو كان ده التردد اللي هننقل بيه ... يبقى ضاعت مننا نص المعلومات اللي الموجة بتحتوي عليها!! (بجد شكلها مشــــــــــــــوّه اوي)

طيب خلونا نعمل الموجة ا لحاملة بتردد عالي (يعني عدد موجات اكتر في وقت اقل) ... ونشوف الوضع هيبقى ازاي:

user posted image

طيب جميل ... لو من غير الموجة الاصلية بقى:

user posted image

تقريبا نفس الشكل ... مش كده ولا ايه؟

بس فيه نقطة مهمة ... احنا الموجات اللي بننقلها دي موجات صوت في الاغلب ... يعني بردو احنا محتاجين كووووووول اللي موجود على الموجة الاصلية!!!

في حين اننا في الموجة الجديدة لاحظنا ان فيه حتت قوة الموجة فيها منعدمه!! (اللي هي الاجزاء اللي تحت)

العلماء فضلو يفكرو طيب ننقل الجزء ده ازاي؟؟؟؟

هنشوف دلوقتي

Without Fear

Sep 18 2005, 12:03 PM

خلينا بدل ما نبعت موجة واحدة .. نبعت موجتين ... واحدة موجبة وواحدة سالبة!!

(يعني الموجتين معكوستين .. الوقت اللي بتكون فيه الاولى عند اعلى نقطة تبقى التانية عند اقل نقطة... )

user posted image

جميل كده؟؟

ونعمل نفس العملية اللي فاتت باضافة الموجة (الحاملة)

user posted image

جميل جدا ... نشوف الشكل النهائي بقى ازاي؟؟

user posted image

ادي الشكل النهائي للموجة اللي هتتبعت.... فكرة خطيرة مش كده؟؟

اهو الاجزاء اللي كانت هتتمحي (لان قيمتها كانت صفر!) دلوقتي بقى ليها قيمة هتتنقل بردو (حتى لو سالبة بس المهم المعلومات بتتنقل)

انتو هتقولولي يعني ايه سالبة وموجبة والهبل اللي انتي بتقوليه ده .. بس هقولكو نرجع لمثال المية ... ونعتبر سطح المية العادي هو الصفر .. والجزء اللي اعلى منه الموجب والجزء اللي اوطى منه السالب!!

Without Fear

Sep 18 2005, 12:05 PM

اللي بيتم في العملية دي اسمه تجسيم الموجة

Signal Modulation

والموجة اللي هتكون بتردد اعلى هي اللي هتتبعت من اجهزة الارسال وهنسميها الموجة الحاملة (Carrier Signal)

والموجة الاصلية هنعتبرها زي قالب الكيك اللي بنصب فيه العجينة وتتشكل فيه وندخلها الفرن على ما تستوي وتاخد شكل القالب .. وبعدين هنشيله ونستخدم اللي جوى

يعني زي الظرف بتاع الجوابات (على اد الظرف هتحاول تتني الورق بحيث انه يكفيه) ... علشان كده بيسموها Envelope Signal (موجة الظرف)

ادي الموجة اللي بتتبعت بقى وبتتم بيها كل انتقالات اصوات الراديو (قنوات الAM بس) وارسال الموبايل وموجات اللاسلكي

النوع اللي انا شرحته ده اسمه (تجسيم الموجة حسب ارتفاعها) (Amplitude Modulation) لان الموجة الحاملة هتاخد الشكل الخارجي للموجة بس

فيه نوع تاني متقدم اسمه (تجسيم الموجة بالتردد) (Frequency Modulation) .. وده اللي بيتم بيه نقل محطاة الاذاعة على ال FM لو حبيتو هبقى اشرحه كمان بس في الاخر لما نفهم بالظبط اللي بيحصل في العملية دي...

Without Fear

Sep 18 2005, 12:08 PM

الجزء التاني من الكلام هيكون عن الارسال والاستقبال وازاي هنعمل الموجة الحاملة دي؟ وازاي هتركب على شكل الموجة الاصلية وازاي هتتبعت وازاي هنستقبلها ونرجع الموجة لشكلها الاصلي؟

الموضوع كله هيتلخص في شكل واحد

user posted image

شرح اللي بيحصل بسيط جدا ...

في جزء الارسال .... الموجة نستعملها مرتين .. مرة بنفس شكلها الاصلي ومرة معكوسة .... الاتنين هيدخلو على عملية تجسيم الموجة (بجهاز اسمه جهاز الاهتزاز الداخلي (Local oscillator) )

جهاز الاهتزاز الداخلي بيعتمد على اصدار اهتزازات بسرعة كبيرة جدا (يعني تردد عالي)...
ولما بتدخل الموجة عليه بتاخد الموجات اللي مصدرة داخله شكل الموجة اللي جاية من بره (موجة الظرف) ...
والناتج من تجسيم الموجة العادية والمعكوسة هيتجمعو مع بعض
ويتبعتو عن طريق ايريال (Antenna)

هيكون في جهاز الاستقبال كمان Antenna (ايريال) ... هيستقبل الموجة بالتردد العالي .. ويعملي عليها شوية عمليات الهدف منها فلترة الموجة

هتسألو يعني ايه عملية فلترة

هقولكو يعني زي الفلتر بتاع المية .. بيسمح للمية بالنزول ... ويمنع الشوائب ...

او زي المصفاة

او نعتبرها زي الباب ... هتخلي الشخص الرفيع يدخل (يعني التردد المنخفض او الموجة الابطأ) ... والشخص التخين مش هيقدر يدخل (يعني التردد العالي او الموجة الاسرع)

وفي الاخر هتطلع معانا الموجة اللي بعتناها في الاساس

ادي كل اللي بيحصل في الحالي العادية...

طيب يا ترى .. احنا كده عرفنا نبعت ونستقبل... لكن لسة معرفناش ازاي نتخلص من الازعاج او الدوشة اللي بترافق موجات الصوت؟؟

وسؤال تاني... احنا قولنا اننا بنتعامل مع موجات صوت .. وبنرسل ونستقبل موجات صوت ... طب ليه واحنا ماشيين في الشارع مش بنسمع الصوت ده؟؟؟ وبخاصة الموجات المنقولة .. دانت تخيل انت واقف في محطة المترو وحواليك 20 واحد بيتكلمو في الموبايل ... بس انت مش سامع الكلام برغم انه منقول قدام عنيك في الهواء اللي حواليك ... ازاي تقدرو تفسرو ده؟ ولا فير بتضحك عليكم بقالها اسبوع <_< ؟؟؟

سؤال تالت: الدنيا حوالينا زحمة جدا ... زحمة موجات منقولة ... انت اتصلت وبترسل وتستقبل صوت اللي بتكلمه ... وغيرك وغيرك كتييييييييييييييييير جدا طيب ازاي وصلك صوت الشخص اللي انت بتكلمه؟ وليه على الموبايل مابتكونش بتكلم صاحبك تلاقي ابن الجيران معاك على الخط في نص المكالمة؟ ايه معنى ان اذاعة صوت العرب على التردد الفلاني واذاعة القرآن الكريم على التردد كذا؟ وحتى قنوات التليفزيون!!

سؤال رابع: انت كده قدرت تخلي الموجة قوية جدا... بس ياترى هل قوتها دي تقدر توصلها الاردن؟؟؟ او حتى سوريا (مع العلم ان اذاعات مصر اغلبها بتقدر تسمعها من برة مصر) ... ازاي كل ده بيحصل؟

وسؤال خامس ... ايه اللي بيخلي راديو ب 20 جنيه .. وراديو تاني ب 200 جنيه؟؟

وسؤال سادس ... احيانا بتكون بتسمع محطة اذاعه تلاقي محطة تانية بتشوش عليها!! ليه بيحصل ده؟

وسؤال اخير: ايه حكاية (الهاتف الذي طلبته لا يمكن الاتصال به حاليا.. من فضلك اعد الاتصال في وقت اخر) وايه حكاية (Number busy) دي كمان؟؟

الاسئلة دي كلها هجاوب عليها ان شاء الله في تكملة الموضوع

واتمنى اكون قدرت اافيدكو شوية واوصل الشكل العام على اد ما اقدر

akrm-nagy

Sep 18 2005, 01:25 PM

عنى وجعتنى من القرأة

اصل انا قرأتة بتفحص شديد علشان افهم

هريح شوية وابقى ارد

Without Fear

Sep 19 2005, 08:54 AM

خلاص وانا في الانتظار

akrm-nagy

Sep 19 2005, 02:15 PM

نسيت اللى انا قرأتة

هقرأ تانى على السريع

لحظة

akrm-nagy

Sep 19 2005, 03:16 PM

اولا:

اية اللى انتى عملتية دة

بقى انا احمد بن كرم أل ناجى اتبهدل البهدلة دى واشيل حبال وكمان اجيب اخواتى الصغار وابهدلهم معايا ....ماشى :angry:

ثانيا : موضوع جمييييييييل جداااااااااااااااااا

بس انتى مش بتعرفى تشرحى

ولولا انى ذكائى خارق للعادة واكثر مما يتصورة العقل الانسانى ...والحيوانى ايضا

مكنتش فهمت حاجة :P :P

لالالالا بس بجد يا فير انا حاسس ان لو حمار قرأ الموضوع هيفهمة

QUOTE

طيب يا ترى .. احنا كده عرفنا نبعت ونستقبل... لكن لسة معرفناش ازاي نتخلص من الازعاج او الدوشة اللي بترافق موجات الصوت؟؟

هاهاها
ودى محتاجة ذكاء ..بالفلتر طبعا

QUOTE

وسؤال تاني... احنا قولنا اننا بنتعامل مع موجات صوت .. وبنرسل ونستقبل موجات صوت ... طب ليه واحنا ماشيين في الشارع مش بنسمع الصوت ده؟؟؟ وبخاصة الموجات المنقولة .. دانت تخيل انت واقف في محطة المترو وحواليك 20 واحد بيتكلمو في الموبايل ... بس انت مش سامع الكلام برغم انه منقول قدام عنيك في الهواء اللي حواليك ... ازاي تقدرو تفسرو ده؟ ولا فير بتضحك عليكم بقالها اسبوع <_<

ممكن تكونى بتضحكى علينا .!!
مش استبعدها عليكى

لكن اعتقد ان الموجات بتتضارب مع بعضها وهى فى طريقها للأذن ومفيش حاجة بتوصل فى الاخر

يعنى مثلا 20 عربية عايزيين يدخلوا نفق واحد فى نفس الوقت
كلهم بيعملوا حادثة ومحدش فيهم بيدخل

QUOTE

سؤال تالت: الدنيا حوالينا زحمة جدا ... زحمة موجات منقولة ... انت اتصلت وبترسل وتستقبل صوت اللي بتكلمه ... وغيرك وغيرك كتييييييييييييييييير جدا طيب ازاي وصلك صوت الشخص اللي انت بتكلمه؟ وليه على الموبايل مابتكونش بتكلم صاحبك تلاقي ابن الجيران معاك على الخط في نص المكالمة؟ ايه معنى ان اذاعة صوت العرب على التردد الفلاني واذاعة القرآن الكريم على التردد كذا؟ وحتى قنوات التليفزيون!!

ما أهو انتى جاوبتى على نفسك

كل موجة وليها تردد معين غير الموجة التانية وطول موجى كمان غير التانية

QUOTE

سؤال رابع: انت كده قدرت تخلي الموجة قوية جدا... بس ياترى هل قوتها دي تقدر توصلها الاردن؟؟؟ او حتى سوريا (مع العلم ان اذاعات مصر اغلبها بتقدر تسمعها من برة مصر) ... ازاي كل ده بيحصل؟

الله اعلم يا فير
عدت عليا الحتة دى... :blink: بس اعتقد ان ممكن يكون بمكثف مثلا زى الليزر كدة

وسؤال خامس ... ايه اللي بيخلي راديو ب 20 جنيه .. وراديو تاني ب 200 جنيه؟؟

بسيطة قوى...!
دة صناعة مصرية ودة صناعة برة

QUOTE

وسؤال سادس ... احيانا بتكون بتسمع محطة اذاعه تلاقي محطة تانية بتشوش عليها!! ليه بيحصل ده؟

المحطات بترخم على بعضها

لالالا
جايز ان الترددات بتقرب من بعضها مثلا

QUOTE

وسؤال اخير: ايه حكاية (الهاتف الذي طلبته لا يمكن الاتصال به حاليا.. من فضلك اعد الاتصال في وقت اخر) وايه حكاية (Number busy) دي كمان؟؟

اوفففففف خنقتينى اسئلة

تلاقى الموضوع دة مطلوب منك فى الكلية بحث ولا حاجة
وقلتى تستغلى عبقريتى فى الاجابة على الاسئلة دى

انا عارف كدة من الاول بس يلا
اعمل الخير وارمية البحر

اقولك يا ستى لما بيقول الهاتف الذى طلبتة لا يمكن التصال بة حاليا

بيكون الهاتف خارج التغطية

ولما يكون مشغول

بيكون اللى بتتصلى بية بيتكلم مع حد تانى بس

أ. د/ احمد كرم

Without Fear

Sep 21 2005, 08:29 AM

QUOTE

بقى انا احمد بن كرم أل ناجى اتبهدل البهدلة دى واشيل حبال وكمان اجيب اخواتى الصغار وابهدلهم معايا ....ماشى :angry:

علش بقى يا اكرم :D ماهو لما بتشارك بتفهم اكتر :D

QUOTE

ثانيا : موضوع جمييييييييل جداااااااااااااااااا

بس انتى مش بتعرفى تشرحى

:D ربنا يخليك وانا فعلا مش بعرف اشرح :D وحتى الشرح العلمي بتاع الدكاترة في الكلية مش بحبه وبحاول افهم العمليات كلها على انها حبال وشيل وحط :D

QUOTE

لالالالا بس بجد يا فير انا حاسس ان لو حمار قرأ الموضوع هيفهمة

دي شتيمة ليا بقى لاني السنة اللي فاتت درست المادة دي .... ودخلت امتحان الميد تيرم مش عارفة احل اي حاجة <_<

(بس طبعا لو العملية رغي كده كنت فلحت بس المشكلة كانت ان كلها معادلت و cos و sin و laplace و frequency domin و forrier transform و forrier series ووحاجات ربنا مايوريهاك :unsure:

QUOTE

هاهاها
ودى محتاجة ذكاء ..بالفلتر طبعا

تلميذ نجيب فعلا يا اكرم ... بس على فكرة الفلتر بيبقى ليه accuracy او دقة ... يعني فيه فلتر تقوله ماتخليش الا تردد 200MHz يدخل .. لو 201 مش هيدخله .. فيه فلاتر تانية بتسمح بدخول ترددات اكبر او اقل بمدى اكبر بكتير

بالاضافة لكده فيه موجات noise بتبقى بنفس تردد الموجة الاصلية ... ودي المشكلة الرهيبة اللي بتحصل لانها هتخرب الارسال فعلا

:D اقولك الحل ايه؟

الحل هو النوع التاني من الmodulation لانه بيعتمد على التردد ... انا هشرحه لو حبيتو بس محتاج شوية تخيل مننا

ومع الاسف معنديش هنا فوتوشوب او فلاش كنت رسمتلك اللي بيحصل بس ان شاء الله يوم الاحد هيكون الشرح موجود

QUOTE

ما أهو انتى جاوبتى على نفسك

كل موجة وليها تردد معين غير الموجة التانية وطول موجى كمان غير التانية

مش بقولك تلميذ نجيب؟!! فعلا هو ده الحل .. كل اذاعة بيكون ليها تردد معين .. وبالتالي لما بتظبط المحطة على تردد 89 مثلا .. بتقول للفلتر ماتخليش الا الموجات اللي ترددها 89 هي اللي تدخل بس

QUOTE

وسؤال خامس ... ايه اللي بيخلي راديو ب 20 جنيه .. وراديو تاني ب 200 جنيه؟؟

بسيطة قوى...!
دة صناعة مصرية ودة صناعة برة

هااااااااااهاهاهاهاها

:D :D لا مش كده

هقولك كمان شوية

وانا قولت الجواب على العموم في اول الرد ;)

QUOTE

المحطات بترخم على بعضها

لالالا
جايز ان الترددات بتقرب من بعضها مثلا

;)

QUOTE

اقولك يا ستى لما بيقول الهاتف الذى طلبتة لا يمكن التصال بة حاليا

بيكون الهاتف خارج التغطية

ولما يكون مشغول

بيكون اللى بتتصلى بية بيتكلم مع حد تانى بس

:D الجزء الاول من الاجابة صح ... بس التاني ماعرفناش نفسر حاجة ;)

بس اجوبتك ووجودك هنا يخليني اقولك (خسارتك في الاقتصاد يا اكرم :D ) بجد كنت هتبقى A student او كنت مهندس :D

Without Fear

Sep 21 2005, 08:29 AM

دلوقتي بقى اديلكم الاجوبة على الاسئلة اللي قولتها

Without Fear

Sep 21 2005, 08:54 AM

QUOTE

ردينا عليه طبعا

QUOTE

؟؟؟

اممم .. اللي بيحصل ان الانسان ليه مدى معين من الترددات اللي بيقدر يسمعه ... وده بيختلف من انسان لانسان بس في حدود .. لكن الحيوانات في الغالب بتبقى حاسة السمع عندها احد مننا بكتير .. فبتسمع الاصوات اللي بتكون بترددات اعلى من اللي احنا بنقدر نسمعها بمراحل

(علشان كده لما بيحصل زلزال او فيضان بنلاقي الطيور والحيوانات بتهرب من قبلها بفترة ومن قبل ما احنا بنحس باي حاجة لانها بتسمع اصوات الموجات الزلزالية وبتحس بيها وهي لسة في بدايتها)

واللي بيحصل في الموجات دي انها بتبقى بتردد صغير (اللي في حدود سمعنا) ... لكن لما بنعملها modulation ترددها بيرتفع جدا جدا وبدرجة اعلى بكتير من اعلى تردد احنا ممكن نحس بيه (اعتقد مدى سمع الانسان من 1KHz لغاية 10Kz )

بس مش متأكده من المدى لاني اخدته من 7 سنين تقريبا (في تانية ثانوي)

بس لما بيوصل للمستقبل ... وبيرجعه للتردد العادي بتاع الموجة الاصلية بينخفض التردد مرة تانية بحيث يبقى في مدى السمع بتاعنا

Without Fear

Sep 21 2005, 08:55 AM

QUOTE

اللي بيحصل انه فعلا بيكون لكل حاجة تردد معين ... يعني السما حوالينا متقسمة .. حاجات بتبعت على 100M ومحطات على 50M وهكذا ...

QUOTE

طبعا الموجة مش بتقدر تمشي المسافة دي كلها من غير ما تضعف

بس الارسال مش بيكون زي مانت قولت ب(اشعة ليزر)

لا ... فيه حاجات اسمها (محطات التقوية) ...

محطات التقوية دي بتستخم مع كل حاجة ... حتى مع خطوط التليفون العادية وخطوط الكهربا

الفكرة في محطات التقوية هي انها بتتحط على مسافات (بتبقى محسوبة طبعا) .. بحيث ان الموجة تكون فقدت شوية من قوتها ايوة لكن في حدود معينة

بيكون في محطات التقوية دي حاجة اسمها Buffer

الbuffer ده بيعمل ايييه؟

الbuffer ده هو 2 invertors ... ايه فايدة الinvertor ده؟ مش عارفة اجيبلكو تسمية عملية ليه .. لكن هو اللي بيعمله انه بيقلب اللي بيدخلله .. لو اديته 1 يطلعه صفر

(الinvertor ده على فكرة اساس صناعة كووووووول الرقاقات الالكترونية اللي هي بتاعه الكمبيوتر او اي اجهزة الكترونية)

فهيكون الوضع كالتالي ... هنفترض ان الموجة قوتها 5 فولت مثلا... من صفر لغاية 1.5 فولت هنعتبرها صفر

ومن 3.5 لغاية 5 هنعتبرها واحد

فالموجة بتدخل على البافر (فيه اتنين زي ماقولتلكو وهقولكو دلوقتي ليه)

بيقيس قوة الموجة عند كل نقطة ويشوف .. اذا لاقى قوتها من (3.5-5) هيعتبرها 1 وبالتالي الناتج هيتعكس وتبقى (0)
واذا لاقى قوتها من (0-1.5) هيعتبرها صفر وبالتالي الناتج هيطلع (1)

والنتيجة ان الموجه هتبقى معكوسة ... النقطة القوة هيعتبرها ضعيفة والعكس كمان ...

طيب نعمل ايه علشان نرجع الموجة لاصلها؟

هنحط كمان واحد قدامه بالظبط

بحيث ان الموجة المعكوسة هتدخل عليه وتتعكس مرة تانية فترجع زي ماكانت قبل ما تدخل على ال invertor الاولاني

هو ده البافر

هتقولولي ايه علاقة اللي انتي بتقوليه بتقوية الموجات؟

هقولكو التالي ... الموجة مشيت شوية ... خفت قوتها من 5 فولت ل 4 فولت ... هتدخل على الbuffer هيعتبرها 1 ... وفي النهاية هتطلع كمان 1 بس باييييه؟ ... بقوة (5 فولت مرة تانية)

يبقى كده كانك لسة مرسلها من المصدر!!

صح ولا غلط؟

QUOTE

وسؤال خامس ... ايه اللي بيخلي راديو ب 20 جنيه .. وراديو تاني ب 200 جنيه؟؟

السبب هو التصميم بتاع الفلتر نفسه ... ومدةى دقته في السماح للتردد المقصود بس بالدخول ...

فزي ما قولتلكو في الرد اللي قبل ده ... ان فيه فلاتر ممكن تتغاضى عن مثلا 1 او 2 ميجا زيادة او اقل

(يعني يكون المفروض يدخل 100 ميجا ... هيدخل قنوات من 98 لغاية 102 ميجا)

فيه فلتر تاني بيقى تصميمه ادق بكتير .. بحيث يسمح بمدى معين حوالين التردد اللي احنا عايزينه انه يدخل

يعني ممكن يدخل 99.5 او 100.5 لكن اقل او اكتر من كده بيقوله سووووري ممنوع الدخووول

Without Fear

Sep 21 2005, 08:59 AM

QUOTE

وسؤال سادس ... احيانا بتكون بتسمع محطة اذاعه تلاقي محطة تانية بتشوش عليها!! ليه بيحصل ده؟

المحطات فعلا بتكون قريبة من بعضها لكن مش بالشكل اللي انت اعتقدته يا اكرم

خلينا نقول الفلتر المفروض يدخل على تردد 100 ميجا

وهو الدقة بتاعته مثلا 3 ميجا

يعني هيدخل مححطات من المدى (97 لغااااية 103 ميجا)

ممكن يبقى عندنا محطة عند 97.1 مثلا ... والمحطة اللي احنا عايزينها عند 100

هنلاقي انه دخل القناتين مع بعض بس القناة اللي احنا عايزينها هتكون اقوى (وبرغم كده فيه قناة تانية بتشوش عليها ولو بصوت ضعيف)

علشان كده ....

شركات الاذاعة مثلا .. بيبقى محدد ليها مدى معين من الترددات تبث فيها ... علشان مانسمحش بان يبقى الفرق بين التردد قليل لدرجة ان الفلتر يسمح بدخول القناتين على الراديو!!

يعني يقولو قناة (أ) انتي هتبعتي على تردد 70 ميجا .... قناه (ب) على 75 ميجا) ... على الاقل يكون الفاصل بين القنوات (4 ميجا)

طيب ياترى ... لو وزعنا الترددات على القنوات .. شوفو عدد محطات الاذاعه الموجودة اد ايه ... لكن مهما كان مدى الترددات عالي فهو اكيد ليه حد

طب ازاي هنحل المشكلة دي؟؟

هيكون فيه قنوات بتبعت على نفس التردد ..... لكن !!!

الدول بترتب مع بعضها ... ان على ابعد احتمال مايكونش فيه في بلدين جنب بعض نفس التررد لاي اذاعتين ... يعني نفترض لبنان وسوريا ... مش هنلاقي فيهم قنوات على نفس التردد

لكن لو قولنا مثلا مصر والمغرب ... المسافة بينهم ابعد بكتير من ان اي موجة تقدر توصل هناك وبالتالي اي راديو يقدر يلقطها!!

تفكير منطقي ... مش كده؟؟

G M

Sep 24 2005, 08:18 PM

ايه كل ده .. يا فير..

ده انا فاتني كلام كتير قوي

akrm-nagy

Sep 25 2005, 12:34 AM

اقرأ بقى على مهلك واحدة واحدة

akrm-nagy

Sep 25 2005, 02:05 PM

QUOTE

QUOTE
ثانيا : موضوع جمييييييييل جداااااااااااااااااا

بس انتى مش بتعرفى تشرحى

:D ربنا يخليك وانا فعلا مش بعرف اشرح :D وحتى الشرح العلمي بتاع الدكاترة في الكلية مش بحبه وبحاول افهم العمليات كلها على انها حبال وشيل وحط :D

انا برخم عليكى....... انتى شرحك جميل فعلا

والدليل انى قلت

QUOTE

لالالالا بس بجد يا فير انا حاسس ان لو حمار قرأ الموضوع هيفهمة

QUOTE

بس اجوبتك ووجودك هنا يخليني اقولك (خسارتك في الاقتصاد يا اكرم :D ) بجد كنت هتبقى A student او كنت مهندس :D

والنبى متفكرنيش.....اهئ اهئ اهئ

مش عرفتى اللى حصل .....اهئ اهئ اهئ

مش انا حولت تانى من قسم اقتصاد لمحاسبة ...واااااااااااااااااااااااااااااء

:( :( :(

QUOTE

انا فهمت السؤال دة غلط
انا فهمت انة لما عشرين واحد بيتكلموا مع بعض مش بسمع حد منهم لية والكلام بيدخل فى بعضة وضربت مثال النفق

QUOTE

بس الارسال مش بيكون زي مانت قولت ب(اشعة ليزر)

انا مقولتش اننا نرسل بشعاع ليزر ...
تحميل الموجة على شعاع ليزر لما نكون هنبعتها القمر مثلا يعنى فى العدم

انا قلت نكثف الموجة زى ما بيتم تكثيف الليزر ولا انتى مش قرأتى عنة

QUOTE

هقولكو التالي ... الموجة مشيت شوية ... خفت قوتها من 5 فولت ل 4 فولت ... هتدخل على الbuffer هيعتبرها 1 ... وفي النهاية هتطلع كمان 1 بس باييييه؟ ... بقوة (5 فولت مرة تانية)

طب افرضى الموجة ضعيفة والبافر اعتبرها صفر يبقى هيعكسها ويطلعها صفر
ثم انتى قولتى البافر بنسق القوة لجزئين (3.5-5 ) و(0- 1.5)

طب الموجة اللى من 1.5 لـ3.5 تروح فين؟؟؟

ومش كملتى لية ؟؟؟

Without Fear

Sep 26 2005, 02:52 PM

QUOTE(G M @ Sep 24 2005, 09:18 PM)

ايه كل ده .. يا فير..

ده انا فاتني كلام كتير قوي :(

:D ههههههههههه ... معلش بقى يا جي

بس اعتقد انه سهل جدا

بس نصيحة ابتدي بالجزء الاول علشان يبقى عندك خلفية عن الكلام اللي بدينا فيه هنا ^_^

Without Fear

Sep 26 2005, 03:04 PM

QUOTE

انا برخم عليكى....... انتى شرحك جميل فعلا

وعلى فكرة انا كمان برخم عليك :D

QUOTE

مش انا حولت تانى من قسم اقتصاد لمحاسبة ...واااااااااااااااااااااااااااااء

!!!!!!! ليه كده؟؟؟

QUOTE

انا قلت نكثف الموجة زى ما بيتم تكثيف الليزر ولا انتى مش قرأتى عنة

اعتقد سمعت عن حاجة زي دي بس مافهمتش قصدك من الجواب يمكن

QUOTE

طب افرضى الموجة ضعيفة والبافر اعتبرها صفر يبقى هيعكسها ويطلعها صفر

QUOTE

ثم انتى قولتى البافر بنسق القوة لجزئين (3.5-5 ) و(0- 1.5)
طب الموجة اللى من 1.5 لـ3.5 تروح فين؟؟؟

ماهو ده اساس الهندسة يا اكرم .. انك تتغلب على المشاكل وتحاول الحصول على افضل نتيجة

البافرز هي عبارة عن دوائر الكترونية (ترانزيزستور) ... والترانزيزتور بيتقدم بالدراسات وبيتطور ... وكل ما بيتطول بتبقى قدرته على الاستجابة للموجات او للكهربا يعني افضل

علشان كده البحوث والعلماء مسؤولين على انهم بقدر الامكان يصغرو المدى اللي البافر فيه مابيقدرش يعرف هل ده واحد ولا صفر (اسمها منطقة عدم التعريف او undefined region)

والبافر الافضل طبعا هو اللي بيكون المنطقة دي فيه اصغر ما يمكن

Without Fear

Sep 26 2005, 03:06 PM

QUOTE

ومش كملتى لية ؟؟؟

هكمل والله حاضر بس الاسبوع ده كان مكثف جدا بالنسبالي في الكلية علشان مشروع التخرج بتاعي

(على فكرة هبقى اشرحهولكو قريييب جدا لانه جميل جدا)

فبكرة ان شاء الله هيكون عندي وقت الصبح ..ز فهكمل الموضوع وابتدي مع الطيران ان شاء الله

akrm-nagy

Sep 26 2005, 03:27 PM

انا عدى سؤال جايز يكون ملوش علاقة بالموضوع خالص

لية دائما لما بنتفرج على برنامج فى التلفزيون

وحد من المشاهدين يتصل بالبرنامج يقوم المذيع يقولة وطى صوت التلفزيون

انا حاولت افسرها اجتهادى معرفتش

فقلت مفيش غير البشمهندسة فير

اوعى تكسفينا

Without Fear

Sep 27 2005, 12:33 PM

QUOTE(akrm-nagy @ Sep 26 2005, 04:27 PM)

السبب بسيط جدا يا اكرم

وهو ان بين ارسال التليفون وارسال التليفزيون فرق في السرعة

وبالتالي .. لما انت بتسمع التليفزيون .. بيبقى فيه شوية تأخير في وصول الارسال (time delay)

فبالتالي .. لما بتتصل بالمذيع ويكون على الهوا ... بيبقى صوته اللي جاي عندك في التلفزيون جاي متأخر شوية (على ما بيطلع للقمر الصناعي ويجي) ...

فلما بيكون الصوت عالي ... بيبقى فيه زي صدى صوت ... يعني بتسمع الكلمة منه على التليفون .. وبعدها بثواني بتسمعها عل ىالتليفزيون ...

والصوت العالي كمان بيوصل للمذيع من التليفون .. فبيبقى مزعج جدا وفيه صدى واضح جدا

ف(وطي صوت التليفزيون ) بتبقى علشان انت تسمع كويس اللي هو بيقوله ... وعلشان يبقى كلامك واضح في التليفون وانت بتتكلم معاه على الهوا

بس ادي السبب يا سيدي

Without Fear

Sep 27 2005, 12:34 PM

ايه حكاية (الهاتف الذي طلبته لا يمكن الاتصال به حاليا.. من فضلك اعد الاتصال في وقت اخر) وايه حكاية (Number busy) دي كمان؟؟

كان فاضل بس اخر سؤال اللي انا ماجاوبتش عليه ...

بالنسبة للهاتف المتحرك الذي طلبته لا يمكن الاتصال به حاليا ... فاكرم جاوب عليها وقالنا انه بيكون خارج نطاق التغطية .... او في منطقة مش بيوصلها ارسال ...

ده مابيحصلش بس لما بتكون انت برة المدينة مثلا او في الصحرا بعيييد جدا عن البر بس .... لكن ممكن تحصل وانت ف وسط المدينة ... يعني المرفوض الارسال هناك يكون اقوى ما يمكن

بس خلونا نراجع على حاجة ... الاتصالات على الموبايل دي اكيد لا سلكية ... واكيد كمان بتنطبق عليها بالتالي كل اللي اتكلمنا عليه في الموضوع ده والموضوع اللي فات

فاللي بيحصل ان الموجات الصوتيه زي موجات الضوء مثلا ... لو انت فاتح النور في الغرفة .. وبعدين دخلت الدولاب .. وقفلت الباب كويس ... بتلاقي الدنيا ضلمة تماما على الرغم من ان فيه نور برة ...

لكن انت دخلت ف وسط عازل منع وصول الموجات الضوئية ليك ... وده تماما اللي بيحصل مع موجات الصوت ممكن تكون ف مكان عمل كعازل لموجات الصوت فماقدرتش توصل للantenna بتاعه الموبايل

احنا مثلا في الكلية عندنا في كتير من المباني الجديدة مبيبقاش فيها أي ارسال ... والسبب ف كده انهم صممو الجدران بحيث تمنع وصول أي موجات صوتيه للموبايلات بالذات

هتسألوني طيب انتي بتهرجي ولا أيه؟؟؟ يعني لو شغلنا راديو مش هيوصل أي ارسال ولا أي حاجة .؟؟؟ ده مش منطقي

هقولكو لا ... بس خلينا نشوف كده صاحبتنا الموجة

لو جينا نجيب مثال الموجات الضوئية ... نتخيل احنا وافقين في الشمس برة ... هيكون الضوء شديد جدا جدا ... طيب ندخل الغرفة ونقفل ازاز الشباك ... قلت الاضاءة شوية ... طيب ده لو كان الازاز شفاف ... طيب لو كان الازاز مش شفاف؟؟ هيبقى الضوء اضعف واضعف ... وهكذا ... يعني المواد كلها بتختلف في قدرتها على صد او عزل الموجات اللي بتقدر تخترقها

وده اللي بيحصل في الموجات التانية كمان...

كمثال ... اشعة اكس او الاشعة السينية يعني ... اللي بيستخدموها لفحص كسور العظام .. الاشعة دي قوية جدا (قوية جدا يعني اييييه؟؟؟ .... :D مذاكرين كويس اهو ... صح .. قوية جدا يعني ترددها عالي جدا )

وبالتالي بتقدر تخترق الجلد ... واللحم .. بس العضم بيبقى اقوى منها فمش بتقدر تخترقه...

كمان مثال؟ ... الموجات فوق الصوتيه للي بيصورو بيها الجنين في بطن امه ... كمان بتقدر تخترق الجلد وصولا للرحم اللي فيه الجنين ...

ده كمان بيجري على الموجات الصوتيه ... كل مازاد تردد الموجات بتزيد قدرتها على الاختراق ...

فاذا عملنا تجارب على المواد ومدى قابليتها لصد الموجات او عكسها هنلاقي المواد بتختلف بين بعضها ... وبالتالي نقدر نمنع ترددات من اختراق مادة في حين ان مواد تانية بترددات اعلى تقدر تخترقها لسة

الموضوع ده على فكرة موضوع رائع جدا جدا .... ومن اهم الامثلة عليه طيارات الشبح (الفانتوم) اللي امريكا بتتنطط بيها علشان الرادارات مابتقدرش ترصدها

فتخيل بقى انك تبقى مآمن ان هتشوف أي طيارة غير صديقة بتحاول تهجم عليك على شاشة الرادار ... وفجأة تلاقي اللي بيقصفك من فوق راسك!! موقف رهيب .. مش كده؟

اكيد بردو هبقى احكيلكو على الموضوع ده وازاي نقدر نشوف الطيارات على الرادار والكلام ده كله ... بس خلوني اشوّقكو الاول شوية

Without Fear

Sep 27 2005, 12:35 PM

المهم انا نسيت اكمل جواب السؤال

ازاي بيبقى الخط مشغول؟ على فكرة كمان احيانا لما بنتصل (خاصة اذا مكالمة دولية) بتيجي رسالة (الخطوط مشغولة) ...

فليه بيحصل كل ده؟ حتى على الموبايلات؟

السبب كمان بسيط جدا ... لو جينا واتكلمنا على التليفونات العادية .. هنقول ان السنترال مثلا بيكون عنده عدد معين من الخطوط يقدر يستخدمها بحيث ان لما بيفضى خد بيستقبل مكالمة تانية ...

ياترى هل ده بيحصل مع الاتصالات اللاسلكية كمان (اللي زي الموبايل كده مثلا)؟؟؟

ايوة بالتأكيد ... بس هنا بقى بتبقى نطاق من الترددات ... يعني مثلا بيكون شركة فودافون مثلا واخدة نطاق الترددات من 850 ميجا لغاية 900 ... وشركة موبينيل واخدة مثلا من 900 ل 950

كمثال يعني مش حقيقة طبعا انا معرفش الترددات الاساسية ايه ... بس على العموم لو اتكلمنا على اساس الافتراض ده ... هنلاقي انها بتقسم ال150 ميجا دول بحيث ان خلال الساعه الواحدة مثلا بتحصل مثلا 5000 مكالمة ... وتوزع المكالمات دي ... بحيث ان مكالمة تتم على التردد 850 ... ومكالمة تانية على تردد 855 وهكذا ...

فطبعا اذا زاد الحمل عن اللازم .. هتلاقي ان كل الخطوط او الترددات اللي هم محددينها مشغولة في وقت واحد ... وبالتالي مش بتقدر تديلك تردد تتكلم عليه .. فبتيجي رسالة (الخطوط مشغولة number busy ) او (خطأ في الاتصال error in connection)

Without Fear

Sep 27 2005, 12:36 PM

طيب نيجي لنقطة تانية ... ازاي لما بنتصل بفلان على الموبايل فورا بتجيلنا رسالة صوتيه بتقول (الهاتف الذي طلبته مغلق)؟

او الرقم مشغول؟

انا قعدت الفصل اللي فات يمكن كام اسبوع احاول افهم اللي بيحصل .. عمري بصراحة مافكرت في النقطة دي .. لكن اللي خلاني افكر هو علاقة الموبايل ... لان كان فيها نجمة بتنور لما بيجي اتصال .. وبتنور من قبل ما يجي الاتصال او المسج بثانيتين تقريبا او اكتر بشوية

بالاضافة لكده كمان ... لاقيت انك لما بتكون جنب راديو او تليفزيون تلاقي تشويش على الارسال .. على الراديو تسمع (توتوتووووووت توووت تووووت)

وفضلت افكر ايه السبب في ده ... لاقيت ان السبب في كل ده هو ان في الاول لما بتتصل بشخص ... بتبعت signal للرقم ده .. الموجة دي بنسميها موجة المستجوب ( interrogator ) الموجة دي من اسمها .. بتستجوب الموبايل على الرقم ده ... هل الخط فاضل؟ ولا فيه خط تاني .. ولا مافيش ارسال .. بتسأل عن حالة الرقم ده ... والموبايل بيرد عليها بارسال رسالة تانية عن طريق جهاز اسمه transponder ... بيبعت انواع مختلفة من الموجات على حسب حالة الخط ده (مثلا يبعت 111 اذا الخط مشغول ... ويبعت 000 اذا كان الخط مغلق ... او 101 اذا فيه ارسال والموبايل جاهز لاستقبال المكالمة)

ال111 وال 000 وال101 .. بتروح على شركة خط الموبايل اللي انت جايبه .. ومقابل كل كود او رقم بيبقى فيه رسالة صوتيه .. فيروح محول الاتصال على الرقم ده وتطلعلك المسج

يبقى هيبقى شكل المكالمة كالتالي:

user posted image

يبقى قبل ما بيرن التليفون بيبقى فيه لحظة ارسال صغنوووونة .. لو عايزين تشوفوها .. جربو استقبلو مكالمة وانتو جنب الراديو وهتسمعو الصوت (بس يكون مفتوح طبعا)

طريقة ال interrogator وال transponder بتستخدم ف حاجات كتيييير اوي اوي ... ومن اهم استخداماتها في الطيارات والمطارات (والرادار بتاع الطيارات كمان)

وهنكمل اكيد بعدين بس لما تخلصو الجزء ده

akrm-nagy

Sep 29 2005, 09:45 AM

QUOTE

وهو ان بين ارسال التليفون وارسال التليفزيون فرق في السرعة

انا كنت عايز اقول كدة بس قولت اسألك برضوا

QUOTE

وفضلت افكر ايه السبب في ده ... لاقيت ان السبب في كل ده هو ان في الاول لما بتتصل بشخص ... بتبعت signal للرقم ده .. الموجة دي بنسميها موجة المستجوب ( interrogator ) الموجة دي من اسمها .. بتستجوب الموبايل على الرقم ده ... هل الخط فاضل؟ ولا فيه خط تاني .. ولا مافيش ارسال .. بتسأل عن حالة الرقم ده ... والموبايل بيرد عليها بارسال رسالة تانية عن طريق جهاز اسمه transponder ... بيبعت انواع مختلفة من الموجات على حسب حالة الخط ده (مثلا يبعت 111 اذا الخط مشغول ... ويبعت 000 اذا كان الخط مغلق ... او 101 اذا فيه ارسال والموبايل جاهز لاستقبال المكالمة)

ياااااااااااااااااااااااة

كان نفسى اعرف الموضوع من زمااااااااااااان

ههههههههههه
هروح الكلية اتنطط بية على صحابى

ههههههههههههههههههههههه

QUOTE

الموضوع ده على فكرة موضوع رائع جدا جدا .... ومن اهم الامثلة عليه طيارات الشبح (الفانتوم) اللي امريكا بتتنطط بيها علشان الرادارات مابتقدرش ترصدها

اكيد الفانتوم مصنوعة من مادة مبتعكسش الموجة يعنى بتسمح بعبورها ودة اكيد مبيخليهاش تظهر على الردار

انا رأى ان حل الموضوع دة فى الخلايا الضوئية

هو حل اهبل ومكلف جدااااااااااااااااااااا بس حل

لأن الطائرة مش هتهرب من موجات الضوء ابدااااااااااااااااا

QUOTE

اكيد بردو هبقى احكيلكو على الموضوع ده وازاي نقدر نشوف الطيارات على الرادار والكلام ده كله ... بس خلوني اشوّقكو الاول شوية

هو انتى بتحكى مسلسل عربى؟؟؟

كملى يا لمضة هانم

Without Fear

Oct 1 2005, 07:11 AM

QUOTE

هروح الكلية اتنطط بية على صحابى

اتنطط براحتك بس حاسب تقع

(على فكرة وانا ف اولى كلية كنت راجعه انا وماما من الكلية ... فلاقيتهم عاملين فورمات خشب (الفورمة بتبقى فريم خشب بيضبو على اساساه الاسمنت في المباني) ... المهم انهم عاملينها على شكل مستطيل متقسم 6 مربعات تقريبا .. وتلاتة فوق بعض .. يعني الارتفاع كان تقريبا 25 سنتي كده ... وانا زي الهبلة اول ما شوفتهم

اللللله .... حجلة ... ورحت قعدت العب واتنطط

وكنت لابسة جزمة اللي بتبقى عالية من قدام وورا ف نفس الوقت ... ونسيت اعمل حسابها في حجم النطة . وروحت طخ .... على رجلي

كانت هتتكسر بس ربنا ستر .. فاوعى تتنطط يا اكرم

)

QUOTE

اكيد الفانتوم مصنوعة من مادة مبتعكسش الموجة يعنى بتسمح بعبورها ودة اكيد مبيخليهاش تظهر على الردار

ده صحيح .. بس هي مش بتسمح بمرورها (لان مافيش اي حاجة الا الهوى بس هو اللي مابيعكسش اي حاجة (اذا كان خالي من اي ذرات تراب او شوائب )

QUOTE

انا رأى ان حل الموضوع دة فى الخلايا الضوئية

لكن اللي بيحصل انها مدهونة بمادة خاصة جدا .... بتمتص كوووووووول الموجات .... وبلاضافة لكده كمان الدهان الاسود ده حالك لدرجة انه كمان بيمتص اي موجات ضوئية مش بس صوتيه او فوق الصوتية

وعلشان يضمنو كمان انها حتى لو عكست اي موجة مش هتوصل للرادار تاني ... بيصمموها بطريقة رهيييبة ... وبشكل خاص جدا بحيث انه بيشتت اي موجات معكوسة ... وبالتالي الموجات بترتد ف مكان تاني خااالص غير اللي ارسلت منه

QUOTE

هو انتى بتحكى مسلسل عربى؟؟؟

ههههههه .. لا والله ... بس علشان ادخل في الحاجات دي لازم تكونو فاهمين لما اتكلم عن موجات او ارتداد موجة او ازاي موجة بتلغي موجة وازاي الmodulation وكل ده

بس انا غطيت كده ما فيه الكفاية عن الموضوع ومش باقي الا ال FM بس على ما اعتقد

ومازال رايي فيك زي ماهو انك مهندس متنكر

صح؟

akrm-nagy

Oct 1 2005, 04:07 PM

انا محاسب

ولو لم اكون محاسب لوددت ان اكون محاسب

Without Fear

Oct 2 2005, 06:12 AM

ياراااجل

ده المحاسبين ماليين الدنيا

وهو فيه حد مابيعرفش يجمع ويطرح ويمسك الالة الحاسبة؟

akrm-nagy

Oct 2 2005, 11:39 AM

هــــا هـــــــــا هـــــــــــــا

اللى انتى بتتكلمى عنهم دول المحاسبين المبتدئين وميصحش انى اقول عليهم محاسبيين اصلا

بتوع محاسبة عم بيومى بتاع كشك السجاير

اشتريت النهاردة ب20 جنية

وبعت اللى اشتريتة ب 30 جنية

يبقى صافى الربح 10 جنية

المحاسبة دى من اهم العلوم واكثرها انتشارا فى الواقع العملى

akrm-nagy

Oct 2 2005, 01:53 PM

قبل ما تبدأى فى الموضوع الجديد يا فير انا عايز اسألك على حاجة

اية هيا فكرة عمل الاريال (الهوائى ) اللى هو اريال التليفزيون يعنى

متقوليش بقى فية فلتر والحاجات دى كلها

سلكين بيتوصلوا بحديدة وبيجيبوا القناة الاولى والتانية على الاقل

ممكن تفهمينى ؟؟؟؟؟

Without Fear

Oct 2 2005, 03:21 PM

QUOTE

المحاسبة دى من اهم العلوم واكثرها انتشارا فى الواقع العملى

ايوة انا عارفة ده يا اكرم ... وعلى فكرة ... سواء كنت محاسب ولا مهندس ولا كنت ايه ... انت لازم يبقى عندك خلفية في المحاسبة

يعني احنا بالنسبالنا .. درسنا مادة لمدة فصل كامل متخصصة بس في اقتصاديات الهندسة ... (rate of intesrest- simple interest - compound interest- ومبادئ المحاسبة ... وتنظيم المشاريع) .. وكوووول اللي قلبك يحبه يعني

وحتى الان .. اي مشروع بنعمله في الكلية ... بيبقى اخر جزء منه ومن اهم الاجزاء ... Cost estimation و fesibility study

فانا معترفة ان الاقتصاد من اهم العلوم ف حياتنا

Without Fear

Oct 3 2005, 02:34 PM

QUOTE(akrm-nagy @ Oct 2 2005, 02:53 PM)

اولا عذرا لاني ماعرفتش ارد امبارح

انا كنت بديت في الرد بس اضطريت امشي قبل ما اكمله

فهرجع اعيد من الاول تاني

Without Fear

Oct 3 2005, 02:46 PM

بالنسبة لل antennas فمجالها واسع جدا جدا واستخداماتها رهييييييييبة بجد

والايريال او الانتيننا هو فعلا سلك يا اكرم

اي سلك من مادة موصلة للكهربا طبعا ....

اما عن ازاي السلك ده بيقدر يوصل المعلومات دي كلها فالسبب بسيط جدا ولو ان شرحه هيحتاج شوية فيزيا

عندنا طبعا خاصية اسمها الخاصية الكهرومغناطيسية ... ومعناها ببساطة امكانية توليد مجال كهربائي (او كهربا يعني) ... من وجود مجال مغناطيسي

وامكانية توليد مجال مغناطيسي من وجود مجال كهربائي

فعندك اي سلك بيمر فيه كهربا ... بيولد حواليه مجال كهربائي ومغناطيسي ف نفس الوقت

واي مجال مغناطيسي (متحرك) لو حطيت فيه سلك ووصلت لمبة هتلاقيها اشتغلت ونورت

ده ببساطة الفكرة من الاستفادة من الكهرومغناطيسية

فالانتيننا ... بتبعت وبتستقبل electromagnetic waves

او موجات كهرومغناطيسية ....

هي وظيفتها بس انها تجمعها او تلقطها من الجو او البيئة المحيطة بيها ... وتوصل الموجة للاجهزة

زي مانت محتاج سلك كهربا علشان توصل الكهربا لاي جهاز

ماقدرش اتعمق كتير في ال antennas دلوقتي لانها فعلا محتاجة تعمق كتيير جدا

لكن اللذيذ فيا بقى .... ان طول الايريا بيأثر على التردد اللي يقدر يلقطه

فكل مازاد التردد ... بيقل طول الانتِنّا ....

وكذلك شكل الانتننا مابيقتصرش بس على سلك ... فيه على شكل helix (زي السوستة كده) وده اللي بيستخدموه في الستالايت (اطباق الاستقبال او الدش) لانه حجمه مش كبير اوي وبيقدر يستقبل مدى واسع من الترددات

واقولكو معلومة كمان جديدة .... انا اول واحدة اقولها

وكنت اول واحدة اعرفها بصراحة يعني لاني عرفتها بعد اكتشافها بكام شهر بس

وهي ان دلوقتي توصلو لطريقة يعملو بيها ايريال من بلاستيك بدل ماهو معدني ... وده طبعا تقدم رهيب جدا في مجال الانتننا لان الحديد والمعادن ليها عيوب كتير جدا وخاصة ف التصاميم بتاعتها بعكس البلاستيك

هبقى اقولكو على موضضوع البلاستيك ده بعدين لاني قرات كتير عنه وعملت بحث من سنة تقريبا عن المجال ده

اتمنى تككون قدرت تتخيل اللي بيحصل يا اكرم بالنسبة للي الايريال بيعمله
وانا هعمل تلخيص للخطوات وبالصور ان شاء الله (اعتقد احتمال اعملها بكرة لاني الحمد لله المأساة اللي كنت بعاني منها الفترة دي قربت تخلص)

akrm-nagy

Oct 4 2005, 02:18 PM

يعنى يا فير بس مش قوى

اصل من 3 /4 ايام كدة كنت بركب اريال علشان العيلة عندنا عايزيين القنوات الارضية فى رمضان

فبصيت للأريال سلكين وشوية حديد

والدش تعاقيد فى بعضة

فحبيت افهم الفرق اية ؟؟ولية؟؟

واية حكاية الاريال البيلاستك دة

والنبى تبعتيلى واحد الاريال وانا بعلقة كان مصدى وقرفنى وطلع عينى

kemoo

Oct 4 2005, 08:39 PM

بجد يا جماعه الواحد مش عارف يقولكم ايه
معلومات ببلاش كده وكمان فى اى وقت انا عايز اقراها فيها
ربنا يخليكوا يا جماعه بجد والله

كريم.....................

Without Fear

Oct 9 2005, 08:17 AM

وانا سعيدة ان الموضوع عجبك يا كريم ويارب تستفيد منه

Without Fear

Oct 9 2005, 02:13 PM

QUOTE(akrm-nagy @ Oct 4 2005, 03:18 PM)

اممممم ... السبب ان الايريال العادي بيلقط اشارة رقمية بسيطة جدا مرسلة من محطات الاستقبال لارضية في نفس البلد ...

والتردد بتاعها بيكون بسيط اذا ماقارناها بالدش

لكن الموجات اللي بيستقبلها الدش بتكون جاية منين؟؟؟ من الاقمار الصناعية اللي خارج الغلاف الجوي والكورة الارضية نفسها

فتخيل بقى الارسال هيبقى بترددات اد ايه؟؟ (بالجيجا هرتز طبعا)

وبالتالي .. قدرة ايريال بسيط على انه يستقبل اشارة قوية جدا زي دي هتبقى معدومة تقريبا

الدش بيستخدم نوع من الانتنّا اسمها Helical antenna

اللي هي على شكل زنبرك زي ما افترك اني قولت في مكان ما من فترة :blink:

بس المهم ان الايريال من النوع ده بيبقى عندها قدرة عالية على استقطاب الاشارات

Without Fear

Oct 9 2005, 02:17 PM

اما بالنسبة للايريال البلاستيك ده

فكان سبب اختراعه او اختراع مادته .. هو ان الايريال العادي (المعدني) اولا عرضة للتآكل والاكسدة والكلام ده كله

تاني حاجة ... ماتقدرش تشكله على اي شكل انت تقدر عليه .... (لان المعدن انت عارف مش للدرجادي قابل للتشكيل )

فكان الهدف هو الحصول على مرونة في الحصول على اي اشكال من الايريال (على فكرة لكل شكل فيه قدرة على استقطاب الاشارات مختلفة عن الشكل التاني)

ففكرته هي انك بتصمم نوع بلاستيك .. فيه تراكيز مختلفة من حبيبات معدنية (جزيئات صغيرة) .. وبالتالي .. هيجمع بين خصائص البلاستيك المرن ... وخصائص المعدن في قابلية التكهرب واستقطاب الاشارات ...

فدي كانت ميزته الكبيييرة جدا

akrm-nagy

Oct 9 2005, 02:23 PM

انا كنت اشتغلت فترة محاسب فى شركة الكترونيات

واتذكر ان كان فى نوع فى المخزن كان اسمة انتنا سويتش

هى دى اللى انتى بتقولى عليها

Without Fear

Oct 9 2005, 02:27 PM

بالنسبة للantenna بقى

وطريقة عملها

فدي صعبة شوية

بس خليني اقربلك الصورة شوية

اي مادة ليها قدرة على التمغنط ... بمعنى ان كل مادة بيبقى فيها جزء موجب وسالب (قطب شمالي وجنوبي)

فايه معنى ان الحديد يتمغنط؟؟

ان الجزيئات بتاعته بتبتدي تترص بشكل معين .. بحيث ان الاجزاء الموجبة (النواة بتاعه الذرة) تنجدب للقطب السالب للمجال المغناطيسي حوالين المادة

والجزء السالب (اللي هو الالكترونات ) يتجذب للجزء الموجب (او القطب الشمالي) لللمجال المغناطيسي

حركة الالكترون والنواة بتاثير المجال ..... هيعمل ايه؟؟ هيحرك الشحنات الموجبة ... مش في ذرة واحدة؟؟ لا ... ده في كل ذرات المادة

وبالتالي هينتج عندنا فرق في الشحنة (يعني فرق في الجهد او فولت كهربائي) .. فلو وصلنا سلك بين طرفين قطعة الحديد دي .. هنلاقي تيار كهربائي بيمر فيها

قابلية المادة لان ذراتها تترتب لما بتتعرض لمجال مغناطيسي ... بتختلف من مادة والتانية .. وفي المادة نفسها كمان (يعني مش كل الحديد ليه نفس القابلية للتمغنط)

دي فكرة عمل الايريال

هتيجي اشارة (signal) معينة ... فيها نقاط قوة ونقاط ضعف ... الموجة موجة كهرو مغناطيسية .. يعني ليها خواط مغناطيسية ... لما بتقرب من الايريال (المعدني) ... الخواص المغناطيسية هتأثر على المعدن وتخليه يتمغنط

- المناطق القوية من الموجة هتبقى ليها قدرة على المغنطة اككتر من المناطق الضعيفة ...

وبالتالي ... قدرة الالكترونات على الحركة في المعدن (الايريال) وسرعتها هتتغير بتغير قوة المجال الممغنط (الموجة)

هتلاقي فرق الجهد الناتج بيتغير كل ما اتغير ارتفاع الموجة

وهتلاقي انك قدرت تحصل كمان على موجة كهربائية (بحتة) في الاسلاك بدل ماكانت موجة كهرومغناطيسية (في الهوا)

فادي فايدة الايريال يا سيدي

Without Fear

Oct 9 2005, 02:38 PM

امممم ... مامرش عليا حكاية الantenna switch دي

فاذا تحب ادورلك على التعريف الصحيح ليها

لكن التطبيق لتحويل الارسال على antenna غير ... موجود

وهو نظام الاتصالات اللاسلكية

بيبقى عندك 4 transceiver (يعني مرسل ومستقبل في نفس الوقت)

بيعملو واحد منهم master ... يعني الريّس بتاع ال3 التانيين

يراقب وجود زحمة عليهم

فانت عايز تتصل باحمد مامي مثلا ...

هيروح حاطك على الخط 1

وانا هتصل باحمودا

هيحطني على الخط اتنين

جه اتصال تالت ... جاي يحطه على الخط 3.. لاقى حد تاني بيتكلم على الخط ده .. هيروح مدور على بديل ليه

اول ما يلاقي خط فضي .. هيروح محول الاتصال عليه

ده مبدأ تحويل الارسال والاستقبال

لكن مش عارفة اذا كان هو المقصود بالinstrument اللي انت شوفتها ولا لأ

Without Fear

Oct 9 2005, 02:39 PM

اتمنى اكون قدرت اوصل المعلومات وجاوبت على اللي انت عايزه

وانا تحت امركم ف اي استفسارات تانية

akrm-nagy

Oct 9 2005, 03:20 PM

طبعا وصلتى المعلومة

جايز اسم الانتنا سويتش دة اسم تجارى دارج

عموما انا لسة على علاقة طيبة بالمهندسين اللى شغالين فى الشركة دى

فهروح اسألهم على الاسم المظبوط للأنتنا سويتش دى

Without Fear

Oct 11 2005, 07:11 AM

طيب جميل

واذا قالك عن حاجة تانية ابقى تعالى قولهالنا واهو كلنا نستفيد

Bassam

May 7 2006, 02:25 AM

وبعدين؟